1 Te sogo, Stiven isali sogode, augwaligo Jisas wali pabo we bidi elebo sę gagalali, te Jerusalemde. Te tebo sę genuagi mu yali. Tama Jisas wali pabo we bidi tigidali te Judia tǫ, Samaria tǫ te bulu siba wi tedela pali. Tiali goli, te Jisasgo tagala palai bidi dabe wi pabe. 2 Tama Jisas wali bugagia pabo bidi me badu augwaligo moni homu dene mu elama, diligi aselama, moni gela olama, Stiven pubaligi pali. 3 Tiali goli, Sol agai homugo te Jisas wali pabo we bidi tigidali eno ela silaibao, te homu yai. Tama agai te be deli deliba pelama, Jisasgo po wali pabo we bidi tigidali naga agai augwali nogo aligabo dunama, kalabus beba mugi pali, we dabe me, bidi dabe me.

4 Te Jisas wali pabo we bidi augwali wi pelama, tigidali buluba tedela pelama, bidada pali. Tede augwaligo Jisasgo po pusa mani. 5 Me bidi nogi Filip, agai te Samaria buluba dulama, tama agai te we bidi dabebolo te po wai, “Te Jisas da, Godigo we bidi tau somainu sa muai bidi Krais dao,” te po wai. 6 We bidi hauwa augwaligo Filipgo po bugagia odali. Augwaligo agai wali po odama, agai we bidi noma sabo bomai sę ebo me suali. 7 Tama dwai haubo mobo dabe we bidi hauwa tudi badu polobadu aselama, dagą yagaselama elalu tede bidibadi, tama Filipgo po obaso, te dwai mobo haubo dabe te we bidide bidali taga peyu, moni hwą mu wai. Me badu sągą isai we bidi Filipgo ma dwagi yai ilali, sągą dwai we bidi me. 8 Tama tibaso, te Samaria dabe bugai homu mu yali.

9 Te Samaria bulude te bidi me deli nogi Saimon bidali. Agai tede bobobage sogo bidu, dwai pobi wabo sę elama, te Samaria we bidi noma mu sabo sę yali. Agai te po wai, “Ena da, genuai bidi mu dao,” po wali. 10 Samaria we bidi tigidali, te genuai bidi me, te olo we bidi me, augwaligo Saimongo wali po bugagia odali. Tama augwaligo te bidi nogi weyu, “Te bidi agai Godigo mawai bomo gagawai mu elalubao,” wali. Augwaligo “Te bomo nogi Genuai Bomo te bidide elalubo dao,” wali. 11 Bobobage sogo te bidi agai pobi wabo pogo te we bidi dabe noma sobaso, augwaligo agai po wabo bugagia olo munama, odalio.

12 Tiali goli, Filipgo te Godigo we bidi tonalubo sęde dwagi yai po olama, te we bidibolo te Jisas Kraisde po me wali. Tama te po odama, te we bidi augwaligo te poba augwa homu tigidali munama, Filipgo augwali baptais mani, we dabe sibi me, bidi dabe me. 13 Saimongo te Filipgo poba aga homu munama, tama Filipgo aga baptais mawai. Tama baptais menama, tama te Saimon te Filip wali pai. Agai te Filipgo we bidi noma sabo bomai sę mu ebo sulama, agai noma sai.

14 Te Samaria we bidigo Godigo po bugagia odobo po te Jisasgo tagala palai bidi dabego odali, Jerusalemde. Tama tibaso, augwaligo Pita dali Jon si te Samaria we bidi pageba tagala palai. 15 Te bidi si sabolama, augwali sigo Godibolo po hanalu wali, te we bidi augwaligo Godigo Dwagi Yai Mobo Bidi somainu yali. Godigo Dwagi Yai Mobo Bidi augwaliba polobadu asobeo. 16 Tama tega augwali sigo koneai, augwaligo Jisasgo nogide naga baptais sai dao. 17 Tama tibaso, Pita dali Jon sigo Godibolo po hanalu wali, Godigo Dwagi Yai Mobo augwaligo homuba asomai hagede. Tama augwali sigo nogo te tigidali we bidi toboluba muani. Augwali Jisasgo hani tama tibo sogo augwaligo Godigo Dwagi Yai Mobo Bidi sali.

