34
Jopgo te God dali konila po wali po geda muani
1 Tialima te Elihu agai po ma weyu, Jop dali, aga abagi sela dali, augwalibolo e tama po wali.
2 “Dage dwagi yai homu kolesaga konea sai bagego da,
dwagi yai kolesaga hauwa mu elalubao.
Dagego eno poba olo sagana munama, bugagia odao.
3 Dago pedauwaligo nai dabe dwagi yai yaliwe,
ma dwai yaliwe olama, hanala subo dao.
Te tiwai dago ologo da, bidigo po odama,
tama dagala subo dao.
4 Tama da dena digi dena wali po osola sumainao.
Tama dago koneaibao,
mena po dwagi yai doloba pai yaliwe waibao,” wali.
5 “Jop agai e tama po wai dao.
‘Eno magi sę me dolobeo,’ po walio.
‘Tiali goli, Godigo doloba pai kolesaga enabolo ebeo,’
po wali.
6 ‘Eno magi sę me dolama, magi dwai sę me yai menio.
Tiali goli, Godigo homugo ena tibo po wabo bidi
dao olama,
tama ena dolama sęgę mu mabo dao.
Te ena agai enego enebo tiwai mu elama,
tama ena usu ma yabo ąǫ ebe,’
Jopgo te po wali.”
7 “Mena gasa bidigo Jopgo yali dwai sę tiwai yai dawe?
Jopgo Godiba posobo po genina mu wali.
8 Tama me ma, agai yaide dwai
kolesaga ebo bidiba kisa sigi pali.
Dwai bidi dabe da, te aga abagi solo dao.
9 Agai te tobage kolesaga dabe ebo dao.
Magi baso meni. Agai e tama po wali,
‘Ma, dago yaide God wei ebo kolesaga dabe eyu da,
dago mena dwagi yai nai saibawe?
Eno homugo te meni yaiba.’
10 “Tama dage bidi dabe, dagego
dwagi yai kolesaga elalubao.
Jopgo te tobage po obaso, eno po odiąo.
God Tigidali Bomo Elalubo Bidigo dwai kolesaga
me egobeo. Mu menio.
Dwai sę ebo homu te Godide digibulu mu elalubo dao.
11 Agai da bidi dabe dago kolesaga dolo osola sulama,
tama dago te yali sęde naga usu nama,
te dene mabo dao. * Tib 62:12
12 Eno mu po tama obao.
God Tigidali Bomo Elalubo Bidigo
bidi me deli olo me dolama,
tama dwai doloba pisąwai kolesaga me egobeo.
Dago te agai dwai sę ebo homu ebo usu egobeo.
13 Tama me ma, dego mu God sę menama,
e tǫ sese tonalumainu sę mawai dawe?
Te bidi me meni.
14 Ma, God aga naga homugo koneama,
tama aga mobo ma sigi sogo da,
te tigidali bidibo nai dabede,
15 teda te tigidali tǫde bidibo nai dabe
deli sogo tama isigi dao,
tama da we bidi me tǫ ma gagagi dao,”
Elihugo te po wali.
16 “Tama megi da, Jop, odao.
Te nage homu kolesaga elaluba wida,
nago eno wabo poba olo
bugagia munama, odao.
17 Ma, Godigo yaide doloba pai
kolesaga wei isąnama yali da,
teda aga mena tama ma aga king
bidiyu yaide e tǫ tonaluaibawe?
Tiali goli, God agai genuai bomo elaluyu yaide,
tama agai tigidali sogo doloba pai
kolesaga naga ebo dao.
Tama nago magi baso Tigidali Bomo Elalubo God
po tų ela menama,
tama dwai sę yali dao po obawe?
18 Te olo bidi mego te king mebolo
naga dwai king mu dao me wagobeo.
Tama me, genuai bidi mebolo
te olo bidigo nage bidi dwai dao po me wagobeo.
19 God deligo naga agai te tama po wabo usu yaibao,
magi baso meni, agai te tigidali we bidi nigai dao,
tama agai gedude tigidali deli tigi poąį naga bidibao,
te augwali doado bage hauwa elalubo bidi dabe me,
te doado bage hauwa elalusiąbo bidi dabe me,
tede moni homu me elalubeo, te tagalao.
Te tigidali bidi Godigo gedude
deli tigi tiwai naga bidibo dao.
20 Agai deli sogo naga tama da we bidi isimainu
ebo dao.
Te genuai nogi yai me, genuai bomo yai me, tagala,
te huli tomo mude God agai
te we bidi noma somainu elama,
tama augwaligo bidibo ula hulide silibo dao.
