1 Te e da, te Isogo hani wai dabe, te augwaligo Idom nogi me poali. 2 Isogo te Kenan we dabe sela sai, Ada te Elongo wegi, te Hit hani bidi me deli, tama Oholibama te Anago wegi, te Ana aga aya te Sibeon, te Hivi hani bidi me deli da, * Gag 26:34 3 tama Basemat te Ismaelgo wegi, te Nebaiotgo abe da. * Gag 28:9

4 Adago te Elifas ame nani, te Isogo wai, tama Basematgo te Ruel ame nai. 5 Tama Oholibamago te Jeus, me Jalom, me Kora, te tama ame nai. Isogo te wai dabe te Kenan tǫ tede bidibadi ame nani.

6 Nosali Isogo aga ama taga peyu, tama aga hogodama, gasa buluba me pali. Agai te aga we wai me, te aga we wai dali bidali we bidi dabe dali sobadi, tama tigidali kibu hani sibi te agai Kenande sali nai dabe tigidali selama, tama augwali pali. 7 Te Jekop de Iso augwali si bidali tǫ te augwali sigo kibu dabe pągąna selama, tama augwali si talua bidabo te usu me ebeo. Tama tibaso, Isogo Jekop taga peyu, 8 tama aga te Seir dabego bulu du dabe elalubo tǫba bidigi pali. Idom te Isogo gasa nogi me dao.

9 Te Isogo nosali pedelali hani bage augwaligo aga gasa nogi Idom sali, tama augwali te Seir bulu du dabe elalubo bulude bidaluai. Augwali e tama pedelali po megi obao. 10 Te Isogo ogwa dabe, te augwali e dao, Elifas te Isogo we te Adago ogwa da, tama Ruel te Isogo we Basematgo ogwa dao. 11 Te Elifasgo ogwa dabe, te augwali e dao, Teman, me Omar, me Sefo, me Gatam, me Kenas. 12 Timna te Isogo ogwa Elifasgo nosali sali we, tama Timnago te Amalek ame nani. Te hani ogwa dabe augwali te Isogo we Adago wąį dabe da.

13 Te Ruelgo ogwa dabe, te augwali e dao, Nahat, me Sera, me Sama, me Misa. Te e dabe te Isogo we Basematgo ogwago hani ogwa dabe da.

14 Te Isogo we Oholibama agai ogwa Jeus, me Jalam, me Kora, te tama ame nani. Te e da te Oholibamago hani ogomani dabe, te bidi Anago wegigo wai dabe. Tama Ana aga aya te Sibeon dao.

15 Te e da, te Isogo wai hani dabe augwali te tobolu bidi dabe bidali. Te Isogo gomunai ogwa te Elifasgo ogwa dabe, te augwali e dao, te tobolu bidi dabe te Teman, Omar, Sefo, Kenas, 16 Kora, Gatam, Amalek. Te augwali te Elifasgo tobolu bidi hani dabe te Idom dabe da. Augwali te we Adago hani wai puluba te wąį dabe dao.

17 Te Isogo ogwa Ruel aga wai dabe te augwali e dao, te tobolu bidi dabe augwali Nahat, Sera, Sama, Misa. Augwali te Ruelgo tobolu bidi hani te Idom dabe da. Augwali te Isogo we Basemat tego wąį te wai dabe dao.

18 Te Isogo we Oholibamago ogwa dabe te augwali e dao, te tobolu bidi te Jeus, Jalam, Kora. Oholibama te bidi Anago wegi, tama Isogo we agai te tobolu bidi dabe ame nai.

19 Te e da, te Isogo hani wai dabe, tama gasa nogi Idom, te augwaligo tobolu bidi dabe dao.

20 Te e da, te bidi nogi Seir aga ogwa dabe, aga te Hor hani me deli da. Tama te Hor hani bage augwali te Seirgo tǫ pedaide bidai. Tama Seirgo ogwa dabe te augwali e dao, Lotan, me Sobal, me Sibeon, me Ana, 21 tama me Dison, me Eser, me Disan. Te bidi dabe augwali te Hor hanigo tobolu bidi hani dabe da, tama augwali te Seirgo wai dabe te Idom pedai badu dao.

22 Lotango ogwa si elaluali, Hori me Homam. Tama te wegi Timna te Lotango abe da.

23 Te Sobalgo ogwa dabe, augwali te e dao, Alvan, me Manahat, me Ebal, me Sefo, me Onam.

24 Te Sibeongo ogwa dabe, te augwali e dao, Aia me Ana. Te bidi Anago te talua ge wę pedalubo te bidi meni yai madi pedalubo te aga aya Sibeongo kibu donki tonaluali sogo gegai dao. 25 Te Anago wai dabe, te augwali e dao, te bidi Dison, me Oholibama, te Anago wegi dao. 26 Te Disongo ogwa dabe, te augwali e dao, Hemdan, me Esban, me Itran, me Keron.

27 Te Esergo ogwa dabe, te e dao, Bilhan, me Savan, me Akan.

28 Disango ogwa si yali, Us me Aran.

29 Te e da te Hor hanigo tobolu bidi hani dabe da, Lotan, Sobal, Sibeon, Ana, 30 Dison, Eser, Disan. Augwali te Seir tǫ pedai badu te Hor hani deli deligo tobolu bidi hani dabe dao.

31 Te Israel dabe augwa hani tuni bidi king menibadi, tama te Idom bagego gavman tuni bidi king dabego te Idom pedai badu tonaluai. Augwali e tiwai pedelali.

32 Bela te Beorgo ogwago te Idom tonaluali. Te aga king sę eyu bidali hanu nogi da, te Dinhaba.

33 Te Bela isibaso, tama te Jobap, te bidi Serago ogwago, te aga te Bela tuni bidi sęde hasegelama, bidali. Bosra te bulu te Jobapgo page bulu dao.

34 Tama nosali Jobap isibaso, tama Husamgo te aga hasegelama, tama tuni bidi pedelali. Husam te Teman pedai badu bidi dao.

35 Husam isibaso, tama Hadat, te Bedatgo ogwa, te aga tuni bidi pedelali. Hadatgo te Midian hani dali te Moap tǫde boi hwįnama, tama te Midian dabe aiyaba elaluali. Avit hanu te Hadatgo king sę eyu bidali hanu dao.

36 Te Hadat isibaso, tama Samlago te agai sę hasegelama sali. Samla aga te Masreka bulu bidi.

37 Tama Samla isibaso, tama Saulgo te agai tuni bidi sę sali. Saul aga te Rehobot hanu bidi, te hanu te wę nogi Yufretis sesegede elalubo hanude bidali.

38 Saul isibaso, tama Balhanan, te Akbor tego ogwa, agai te tuni bidi sę sai.

39 Tama Balhanan te Akborgo ogwa isibaso, tama Hadatgo agai te sę selama, bidai. Pau te aga te king sę eyu bidali bulu da, tama agai te we Mehetabel sali, te we nogi Matretgo wegi da. Tama Matret te Mesahapgo wegi dao.

40-43 Te e da, te Iso hani dabe tobolu bidi dabe da, Timna, Alva, Jetet, Oholibama, Ela, Pinon, Kenas, Teman, Mipsar, Makdiel, Iram. Te augwali te Idom tobolu bidi hani dabe da. Idom te Isogo gasa nogi me, tama Iso te Idom hani nogi aga aya dao. Te augwali tigidali deli deli te augwa bulu elalubao, tama augwa hanide te augwali tobolu bidi dabe dao.