1 Samson te Timna buluba dulama, tama te bulude agai te Filistia dabego gesi wegi ogwa we me deli suali. 2 Tama aga buluba ma begasa pelama, tama aga aya idabolo wagi pali, “Eno te gesi wegi ogwa we me deli te Filistia dabego bulu Timnade suali. Eno homugo nago aga oda sobaso da, te aga eno saibao,” wali.

3 Tiali goli aga aya de ida sigo agabolo te po wali, “Magi basowe? Te wegi ogwa we me deli te da Dango hani tomode meni baso, ma te dena we bidi dabe tomode me meni baso weyu, obawe? Magi baso nago te Filistia we me deli sainogo, te augwali tigi wali togobo meni dawe?”

Tiali goli Samsongo aga ayabolo wali, “Eno te we godolo mu ebao! Dagego te aga eno we siąo.” 4 Te aga aya dali ida sigo te Genuai Bidigo te Samson ola mayu, te tiwai sę ebo te konesiąwani, magi baso meni, Genuai Bidigo te Filistia dabe dali hwįabo sunumi gegebo sę yali. Te sogo te Filistia dabego te Israel dabe tonaluali. 5 Nosali Samson dali, te aga aya de ida si dali, te Timna buluba dulali. Tama Samsongo aga aya ida osogo tagalama, tama te Timna dabego wain giba sabolali. Tama polo te ogwa bidi laion me deli aselama, hwa weyu, aga gąų kela tueinu yali. 6 Tiali goli, Godigo Mobogo agaba bomo menama, tama agai te laion nogogo naga tola selama elali, te bidigo te meme wai me deli nogogo ela mubo tiwai gilama yai. Tiali goli, Samsongo te aga aya de ida sibolo te sę yali po me wabeo. 7 Tama Samson pelama, te wegi ogwa we dali po migi pali. Tama agai aga godolo mu yali.

8 Nosali dwasianu gana, Samson te we sainu ma palio. Tama aga te Timna buluba pabo sunumi tagalama, te agai te polobadu ela muani te laion sasia pai tigi sugi pali, tama suali, te genuai bunu hanigo te ganoma bunu ge tomoba mubo suai. 9 Agai te ganoma bunu meba te agai nogogo selama, tama aga tųdu peyu, te sunumi wali pai. Tama aga aya de ida si bidibo madiba sabolama, tama te bunu ge pedai augwali si menama, tama augwali sigo me tuali. Tiali goli, agai te ganoma bunu ge te laion tigide sali nai po te augwali sibolo me wasiąwai.

10 Tama aga aya pelama, te we dali po migi pelama, tama nosali Samsongo te genuai nai daa me deli te bulude ulama tuali, magi baso meni, te augwa gesi bidi dabego ebo kolesaga dao. 11 Tama te Filistia dabego te Samson subo sogo, augwaligo te gasa gesi bidi te 30 gesi bidi sigi pelama, tama augwali aga dali bidali. 12 Tama Samsongo augwalibolo te po walali, “Te eno po begelama wabo po me deli te dage dali waibao. Te dagego enabolo te po begelama wabo po te nai tuyu bidibo te a naga olama, me badu nogo si te sogo dagego te po begelali po page te enabolo obaso da, teda te eno dagebolo te pedai name ugwa te 30, me te holobo bobage ugwa te 30 te dage mawaibao,” wai. 13 “Tiali goli, dagego enabolo te po page me wabo te usu meni baso da, te dagego enabolo te pedai name ugwa te 30, me te holobo ugwa 30, te tama ena magameo,” wali.

Tama augwaligo agabolo te po wali, “Ao! Nago po begelebo po pusao! Dago odaio.”

14 Tialima, agai augwalibolo wali, “Te tubo nai te nai tubo bage me delide pedelai. Te pusu nai te bomai nai me delide pedelai.” Samsongo te po begelama wali.

Te sela sogo bidai, tiali goli augwaligo te po begelai page me konebeo. 15 Te me si me si wabo sogode augwaligo te Samsongo webolo walali, “Nago te naga bidi homu bega sabo po olama te agai dabolo te begelali po page dabolo omainao. Te meni baso da, teda dago nage dali, te nago hani dabe dali, te dago siaba ulaibao. Dage sigo da i obaso asali te dago doado bage wi sagasomainu wali dawe?” Te bidi dabego te webolo te po wai.

16 Tama tialima te Samsongo we te aga gesabidiba pelama, te gela wagi peyu, tama po wali, “Te nago ena godolo homu meni ebo! Nago wado homu naga ebao! Nago eno hanibolo te po page begelama mawai, tiali goli nago enabolo te po page wabeo,” wali.

Tama Samsongo agabolo te po wali, “Ae, tegoba, eno te ena aya idabolo me te po me wabeo! Magi baso eno nagebolo te po wa naga obawe?” 17 Te wego te tiwai gela naga odubadi, te genuai nai ulama tuyu bidali te sogo te a naga olama, me badu nogo si wali sogo usu nigi pali. Agai po hauwa mu obaso, tama te a naga olama, nogo me si wabo side, Samsongo te begelali po page agabolo walali. Tama aga pelama, te aga hanibolo wagi pai.

18 Tama te giliga dega sigilusiąbadi, te 7 wabo side, tama te hanude bidali bidi dabego te po Samsonbolo walali, “Mena naigo pusugo te bunu ge hanigo pusu ebo aiyaba elalubo dawe? Tama mena naigo bomogo te laiongo bomo aiyaba elalualiwe?”

Samsongo augwalibolo te tiwai po wali, “Te dagego eno so kibu bulmakau dali te tǫ pedegi menigi sogo da, te dagego eno begelali po page te konebo usu me igi menio.”

19 Tialima, te Genuai Bidigo Mobogo te Samsonba bomo mobaso, tama aga te Askelonba dulali. Agai te hanude bidali bidi te 30 bidi elibadi, tama augwaligo doado bage dabe dali sali. Tama agai te 30 ugwa te agai begelali po page pusali bidi dabe mani. Tama te sę pedelalide te aga haliga sębę mu elama, tama aga buluba ma begasa pai. 20 Tama augwaligo te Samsongo we te Samson dali te we sabo sogo te hai namu olama te bidali bidi me delibolo te we mawai.