1 Te nosali Genuai Bidigo bidi sese sela olama, me bidi nogo si olama, sągągo si peda sigisu te 72 bidi sa munama, tagala palali. Aga nosali pabo pesage tigidaliba te bidi dabe si si tagala paliyu ela palio. 2 Tama agai aga wali pabo bidi dabebolo te po wali, “Te nai hauwa mu te gide tau yai elalubao, tiali goli te tau yai nai sabo sę ebo bidi hauwa menio. Tama tibaso dagego te gi aga ayabolo gedu haluasa po waiyąo, tama agai aga sę bidi tagala palama te gide elalubo nai sisinigi pomainogo wao. 3 Te sę polo egi piąo. Eno dage moni dwai uni yowi dabe tomoba te sipsip tagala palobo ąǫ ebo dao. 4 Te mone ge bubo be me, nai gonobo wa me, sągą nadoba dabe sela pigimio. Tų dilide gasa bidi babe dali po weyu gesego igimio. 5 Te dage be me deli tomoba pabo sogo, te dagego hasia bolo te po waiąo, ‘E bede bidibo we bidi bugagia bidiąo.’ Te tiwai homu nagame ilibo po wao. 6 Homu tegaluama, bugagia bidibo bidi me te bede bidibaso da, nago dwagi yai homu me aga dali elalumainao. Te tobage bidi me meni baso da, nago wali po du walisiąbaso da, te po dugaba digi ma asomainao. God agai augwalibolo dwagi yai sę egobeo, te dagego koneaiba. 7 Te sę ebo bidi aga nai sabo dao. Dage te bede deli bidibadi, te tubo nai maiyu, ąį me maiyu ebaso da, te nai tuiąo. Dage te bedu me beba peyu ela biligimio. 8 Dage mena be naniba pobadi yaide, augwaligo dwagi yai homu elama, dawea sobaso da, te dage tumai hagede muani nai tuiąo. 9 Dagego suali digi, te dage pali be nanide gasi yai we bidi bidibaso da, te augwali tau siąo. Tede bidibo we bidibolo ‘Godigo we bidi tonalubo sę dage pageba asali dao,’ waiyąo. 10 Tiali goli, gasa be nani meba pobadi yaide, dage dali bugai homu elama, dawea siasąbaso da, te be naniba pabo tų dilide dolalu, te po wao, 11 ‘Dagego e bulude elalubo te dago sągąde dagayane te pobele bage te dago sela sąbo da, te duga konemai hagede ebao. Tiali goli, dagego bugagia homu kone palao. Godigo we bidi tonalubo sę ebo bomo dage pageba pąba yagasalio,’ te po waiąo. 12 Eno dagebolo megi obe dao, Godigo we bidi po tų ela mabo sogode, te polobadu dwai bulu Sodom we bidi Godigo hobede elama, dwasianu sęgę mawaibao. Tiali goli, te dagebolo bugai homu isiąyu dawea sisąyane be nani we bidi dabeba mabo sęgę te genuagi mu yaibao,” Jisasgo te po wali.

13 Te Jisasgo po ma wadolama weyu, te po wali, “Dage te hanu Korasin we bidi dabe, hobede mu yaibao. Betsaida bage, dage me hobede mu ebao. Magi baso menio. Te bidi me deli te hanu si Tair me Saidonba pelama, te eno dage tomode yali bidi noma sabo bomai sę tiwai me igi pigi sogo da, teda te polo tama te Tair me Saidon, te hanu side bidali we bidi dabe homu begeligi dao. Tama augwa homu hasegeliyu, augwa dwai dwai sę yalide moni homu eyu, dwai homu dene elama, te homu dene ebaso gudubo ugwa dabe gudulama, te augwa tobolude keli pilama dugulalugi dao. Te augwa yali dwai sęde homu kone palama tama tigi dao. * Ais 23:1-18; Ese 26:1–28:26; Jol 3:4-8; Amo 1:9-10; Sek 9:2-4 14 Tiali goli, te Godigo e tǫde we bidi po tų ilabo bodolu muani sogo pedalubo side, te dageba pedalubo sęgęgo da, te Taia hanu dali me te Saidon te hanu side bidali we bidi dabeba pedalubo sęgę aiyaba elalu, te yalawainu yaibao. Tiali goli, dagebolo da, te genuai sęgę pedelaibao. 15 Tama dage Kaperneam hanude bidibo bage, te dagego homu te dagego nogi te we bidi augwaligo te sigiba dagaluba ugwanu mu holobao, te homu eba, agawe?. Tiali goli, mu menio. Te dage tigi dene ebo dwai sia dabo dedage pageba sąwaibao,” Jisasgo te po wali.