18 Te tama tibo sogo, te bidi Saimon agai Jisasgo tagala palai bidi sigo tigidali we bidi toboluba nogo mubo suali, tama Godigo Dwagi Yai Mobo Bidi augwaliba asali. Agai masigi selasa asama, tega side te bomo abelai hagede yali, 19 te po wai, “Te mone ge sao. Eno homugo te eno te Godigo Mobo Bidi sabo bomo dage side eno abelaibao. Tama eno me we bidi toboluba nogo munama, augwaligo Godigo Dwagi Yai Mobo Bidi saibao,” te po wai. 20 Tiali goli, Pitago te po wei ponoyu, te po wai, “Te Godigo olo mabo bomo te nago masigigo abelai hagede, nage dali nago masigi dali si te moni isiba paibao. 21 Godigo gedude nago homu dolo meni baso, te nage da dali te sęde me bidigobeo. 22 Tama te dwai sę ebo homu begelao. Begelama, tudiba muao. Tama nago Godibolo gedu haluasa po wao, agai nago te kolesaga ebo sela sąmainu yao. 23 Eno nago homu sualio. Nago e sę pesabo kolesagago nago homu dolo mu menio. Tama nago homu damua pabo homu tiwai elalubo. Naga dwai kolesaga ebogo nago dwagi yai kolesaga yaga wali kalabus elalubo,” Pitago te po wai.

24 Te bidi Saimon agai Pita dali Jon sibolo te po wai, “Dage sigo Genuai Bidibolo po wao, ena tau somainu, nago wali po ena pageba aselama, ena dolidali,” te po wai.

25 Te Pita dali Jon dali sigo augwalibolo te Godigo sę yai po pusa menama, te Genuai Bidigo po me olama, augwali si Jerusalemba ma geasa pali. Tama tomode augwali si peyu, Godigo dwagi yai po te Samaria bulu hauwade pususu pali.

26 Te Godigo ensel bidi me deligo Filipbolo te po wai, “Nage sisi elama, te saut eba pedai badu soao, te Jerusalem pabo tų tagalama, te bulu nogi Gasa teba pabo tųba pao,” te po wai. Te pabo tų te kemi tǫ naga bega palai elalubo bulu da. Te sunumi te bidi meni yai badu elalubao. Tama tibaso, Filip aga sisi elama, polo pali. 27-28 Tama te tųdu te Itiopia bulu kantri moni nogi yai bidi me deli te hos dabego kegebo karis nai tedu asali. Tama te bidi agai Itiopia genuai gavman we kwin Kandasigo masigi tonalubo sę ebo tobolu bidi dao. Te bidi aga tigide nai domoge diąsąwai bidi da. Te bidi aga Jerusalemba Godigo po odagasai. Tama megi aga buluba ma pai hagede, kibu hosgo kegebo bidi dulalubo karisde bidibo. Tama agai pobadi, Godigo polobadu po pusa mani bidi Aisaiago asęai po elalubo buku agai nedada pali. 29 Tama Godigo Dwagi Yai Mobo Bidigo te Filipbolo te po wai, “Nage te kibu hos kegasa pabo te bidi dulalubo karis pąba pelama, bidao.” 30 Tialima te bidi Filip udulama, pąba pali. Te bidigo te Godigo po pusa mani bidi Aisaiago po asęai buku nedada pabo odali. Tama agai hanalu wali, “Nage te nedebo po page nago koneaniwe?” wali. 31 Tama te gavman bidigo te po wei ponai, “Tama tiali bidigo enabolo te po page ola masiąyu da, eno konegobeo. Tama nage te karisba holama, ena dali dugayagasao,” te po wali.

32 Te bidigo te bukude nedebo po Filipgo koneama, tama dao, te po wai,

34 Te Itiopia bulu gavman bidi agai Filipbolo te po wai, “Te bidi Aisaia aga homugo te po aga digide waliwe, ma mena bidide waliwe? Te po page enabolo wao.” 35 Filipgo agabolo te aga bukude nedali po page bugagia pusa mobadi, tama agai Jisasde dwagi yai po agabolo pusa manio. 36 Tama augwali si te tųdu pobadi, te gavman bidigo ąį sulama, te po wali, “Te ąį ede elalubo. Ena magi baso baptais sogobewe?” te po wai. 37 Filipgo agabolo te po wai, “Jisasba nago homu kolesaga tigidali agaba muyu da, teda eno nage baptais mawaiba,” te po wai. Te bidigo te po wai, “Eno te Jisas Krais da te Godigo ogwa eno mu konealubo homu ebao.” 38 Tama te gavman bidigo i olama, te po wai, te kibu hos kekasa pabo sai guni tolasa pabo bidibolo, “Tama dolaluao,” wali. Augwali si tǫba dulama, tama ąį tomoba pelama, tama Filipgo aga baptais mawai. 39 Augwali si te ąį taga solama, buluba hola sobadi, Godigo Dwagi Yai Mobo Bidigo Filip polo te gasa buluba selasa pali. Tama te gavman bidigo aga ma sube. Tama aga buluba pabo tųdu peyu, bugai homu yali. 40 Filip te Asdot buluba polo sabolali. Agai te Asdot bulu taga pelama, te be nani tigidali bilama, Godigo gesi dwagi yai po pususu bilali, te Sisaria be naniba sabolali.