10
1-2 Dage te gesi gesi bomai po mubo bage,
dage dolaibao.
Te gesi bomai pogo te po tų ebode
gasa bidi dabe aiyaba elaluama,
tama nai meni yai bidi dabego nai sainu.
Tama tiyu, te nai meni yai bidi dabe
po tų ebo sogo asobaso da, te bomai pogo augwali
tau sabo meni.
Tama augwali po tų ebode geda mubo dao.
Tama te dolo meni yai kolesagago
dagego Genuai Bidigo we bidi dabe aiyaba elaluama,
tama dagego te wilawe we dabe,
me tiana wai dabego nai dabe dagego wi sabo dao.
3 Te Godigo dagego dwai kolesaga
wei ponabo sogo bodolu muani,
te sogoba sabalobo si, dagego magi sę yaibawe?
Te agai gasa bulu me te bomai wali tiwai aselama,
dage dolomainu ebaso, dagego magi sę yaibawe?
Dage te deba udalama, dage tau somainu yaibawe?
Tama te nai dabe hauwa dagego sali,
te nai dabe dagego menade mugi paibawe?
4 Dagego magi sę me ebo usu egobeo. Mu menio.
Te boi bidi dabego dage ela wialobo,
o dage deli deli pibia sidubadi,
augwaligo dage sela pelama,
kalabusiba tagaligi pabo sę yaibao.
Genuai Bidigo sę dabe dageba pedalumainu yaibao.
Tiali goli, tego agai sębę siligobeo.
Menio. Agai nogo me balaluaibao.
Te bulu tǫ kantri Asiria dolaibao
5 “Ena Genuai Bidi, eno te po obao,
te bulu tǫ kantri Asiria dolaibao.
Megi da, te Asiria te wąbi tiwai nigilama,
tama eno we bidigo ena sębę ilibo
we bidi te elebao.
6 Te we bidi dabego ena tagalama,
tama God dologode bidisąbo bidi gagawali.
Tama augwaligo ena sębę ilali.
Tama tibaso, eno Asiria bage
taga palama, augwali elama,
tama augwaligo nai dabe selama, tama augwali
aiyaba elaluama,
agalama, tagalomainu yai dao,
te bidi dabe tǫ nagamea pai
pudu pabo tiwai emainu yai dao.”
7 “Tiali goli, Asiria tuni bidigo homu
kolesaga, eno kolesaga dali side gasa me tali.
Agai te gasa bulu hauwa me dolabo homu elalubao.
Tama augwali sese silabo homu ebo.
8-9 Agai dwai homu tali eyu, te po wali, ‘Eno bulu
hauwa me elaluama,
tama augwaligo genuai hanu dabe
eno polo sai dao,’ po wali.
‘Tama me, te tuni bidi dabe eno augwali aiyaba elaluali,
te bidi dabe augwali eno ami bidi
tomode ofisa bidi bidimainu,
eno augwali te sę mani.
Te eno te hanu dabe aiyaba elaluali
hanu dabe te Karkemis, me hanu Kalno, me Arpat,
me Hamat, me Damaskus, me Samaria, tama dao.
10 Eno te bulu dabe dolama, elama, tagalai dao.
Te bulu dabede te tibo god dabe piksa hauwa mu elalubo
hanu dabe augwaligo elaluali.
Tama augwa te tibo god dabego augwali tau sabeo.
Te tibo god dabego te Jerusalem me Samaria sigo
tibo god dabe aiyaba elaluali.
11 Eno te Samaria dabe augwa
tibo god dabe dali eno dolai dao.
Tama tibaso, eno te kolesaga tiwai te Jerusalem augwa
tibo god dabe dali me yaibao,’
te Asiria tuni bidigo te homu ebao.”
12 “Te tuni bidigo te po wali.
Tiali goli, ena Genuai Bidi eno te po obao.
Te Asiria dabe tuni bidigo eno agabolo
te bulu du Saion me Jerusalem side
yao wali sę ela silibo si da,
teda aga tigide eno sę yaibao. Magi baso meni.
Agai homugo aga genina mu dao homu elama,
tama aga nogi ugwaba mu sabo.
13 Agai tobolu tali eyu, agai te po tama wali,
‘Ena bomo de ena homu kolesaga sigo
eno te sę dabe yalio,’ po wali.
‘Magi baso meni. Eno dwagi yai
homu kolesaga mu elaluali, te sę dabe yabo.
Eno te bulu dabe dąį ilali, eno polo sela sąwani dao.
Tama tigidali ena dologode naga bidibo.