16 Jisasgo aga wali bilibo bidi dabebolo te po wali, “Bidi mego dagego pusubo po odobaso da, te agai eno po odoyu tebao. Bidi mego dage buluba ela palobaso da, te agai ena buluba ela palu tebao. Bidi mego ena buluba ela palobaso da, te ena tagala palali bidi me buluba ela palu tebao.” Jisasgo te po olama, te bidi dabe pali.

17 Te nosali Jisasgo te tagala palali bidi dabe dwagi yai homu mu dali Jisas pageba ma asali. Augwaligo te po wali, “Genuai Bidi, dwai noma haubo bidi dabego dago nago nogi olama, hage baso, dago po wali pali.” 18 Jisas agai te dwai haubo polalubo bidi nogi Satan agai bomo polobadu dolai dao homu eyu, te po wali, “Satan be sole gagawai dagaludu kegasa dulubo eno polobadu suai dao. 19 Edao. Eno dagebolo bomo mawai dao, dagego te Boi Bidigo bomo mu aiyaba elalumainu. Te hwą dabe me, te bidi gąų kelebo hasamani me, sągągo agabaso da, te dage gąų kelebaso da, dene isąwai, te tiwai dagego te Boi Bidi Satan aiyaba elaluaibao. Agai bomo tigidali tego dage aiyaba elalugobeo. Augwaligo dagebolo magi sę me elama, dene mugobeo. 20 Dagego tama te ebo sęde dwagi yai homu egimio. Te po tagalu, ma dagego nogi te dagalude te buku mede asęai dao, tede dwagi yai homu iyąo,” Jisasgo te po wali.

21 Te sogo naga tama Godigo Dwagi Yai Mobogo Jisas dwagi yai homu mu ilali. Tama agai te po wali, “Ayao, nage te dagalu dali tǫ dali nigila tonalubo Genuai Bidi dao. Eno nage dali deli homu eyu nagebolo usu da po obao. Tǫde homu kolesaga koneai bidi dabe augwaligo koneidali weyu tama nago te eno tamadi pusali po page nago geme dualai dao. Tiali goli te tǫde elalubo homu kolesaga konesiąwai we bidi augwalibolo nago te po page ola mawai dao. Awe, Aya, nago te tiwai yaibao homu elama, tama tede dwagi yai homu eyu nago tama tiwai naga yai dao,” wali.

22 Te we bidibolo Jisasgo te po wai, “Eno Aya agai tigidali nai eno nogoba muai dao. Tama niwai bidi me deli agai te Ogwa mu konea silai menio. Aya agaduba deligo naga te Ogwa konea silai dao. Tama niwai bidi me deli agai te Aya me konea silai menio. Ogwago naga konea silai dao, tama te we bidi dabebolo te Ogwa aga digi te Aya augwalibolo ola mobaso da, te augwaligo me te Aya konea silaibao,” wali. 23 Tama aga wali bilibo bidi dabeba ibaba gelama, geme te po wali, “Te dagego megi subo sę tiwai te bidi dabe augwaligo me subaso da, te dwagi yai homu pemene iyąo. 24 Polobadu Godigo po pusa mabo profet bidi dabe me, te genuai tuni bidi king dabe me, augwaligo te ebo sę suainu yai goli me suai menio. Augwaligo dagego odobo po odainu yai goli me odai menio,” wali.

