3
Godigo te tigidali sę yabo sogo bodolu muai dao
1 Tigidali nai e tǫde pedelama elalubo, te aga bodolu muani sogode digi pedalu ebo dao. Awe, te tigidali haniani sę deli deli te dolo si kadu walio.
2 Godigo bidi da e tǫde ame nabo sogo
bodolu dąį muani,
te isabo sogo bodolu me muanio.
Agai te nai wai bulabo sogo bodolu dąį ilibadi,
te nai gudabo sogo me bodolu muai dao.
3 Agai te bidi ela muabo sogo bodolu mubadi,
agai gasi ebo bidi ma usu ilabo sogo bodolu mubadi yali.
Agai te nai dabe hųgiabo sogo bodolu muyu,
te nai dabe nigabo sogo bodolu muyu yai dao.
4 Agai te gela wabo sogo muyu, te gisugu wabo sogo
bodolu muyu yali.
Agai te hobede yabo sogo muyu,
te tęąbi po wabo sogo muyu yalio.
5 Agai te dago te masigi dabe
sela sąbo sogo bodolu muyu,
me te masigi dabe dago deliba
sisinabo sogo bodolu muyu yai dao.
Agai te bidigo aga we dali pagela
piabo sogo bodolu muyu, te we dali pagela
pisąbo sogo bodolu muyu yai dao.
6 Agai te nai hagawai gegabo sogo bodolu muyu,
te hagawai nai tagalabo sogo bodolu muyu yali.
Agai te nai doado bage bugagia
muabo sogo bodolu mubadi,
te nai dabe sela sąbo sogo bodolu muai dao.
7 Agai te ugwa pisą yabo sogo bodolu muyu,
te hobolabo sogo muyu yali.
Agai te bidi dago pedauwali panibo sogo muyu,
te po wabo sogo mubadi yai dao.
8 Agai te bidi dago gasa bidi
godolo mu yabo sogo bodolu muyu,
te bidi dago gasa bidi hasi godolo menisąbo sogo
bodolu muyu yali.
Agai te hwiąbo sogo muyu,
te bugagia bidabo boi pibo sogo bodolu muyu yalio.
9 Te sę ebo bidi dabe, augwaligo te mena wiegi yai nai dabe augwa te ebo sęde sabo dawe? 10 Te tobage sęgę tigidali Godigo dabolo mubo eno mu konea palio. 11 Godigo digi te tigidali nai pedelabo sogo bodolu muani, tama augwali te wiegi yai sogo bodolu muanide mu pedelaibao. Tama me agai dago homu hodolama, tama dago te polobadu pedelali nai dabe konemai da homu eyu, tama te nosali pedelabo nai me konemainu homu eyu tama tiali. Tiali goli, Godigo aga polobadu digi ela pali sę tigidali te nosaliba mu usu nama, te dago mu konemainu ebo sę ebeo. 12 Eno te naide homu kone palama, tama eno koneani, te uganu ela holobo kolesaga me deli elalubao. Te kolesaga e tiwai dao. Dago wiegi yai pemene eyu, te wiegi yai kolesaga da e tǫde bidadubadi ebaso, te usu yaibao. 13 Tama me, dago nai me ąį me tuyu, te dago ebo sę tigidalide wiegi yai homu pemene emainao. Te Godigo dabolo te tobage wiegi yai homu pemene ilibo sę dabolo mabo dao. 14 Eno koneanio, te Godigo kolesaga me hasegeligobeo. Menio. Te sesemane sogo elalua pidu, elalua paibao. Niwai bidi me deligo kolesaga te Godigo kolesaga dabeba wadolobaso, usu me egobeo. Te niwai bidi me deligo te Godigo kolesaga me hųgią sąyu, sela sągobeo. Godigo te tiwai sę yali, te we bidi dabe augwali agade wi eyu, aga dologode naga bidimainu yai dao.
15 Te megi pedalubo nai tigidali,
augwali te polobadu pedelalio.
Te nosali pedelabo nai tigidali,
augwali me polobadu pedalali.
Godigo te polobadu pedelali nai tigidali
te me tama elalua pomainogo iligobeo. Menio.
Agai te nai dabe ma holomainu ilibo sę ma ebo dao.
Te we bidi augwaligo kolesaga dolo me ebeo
16 Eno te tǫde gasa kolesaga me elalubo suali. Te wiegi yai doloba pai kolesaga wali pabo sę elalubo bidi dabe, augwaligo te kolesaga wali ma pabo meni. Menio. Augwaligo dwai kolesaga mu wali pabo dao.
17 Eno tede te tama homu yalio,
te Godigo we bidi dabe augwali po tų ilibo sogo,
agai te doloba pai kolesaga tigidali yali bidi dabe,
me dwai kolesaga yali bidi dabe
dagalobo sogo dąį ilali elalubao.
Magi baso meni, te tigidali sę yabo si te elalubao,
te tigidali yali kolesaga
ma dodolobo sogo me elalubao.
18 Tama me eno te tama homu yali, te da bidi dabe da, Godigo da usu siyu, dabolo te tiwai ola mobao, da bidi dabe te kibu hasa dabe tobage tiwai si naga elalubao. 19 Magi baso meni, da bidi silibo te hasa dabe tiwai si ebao. Te hasa dabe isaibao, te da bidi me isaibao. Bidi me, hasa me, te mobo kekebo da, te tama tebo te si dali sigo bidibo ula elalubao. Tibaso, te bidigo bidibo ulago te hasago bidibo ula aiyaba me elalugobeo. Menio. Augwali sigo bidibo ula te olo nai tiwai si tiwai dao. 20 Godigo tǫ selama, augwali si nigali, tialima augwali si isibo si da, te augwali si tǫ tiwai ma pedelaibao. 21 Bidi mebago homugo te bidigo noma mobo te ugwaba holobo homu, te hasa dabego mobo noma te tǫba aiyaba dulubao homu ebao. Tialima, dego mu te sę page koneabo usu yaibawe? 22 Tama tibaso, eno te tama sęde homu kone palama, eno koneani, te kolesaga me deligo uganu igulai mu elalubao. Te kolesaga e tiwai elalubao. Te da isibo si, te nosali e tǫde pedalubo sę te dago konegobeo. Tama tibaso, dago megi ebo sę tigidalide wiegi yai homu pemene inao. Magi baso meni, Godigo dago te sę emainu bodolu muai dao.