Tama eno augwaligo wiegi wiegi yai nai dabe
augwaligo sisiniduali nai dabe eno sai dao.
Ena bomai bidi mu dao.
Tama tiyu, eno te bulu we bidi dali,
me augwaligo king bidi dabe dali agalama,
tama eno augwali aiyaba mesegelai dao.
14 Te e tǫde kantri dabe tigidali te ba be tiwai dao.
Tama augwaligo wiegi yai nai dabe eno sali,
bidigo te ba ge sabo tiwai yalio.
Awe, te ba kimi dabego augwa ge dabe tagalama,
tama bidigo olo sabo tiwai gilama,
eno te kantri dabe sisinani.
Tama te ge tagalali ba kimigo
te ge sabo bidibolo hwa wasiąwai tiwai eyu,
te kantri dabego bomo elaluali
bidi dabego enabolo
tagala po me wabeo. Mu menio.’
Te tuni bidigo te po wali.”
15 “Tuni bidigo te po tama wali.
Tiali goli, ena Genuai Bidi eno hanalu waibao,
‘Te sigi hwą me deligo te po waibawe,
“Te ena genuai dao, tama bidigo nogo toulama,
nigilibo te enaduba bomogo edelalio,” po waibawe?
Te so mego “Ena te bidigo nogo toulama,
ni togobo bomo te eno edelalio,” po waibawe?
Te hwįbo ni dage dabego bidi nogo
toulama, hwįgi pabo meni.
Menio. Te bidigo te ni dage dabe nogo
toulama, hwįgi pabo dao.’ ”
Genuai Bidigo te po wali.
16 Megi da, Genuai Bidi
Tigidali Bomo Elalubo Bidigo
te Asiria dabebolo genuai gasi me deli
augwalibolo menama,
tama augwali bomo sia somainu yaibao.
Tama me ma, bidigo magi nai dolainu
sia nogebo tiwai eyu,
agai te Asiria bagego bomo me,
genuai nogi dali, mu dolaibao.
17 Genuai Bidi aga te Tigidali
Wiegi Yai Doloba Pai Kolesaga Naga Ebo God dao.
Tama aga te Israel dabego ula dao.
Tiali goli, Asiria dabe dali da, aga te isi gagalama,
augwaligo bulu isi ulaibao.
Te deli bubagade naga agai te tigidali
dwai nosai dabe isi ulaibao.
18 Tama bogi peyu, moni genuai genuai
ni dabe dela pelama,
tama gi yabo wiegi yai tǫ me dela paibao.
Genuai Bidigo Asiria dabe dolama,
tama augwali mu tama silaibao,
te gasigo bidi me deligo tigi bomo doloyu,
ela silibo tiwai yaibao.
19 Te Asiria bulude tigidali nai dabe mu silaibao,
tama deli deli ni naga dolaluaibao,
te dwasianu wai bǫų dabego me nedabo usu
nama.
Dwasianu Israel we bidi hani naga ma asaibao
20 Genuai Bidigo bodolu me polo muai
dao wali, te Israel hani dwasianu
te Jekopgo wąį tomode bidibo
hanigo i agabolo omainu.
Te Israel dabe augwali augwa boi
bidi dabede wi ebaso,
tama augwaligo gasa bulu
bidi dabego augwali tau somainu i wali.
Tama te bulu bidigo augwali tau somainu tonaluali.
Tiali goli, te bulu bidigo begelama,
augwali ma dolaibao.
Tama te sogo augwaligo te Israel dabego
Genuai Bidiba i waibao.
Aga te Wiegi Yai Doloba Pai Kolesaga
Naga Ebo God dao.
Tama augwaligo agai tau somainao
olama, tonaluaibao.
21 Tama te dwasianu Israel we bidi
bidibo dabe augwali te God
Tigidali Bomo Elalubo Bidi pageba ma asaibao. * Te Hibru pode, te po weyu “Dwasianu hani naga te ma begasa asaibao,” wai. Te tiwai po te Aisaiago wai me deli nogi wabo tiwai si yali dao. Te buku Aisaia, Dąį 7:3, tede te tiwai po elalubo suao.
22-23 Megi da, te Israel we bidi hauwa mu te bidibao,
te tamu węde kemi sane tiwai dao.
Tiali goli, augwali dolaibao,
tama dwasianu we bidi naga ma pedalaibao.
Genuai Bidi Tigidali Bomo Elalubo Bidigo te bulu sese
tama dolabo po polo wai dao.
Tama da agai dolaibao.
