2
Jonago gedu haluasa po weyu, Godibolo usu da po wai
1 Jona te sųgų haligade bididu, tama agai Godibolo gedu haluasa po wali, agai Genuai Bidi dao. 2 Agai te po wai,
“Genuai Bidio, eno sęgę tolali, tama eno nagebolo i wali,
tama nago eno i wabo odali.
Ena te isibo bidi dabe dwai bulude bidibaso,
tama eno nageba gela wali.
Tama nago eno gela wabo odai dao.
3 Nago ena sąnama, tama ena tamu ąį
aiyaba mu dulalio.
Te tamu ąįgo ena tigidali mesegelai.
Tama nago te genuai ąį dini ena daide
ugwadu pepeda pali.
4 Eno te po wali, ‘Nago ena sela sąwanio.
Tiali goli, eno nago genuai tedali lotu be tempel
te ma sueibao homu ebao,’ eno te po wai.”
5 “Te ąį dini ena daide ugwadu pepeda peyu,
tama eno mobo sabo paliali.
Tama tamu ąįgo ena tigidali mesegelalio.
Te tamu ąįde nosaigo ena tobolu bagulai elaluali.
6 Ena te tamu ąį tomoba te tigidali bulu du page
aiyaba mu dulali.
Te dwai bulugo ena kalabus mu ilai.
Tiali goli, Genuai Bidi, nage eno God,
nago ena ma dobola salio.
Tama eno te dwai bulu tagalama,
ena te bidibo ulade bidibao.
7 Genuai Bidio, ena kone palali, te ena isabo homu yai,
tama nage eno homugo ma koneani.
Tama eno gedu haluasa po wali,
te po nago genuai tempel lotu beba pedelalio.”
8 “Te tibo godiba lotu po wabo bidi dabe,
augwaligo te nago augwali homu dene eyu,
tau sabo kolesaga te tudiba mubo dao.
9 Tiali goli, eno te nago nogi ugwaba sabo balia olama,
tama nagebolo ofa mawaibao.
Te tigidali sę po eno nage dali dąų wali, te sę eno yaibao.
Genuai Bidi, nagaduba deligo bomo eyu,
naga te da ma dobola selama,
tama da bidibo ulade bidibao!”
Jonago te po wai.
10 Tama Genuai Bidigo po te genuai sųgųbolo olama, tama sųgųgo Jona te tamu ąį saniba buguligi pai dao.