Te aga genuai bomogo tama tibo dao,”
Elihugo te po wai.
21 “Godigo yaide, da we bidigo kolesaga tigidali
sula silama,
da bilibo madi sese tama sula silibo dao.
22 Tama tibaso, te dwai kolesaga ebo we bidi dabego
hulia sai duala sabo madi me elalubeo.
23 Awe, Godigo dago kolesaga sese konea pai dao.
Tama tibaso yaide, agai da osola sumainu
agai po tų ebo madi pabo tagalomainu egobeo.
24 Te agai te genuai bidi dabe aiyaba
elaluama, silainu eyu da,
teda agai augwali mena tama
tiwai bidi yaliwe olama gegegobeo.
Meni. Agai augwali polo konea pela silai dao.
Agai augwali sela sąnama, gasa bidi hasegelebo
usu yaibao.
25 Agai augwaligo ebo dwai kolesaga
sese mu konea silai dao.
Tama hulide agai augwali aiyaba elaluama,
mesegelama, tagalobo dao.
26 Agai we bidigo gesabidide me
agai augwali tigide dene ilibo dao,
te we bidi dabe augwaligo sumai hagede.
Te bidi dabego te dwai kolesaga ebo
we bidide ebo gilama,
27 agai augwali tigide dene ilibo dao. Magi baso meni.
Augwaligo aga tudi ola mobaso.
Tama me augwaligo God agai wei ebo kolesaga
wali pisąma ebaso tebo dao.
28 Augwaligo nai meni yai
bidi dabe dali dwai kolesaga yali,
tama te bagego Godibolo i wali.
Tama Godigo augwaligo i odali.
29 Tiali goli, Godigo magi sę me igi menigi sogo da,
teda dego mu Godigo dwai page elalubao po
wagi dawe?
Ma, agai gesabidi dualigi sogo da,
teda de aga pageba mu pigi dawe?
Tiali goli, agai tigidali we bidi dali,
tigidali bulu tǫ kantri dali si tonalubo dao.
30 Te dwai bidi dabe king pedalama,
tama te we bidi dwai sę ebo
sunumidu kegasa pidali weyu,
Godigo tigidali kantri tonalubo dao,” wali.
31 “Jop, nago te nago dwai sę yali po
te Godibolo pusaliwe?
Nago te dwai kolesaga ma egobeo po agabolo waliwe?
32 ‘God, nago eno nago usu niba kadu wasiąbo kolesaga
nago enabolo ola mao,’ te po nago
agabolo hanalu waliwe?
Ma, ‘Eno dwai sę yai baso da,
teda eno te kolesaga dabe sese
tagalaibao,’ nago te po me waliwe?
33 Nago te po wai goli, Jop, nago Godigo ebo kolesaga
wei isąbaso da, teda nago homugo naga
godolo ebo sę agai emaina homu igio.
Tiali goli, naga digi dagala sulama,
mena kolesaga nagede dwagi yai da
homu ebo kolesaga dagala sao.
Te eno sę meni.
Ma, nago dwagi yai kolesaga me elaluba wida,
teda te homu kolesaga dabolo megi pusao,” wali.
34 “Te eno te po te genuai homu kolesaga yai
bidi dabego
eno te po odobo si da, teda augwaligo enabolo
e tama po waibao,
35 ‘Jop agai te page konesiąwai po olama,
tama agai po sese geda muani dao’ po waibao.
‘Agai homu kone palama, po pusubo menio,’ wagi dao.
36 Jopgo te dwai kolesaga ebo bidi
dabego po wei ponobo tiwai ebo dao.
Tama tibaso, eno homugo Godigo yaide
Jop me usu sidu genama, agai po hasegelebo si
tagalomainu yaibao.
37 Agai dwai sę yai goli, nosali ugwadu agai God dali
tobolu gagea pali.
Agai da dali olo nai dao homu eyu, po si konila eyu,
hwįanio.
Tama agai wado po hauwa mu Godiba walio,”
Elihugo te po wali.
*34:9: Te Dąį 21:7-13 tede, te Jopgo te tama po wai, Godigo te dwai kolesaga ebo bidi dabe sula tagalu gogolaibao. Te Dąį 21:15, tede Jopgo te tama po wali, te dwai kolesaga ebo bidi dabe wabo tiwai tobage po te ede te bidi Elihugo wali. Tiali goli, Elihugo Jopbolo te kisilama wali po te mu po menio. Te 21:16, tede wali pogo te tiwai yali, te Jopgo te tiwai ola mabo po wali te agai te dwai kolesaga ebo bidi hani dabe dali deli haliga me elalubeo. Menio.