Tama agai doloba pai kolesaga genina
mu ma haninaibao,
tama te we bidi dabego sueibao. * Rom 9:27
Genuai Bidigo Asiria dabe dolaibao
24 God, Genuai Bidi Tigidali Bomo
Elalubo Bidigo te po wali,
“Eno we bidi dage Saionde bidibo,
dage te Asiria dabede wi igimio.
Augwaligo dage te wąbigo elama,
dage dali dwai sę ebadi me tagalao.
Te Isip bagego polobadu yali tiwai ebadi goli.
25 Megi da, eno dage Asiria dabego
dage dolomainu sula tagalobao. Magi baso meni.
Eno sębę dage dali me ebaso.
Tama tamadi tama ena ma begelama,
Asiria dabe dolaibao.
26 Ena, Genuai Bidi, Tigidali Bomo
Elalubo Bidi, eno augwali bįgo elaibao,
eno te Midian dabe te Orepgo Masigi
nogi wabo bulude dali tiwai elali.
Eno nogo ugwa selama, tama elaibao,
te polobadu eno Isip dabe
te tamu węde elali tiwai yaibao.
27 Megi da, dage te Asiria dabego
dage tonaluyu, te kau kibu
magede ni name munama,
tama sę emainu selebo tiwai te ebao.
Tama te Asiria dabe bugagia dualalubao.
Tama augwaligo te ebo kolesagago
ena sębę te ilibao.
Tama tibaso, te eno bodolu muani
sogode da, te eno te Asiria dabego
bomo silama ebode da,
te bagego dage sęgę ma mayu egobeo.
Awe, dage te boma pai hani pedalubaso,
dagego te tolobo sęgę mu tagalaibao.”
Te boi bidi dabe Jerusalemba hwį yagasainu asali
28 Te boi bidi dabe bolo hanu Aiba sabolagasali. † Te not badu boi bidi dabe aselama, te Jerusalem dolabo homu elama asiyu da, augwali asobo te taun Ai te badu suani aselama, te gasa taun dabe te nogi me badu te ves 28-32 tede nogi elalubo taun dabe sabolaibao. Magi baso meni, te taun dabe te Jerusalem pą badu te not badu elaluali.
Augwali te hanu Miklondu sa asali.
Tama augwaligo nai dabe meba
te hanu Mikmasde osogo muani.
29 Augwali aiya dulama, wę odogo nogegi pali.
Tama augwali ugwaba holama, hanu Gebaba pigi pali.
Te Rama hanu we bidi wi genuai mu eyu, midigi sali.
Tama te hanu Gibea, te tuni bidi Solgo hanu,
augwali hanu tagalama, wi pepelawali.
30 Te hanu Galim we bidi dagego i bomonama wao.
Olo saganama, odao, te Laisa be nani
we bidi, dagego odao.
Hobede mu dao, dage te hanu Anatot we bidi.
31 Te bulu Matmena we bidi,
me te hanu Gebim we bidi,
wi pepelawali, te duala sabo pesage gegegi pali.
32 Megi da, te boi bidi dabe
te hanu Nopba polo sabolali.
Augwaligo te bulu du Saionba edaba tonagasali.
Tama augwaligo nogo sugunani,
te hanu Jerusalem dolabo polo
no muanio olama, ola mobao.
33 Te agai genuai bomogo da, God,
Tigidali Bomo Elalubo Genuai Bidigo
agai te genuai bomai genuai
nogi elalubo bidi dabego nogi aiyaba elaluaibao.
Megi augwali te genuai bobobage ni dolalubo tiwai ebao.
Tiali goli, agai augwali gelama, degelaibao.
34 Tagala augwali te Lebanonde
genuai bobobage ni tiwai,
me te buside genuai bobobage ni tiwai me.
Agai augwali gelama, tǫba degelaibao.* Ais 14:24-27; Nah 1:1–3:19; Sef 2:13-15
*10:21: Te Hibru pode, te po weyu “Dwasianu hani naga te ma begasa asaibao,” wai. Te tiwai po te Aisaiago wai me deli nogi wabo tiwai si yali dao. Te buku Aisaia, Dąį 7:3, tede te tiwai po elalubo suao.
†10:28: Te not badu boi bidi dabe aselama, te Jerusalem dolabo homu elama asiyu da, augwali asobo te taun Ai te badu suani aselama, te gasa taun dabe te nogi me badu te ves 28-32 tede nogi elalubo taun dabe sabolaibao. Magi baso meni, te taun dabe te Jerusalem pą badu te not badu elaluali.
*10:34: Ais 14:24-27; Nah 1:1–3:19; Sef 2:13-15