1 Te kolesaga page mu konea pali bidigo naga te mena ebo page mu koneaibao. Tialima, dego mu te kolesaga page mu koneai bidi aiyaba elalueibawe? Te bidigo gesabi hulia sobaso da, teda wiegi yai homu kolesaga igulubaso, te aga gesabidi ula ma ebo dao.

2 Eno te tama po obao, nago te kingo po wali pao. Nago te Godigo gedude te bomai po dąų waliyu, nago te kingo wabo po wali paibao po wai dao. Nago te bomai po dąų wali te homu kone palama, tama nago te kingo po me sela sąnamu dao. 3 Nage te king dali bidibaso da, teda nago asesa polo te king tagaligio. Te nago king dali po konila obaso da, teda nago bomo elama mu wagio, magi baso meni, king aga digi aga homu wali pabo dao. 4 Te kingo mena po me obaso da, teda tigidali bidigo te po wali pabo dao. Te niwai bidi deligo agabolo me hanalugobeo, “Magi baso nago te tiwai yaibawe?” te wagobeo. 5 Te kingo po tigidali wali pabo bidi yaibaso, te aga bugagia bidaibao, me tede te konea pai bidi mugo te magi sę yabo sogo bodolu munama, te sę yabo sunumi konealueibao. 6 Magi baso meni. Te da bidi dabego sęgę genuai mu pedelali digi tagalao, te tigidali sę dodolabo sogo dąį ilali elalubao. 7 Te mena sę nosali pedelabo dago konebeo. Te sę dabe yaibao po mena bidigo dabolo me wagobeo. 8 Te isibo sogo, te dago tigide homu ogwa wai tomode bidali mobo bidi tagalainu ebaso, te dago palibaso, usu egobeo. Te dago isibo sogo bodolu hasegelainu ebaso, usu egobeo. Te hwįbo sogo, te ami tobolu bidi ofisa bidigo te aga ami bidi dabego te boi hwįbo pesage tagalama, te augwa buluba ma begasa pomainu sula tagalogobeo. Te tiwai me, te bidi mego dwai kolesaga wali pobaso da, teda aga te kolesagaba mu dagana selama, te tagalainu ebaso, usu me egobeo.

9 Te we bidi augwaligo te tobage sę tigidali te tǫde ebo sogo eno sulama, te sogo eno homu kone palobo sę yai. Te sogo eno suali, te genuai bidi dabego te gasa we bidi dabe aiyaba elalubo sę ebo suali. Tama te dwai sę ebogo augwa digi aiyaba elaluali, te me eno suai dao. 10 Me sogo te bidi dabe augwaligo te dwai bidi me deli isali te gų pageba pubaligi pabo eno suali. Tama te we bidi augwa te gų page tagalama, te dwai bidigo dwai kolesaga eyu bidali taunba ma begasa asali. Te augwali aselabo sogo, te we bidi augwaligo te dwai sę yali bidi nogi ugaba sali. Te tama tebo kolesaga me aga page meni yai elalubao.

11 Me sogo te bidi me deligo dwai sę elama, tama augwaligo agade po tų elama, te agaba mabo dene po dodolama elalubao. Tiali goli, augwaligo sesabi elama, te dene agaba mabeo, aga olo bidali. Tama tibaso, te tama tebo sęgo te we bidi dabe augwali homu hodolama, te augwaligo dwai kolesaga ebo bomo elama yaibao. 12 Me sogo te dwai sęgę sabo sę ebo bidi dabego te dwai sę hauwa yali, tiali goli augwali bobobage sogo sesabi elama, te tǫde bidu, te augwali polo me isibeo. Eno koneani, te bidi dabego te tama po waibao, “Te God dologoba bidigi pali bidi, te bugagia bidibo dao,” po wabo dao. 13 “Te dwai kolesaga ebo bidi da, te aga bugagia me bidigobeo. Te aga pęwadage sogo naga te tǫde bidaibao, magi baso meni, aga te God dologoba pelama bidibeo.” 14 Mu tama, augwaligo te tama po wabo dao, tiali goli eno suali, te gasa kolesaga pedalubo eno suali, te augwaligo po wali tiwai gilama pedalubeo, tama te kolesaga mu geda muani. Me sogo te doloba pai kolesaga ebo bidi te dwai dene sali, te dwai bidi dabego sabo sę usu te doloba pai bidigo saibao. Tialima, te dwai sę ebo bidi dabego te doloba pai bidi dabego sabo sę usu te augwaligo sali. Te tama tebo kolesaga te aga page meni yai elalubo dao.

15 Tialima, eno homugo te wiegi yai da homu ebaso, te dago wiegi yai pemene ebo kolesaga wali pabo homu ebao. Te dago wali pabo gasa wiegi yai sunumi me elalubeo. Tibaso, dago te nai me ąį tuyu, te nai dabede dago wiegi yai pemene inao. Mu tama, dago sę ebo sę dene mu yali, tialima dago te pemene ebo kolesaga wali peyu, te tigidali side Godigo da e tǫde bidimainu sula tagalali sogo, te dago wiegi yai pemene inao.

16 Eno te wiegi yai homu kolesaga sabo sę bomo eyu, te tobage sę dabe te bidi dabego te giligade me hulide ebo sueinu yalio. 17 Tama eno te Godigo yali sę tigidali sulama, te eno koneai, dago e tǫde pedelali nai dabe page gegainu yali usu isąwani. Te dago sągą dili budulama, te dago gegelama suabo sę dene yali digi, tagalao, dago usu egobeo. Te homu kolesaga konea pali bidi dabego po weyu, augwaligo te nai dabego page konea pali po obaso, te tagalao, augwaligo te mu po me wabeo. Augwaligo me te page koneainu gegebo usu meni ebo dao.