1-5 Kibu be hauwade nosali, te Artaserksis te Persia king bidali sogo, te bidi me deli Babilonde bidai, aga nogi te Esra. Esra te polobadu bidali tobolu bidi pris Arongo hani bidi dao. Te Esrago hani e tiwai elaluali. Arongo ogwa te Eleasar dao, tama Eleasargo ogwa te Finias dao, tama Finiasgo ogwa te Abisua dao, tama te Abisuago ogwa te Buki dao, tama Bukigo ogwa te Usi dao, tama Usigo ogwa te Serahia dao, tama Serahiago ogwa te Meraiot da, tama Meraiotgo ogwa te Asaria dao, tama Asariago ogwa te Amaria dao, tama Amariago ogwa te Ahitup dao, tama Ahitupgo ogwa te Sadok dao, tama Sadokgo ogwa te Salum dao, tama te bidi Salumgo ogwa te Hilkia dao, tama Hilkiago ogwa te Seraia dao, tama te bidi Seraia aga ogwa te Esra dao.

6-7 Esrago te bomai po Godigo te Israelgo Genuai Bidigo polobadu te Mosesgo nogoba mani bomai po te bugagia koneai. Te sesemane sogo Godigo Esraba wiegi yai sę bugagia yali, tama te Esrago kingba te magi nai me deli maiabo po hanalu obaso da, teda te kingo aga mawai. Te kibu be te 7 yia te Artaserksis te king bidali sogo, tialima Esrago te Babilon tagalama, te Israel we bidi dabe meba dali te Jerusalemba palio. Te hani tomode te pris dabe me, Livai dabe me, te musik wabo bidi dabe me, te tempel be sunumide polobadu tonaluali bidi hani dabe me, te Godigo bede sę ebo bidi dabe, te tama hani bidi elaluai. 8-9 Augwaligo te bulu Babilon te deli wabo polua, dei deli wabode, te taga soalio. Tama Godigo augwali tau sobaso, tama augwali te Jerusalemba te a naga polua, te 5 mun, dei deli, te sogo te Jerusalemba sabolali, magi baso meni, te digibulu mu pai dao. 10 Godigo augwali tau siyu, augwali bugagia pali, magi baso meni, Esra te Genuai Bidigo bomai pode kolesaga sabo sę bomo eyu, teba aga homugo kęą pai mu dao, tama te bomai po bugagia wali pali bidi dao. Te me ma, agai te Israel dabeba te bomai po tigidali augwaligo me wali pomainogo bugagia ola mani bidi dao.

11 Te Esra aga te Babilon tagalasiąbadi, te king Artaserksisgo te pas me deli asęnama, tama Esraba mawai, te Genuai Bidigo te Israel dabeba mani te bomai po tigidali te bidi Esrago bugagia koneai. Te pasde te tiwai po wali, 12 “Ena te king Artaserksis, ena te tigidali bulu tǫ pedai hauwago king dao. Esra, nage te dagalude bidibo Godigo tigidali bomai po page koneai bidi da, eno nageba siade da po olama, te pas nageba asęani dao. 13 Eno bomai po te ena ofisa dabe tigidaliba te tiwai po wali. Te pris dabe me, Livai me, tama te gasa Israel we bidi, te augwali megi eno tǫ pedaide bidibao, augwali te nage dali Jerusalemba pabo homu ebaso da, teda augwa pomainao. 14 Ena dali, te enaba wiegi yai homu konebo kolesaga ola mabo bidi te a naga olama, me si, te 7 bidi, dago nage tagala palama, te nago Jerusalemde bidalubo we bidi, me te Juda tǫ pedai gasa badu bidibo we bidi, te sugi pomainao wali. Nago te Godigo bomai po elalubo buku tolalubao, tama tiyu, nago te we bidi dabego te bomai po wali pabowe naga te nago sugi pao. 15 Tama ena dali, te eno kolesaga koneai bidi dabe dali, te olo maiabo nai te gol me silva te dage Israel dabego Godiba maiabo homu ebao. Tama nago te olo mabo nai dabe te Jerusalemba sela pelama, tama te Godigo beba mugi pagameo. 16 Tama me nago te Babilon tǫ pedaide sali te silva me gol tigidali sobadi, te dage Israel we bidi me, te duga pris dabego dali, te Godigo be te Jerusalemde olo maiabo homu yali nai dabe badi selasa pagameo.”