25 Te Juda dabego bomo yai po ola mabo bidi me asama, Jisas usu sai hagede, agai po hanalubo po wagasali. Agai te po wali, “Po ola mabo bidi, eno noma te bugagia gamonabo pesageba painu, magi sę yagawe?” 26 Jisasgo po wei ponoyu, te po wali, “Te Godigo po wabo bukude magi po wali elalubawe? Te wali po dabe nago nedama suali, mena page konebo dawe?” 27 Te bidigo te po wali, “Te Godigo po wabo bukude te po wabo dao, ‘Nago Genuai Bidi God naga homu sese badi, naga noma sese badi, naga bomo sese badi, naga kolesaga sese badi elama, tigidaligo naga Godibolo homu kęąluao,’ wabo dao. ‘Me ma, naga digi naga homu godolo mu eyu kęąlubogia, te nago te bidi naga abagi hasi me godolo homu eyu me tama nage tiao,’ te po wabo dao,” wali. * Prs 19:18; Bom 6:5

28 Te Jisasgo po wei ponoyu, agabolo te po wali, “Te usu dao. Nago po dolo obao. Nago tama tiyu da, te naga bidabo noma bidigo ula te gamonabo bulu selama, bidada peyu, bidada paibao,” te po wali. 29 Tiali goli, te Juda dabego bomo yai po ola mabo bidi aga hale idali weyu, Jisas agade doloba pai bidi dao homu emai hagede, agai Jisasbolo ma hanaluyu te po wali, “Eno abagi hasi da, te de dawe?” wali.

30 Jisasgo te po wali, “Bidi me Jerusalemdu te Jeriko be naniba dulubadi yaide, nai wi sabo bidi dabe te geme sunumide dula selama, te bidi asobadi pageabi elama tulama, te bidi aga ugwa dabe pepedama, elama, tama augwaligo aga doado bage tigidali wi sali. Tama te bidi isabo pąde magawai te aga mesena isai tiwai munalubadi, taga palio. 31 Tebadi yaide, te pris bidi me deli te tųdu naga pali. Tama agai te elali bidi te tama telalubo sulama, te tų bogo badu bogelama ela soyu pali. Te bidi tau sabeo. 32 Tama nosali te tųdu naga Livai sibi bidi me deli teba sabolali. Te bidi munalubo sulama, te tų bogo badu me ela solama pali. 33 Tiali goli, Samaria bidi me te tųdu naga asiyu, te bidi suali. Te sulama, tama te boi yai bidi dao, te homu elama, tagalobe, moni homu dene yali. 34 Te bidi pageba pelama, wel dabe, bomai wę dabe keni idaliyu te elali pesageba gelama, te ugwa bogogo kęnama, te bidi ąobo kibu daiba muani. Tama bidi osogo pibo beba sela pelama, tede agai tonaluali. 35 Te sogo do agai mone ge si selama, te osogo pibo be page bidibolo mani. Te bidibolo te po wali, ‘Nago bugagia tonaluao. E mone ge si ususąbaso da, ena ma asobo sogo nago e bidide pali mone eno nagebolo wei ma mawaibao,’ te Samaria bidigo te po wai,” Jisasgo te po wali.

36 Te Jisasgo te po hanalu wali, “Te bidi sela tomode nago homugo mena bidigo te elali bidi te bidi aga abagi da homu yaliwe?” 37 Tama te bomo yai po ola mabo bidigo wei ponoyu, te po wali, “Homu dene elama, tau sali bidi dao,” te bidigo te po wali. Jisasgo ma te po wali, “Te yaligia te nago me tiao.”

38 Te Jisas aga wali pabo bidi dabe dali pobadi yaide, be nani me deliba sabolali. Tama tede te we me nogi Martago Jisas asobadi, dwagi yai homu elama, bugagia gesali. 39 Te we aga ama nogi Maria aga te Genuai Bidi sągą pagede dugulalu, agai ola mabo po odaludalio. 40 Tama Marta agai te nai ulubo sę dabe sulama, homu tųą pali. Tama tibaso, aga Jisas pageba aselama, te po wali, “Genuai Bidi, eno amago e sę dabe enaduba emainu taga soali nago konebewe? Ena tau sigi pao po wao.” 41 Genuai Bidigo wei ponoyu, te po wali, “Marta, Marta, nage da te tigidali nai sulama, homu te tųą pobao. 42 Tiali goli, sęgę yai nai deli mu te elalubao. Tama Mariago homugo te saiba homu yali te segąį nai te saleao. Mego me dobagobeo,” Jisasgo te po wai