17 “Tama nago te mone olodali me sagio. Nago te kibu bulmakau dabe me, te omai kibu sipsip dabe me, te sipsip wai dabe me, te wit me wain abelama, te Godigo bede alta saide te Jerusalemde ofa yainu tama tiao. 18 Nago te ofa yabo nai dabe abelama silibo si da, teda te gol me silva meba elalubaso da, nage dali te naga deli hani bage daligo te duga Godiba hanaluama, teda agai homugo dagego te monego mena nai abelimainu homu ebo ola momainu yao. Tialima, te dagego koneama da, tama duga te nai dabe abeliąo. 19 Tama nago te augwaligo nagebolo te duga Godigo be tomode te ofa emainu mani nai, te dis pou me tigidali nai sela pelama, tama te tigidali Godigo beba muao po wai dao. 20 Tama te nai dabe te usu meni baso da, teda nago te eno mone mubo bede te mone meba selama, tama nage te sǫą pali nai meba abelao,” po wai.

21 “Ena king Artaserksis, eno te bomai po te eno mone te wę Yufretis tǫ pedaide te eno mone tonalubo ofisa bidi dabebolo te po ola tolobao. Eno po e tiwai dao, ‘Te pris Esrago te bomai po te dagalu tonalubo Godigo po te skul bugagia mu elama konea pai bidi dao. Tama agai dageba te aga Godigo bede sę yabo magi nai me deli sabo po hanalu obaso da, teda polo tama te dagego aga maiąo. 22 Tiali goli, dagego te mabo nai dabego te dąį me edeligio. Silvago sęgęgo te 3,400 kilo edeligio, tama witgo te 500 bek ela pigio, tama waingo te 2,000 lita, me te oliv ni du welgo me te 2,000 lita ela pigio,’ te po wai. ‘Tiali goli dagego te tamu aga homugo wei ebo usu nama maiąo,’ walio. 23 ‘Dagego Esrabolo te dagalude bidibo Godigo agai bede muabo wei homu ebo nai tigidali maiąo. Tiyu, dagego te sisinibo doado bage tigidali te pesage genuai mu igulubaso, tama te Godigo enaba haliga sębę eyu, me te eno wai dabe te nosali king pedalubode me te sębę elaluidalio. 24 Tama odao, dagego te pris bidi dabede me, te Livai bidi dabede me, te musik wabo bidi dabede me, te tempel be sunumide tonalubo bidi me, te sę ebo bidi dabe, te augwali te tama bidi dabede te dagego haniani takis mone me selamu dao, tama te Godigo bede te sę ebo gasa bidi dabede me te takis sigio,’ eno te po wali.”

25 “Tama Esra, odao. Nago Godigo nageba te homu kolesaga hauwa mu mani, tama tiyu nago te kiap dabe nigiliyu, tama te tigidali we bidigo po tų dodolobo bidi dabe dali, te jas bidi te Godigo tigidali bomai po tonaluabo bidi dabe nigilama, tama te wę Yufretis u badu tǫ pedaide bidimainu yao. Tama dage we bidi mebago te Godigo bomai po konesiąbaso da, teda nago augwali bugagia ola mayu, te augwaligo me wali pomainao. 26 Te bidi me deligo te nago Godigo bomai po wali me pisąbaso da, ma te king Artaserksis eno bomai po me wali pisąyu ebaso da, teda nago mena dene mabo sę te polo tama agade yao. Nago aga ela muyu, me ma aga te gasa bulu tǫ pedaiba ela gudulao, ma agai doado bage siyu, ma aga kalabus me ilao. Te agaba dene mabo kolesaga te aga yali dwai sęde usu nama tama tiao,” te king bidigo Esrabolo te pasgo te po wai dao.

27 Ena Esra dao, * Esra aga digi te Dąį 7:27–9:15 elalubo po asęani, tama gasa bidigo te gasa sapta dabe asęai dao. eno te pas nedelama, tama eno e tiwai po obao, “Eno homu wiegi yai pemene eyu, tama Godiba usu da po obao, te dago wąį nǫų dabego Genuai Bidi dao. Magi baso meni, Godigo te kingo homu hodolobaso, tama kingo te Genuai Bidigo be Jerusalemde dwagi yai ilaibao po walio. 28 Godigo olo mu tau mabo kolesaga enabolo elama, tama agai te king dali, te aga wiegi yai homu kolesaga mabo bidi dali, te aga polalubo ofisa bidi dabe daligo, te augwaligo ena tau sainu homu yali. God dena Genuai Bidigo enabolo bomo menama, tama eno te augwali te Israel tobolu bidi dabe dali te Jerusalemba pabo po hanalu obaso, augwaligo te eno te pode usu da po walio.” Ena Esra eno te po obao.