1 Te Solomon aga sę bidi dabe dali augwaligo Genuai Bidigo tempel be sę ela silama, tama nosali Solomon aga be mu sę yani. Te sę dabe sese tama augwaligo kibu be bidi sese deli, te 20 kibu be tama augwaligo te sę yali. 2 Tama Solomongo te be side sę silibo si, teda agai te king Hiramgo agabolo mani te hanu dabe geselebo sę ma yali. Tama agai te Israel dabe meba te hanude bidimainu tagala palali. 3 Tama megi da aga ami bidi dabe selama, augwali te hanu Hamatba me Sobaba hwįgi pelama, augwali aiyaba elaluama, te hanu si sali. 4 Tama agai hanu me te wa pai bulu Tatmorde me geselali. Tama te hanu te distrik Hamatde agai bakstua dabe elaluali. 5 Tama me Solomongo hanu Bethoron Ugwadu geseliyu, me hanu Bethoron Aiyadu geseliyu yali. Agai bomai obo te hanu si bagulama yali. Tama me agai ain ba te hanu siba pabo sunumi palibo nai geselali. 6 Tama agai hanu Balat me geselali, me agai bakstua dabe elalubo madi me geselali, tama me agai boi hwįabo karis dabe muabo hanu dabe me geselali, me te hos kibu tagalabo hanu dabe me geselali. Tama agai meba nai dabe Jerusalem geselainu homu yali nai dabe geselali, te Lebanon me te agai tonalubo bulude dabe ela silali.

7 Te kantri Israelde te gasa bulu we bidi me bidali. Te augwali te Hit hani, me Amor hani, me Peres hani, me Hivi hani, me Jebus hani augwali dao. 8 Polobadu mu te Israel dabe augwaligo augwali hani te hauwa mu elai dao. Tiali goli augwaligo augwali mu silai menio. Tialima Solomongo augwali selama, tama augwali aga olo sę bidi dabe nigilali. Tama megi me augwali olo sę ebo bidi dabe bidibao. * Te “megi” wabo po page da, te augwaligo polobadu e buku asęani sogode obao. 9 Tiali goli Israel hani mude Solomongo te bidi me selama, agai olo sę ebo bidi me nigilibeo. Mu menio. Agai augwali te aga ami sę dabe me ofisa sę dabe somainogo sula tagalali. Tama mebago te karisde dualama te hwįgi pabo te tonalubo ofisa bidi nigiyu, meba te hos kibude dualama hwįgi pabo ami bidi dabe tonalubo ofisa bidi nigiyu tama yali. 10 Te bidi dabe tonalubo bos bidi dabe te 250 bidi tama bidi dabe elaluali.

11 Solomongo Isip king bidigo wegi sai dao. Tama agai te we te Devitgo hanude bidali. Tiali goli Solomongo te po wali, “Eno we te Devitgo bede bidamo dao,” po wali, “te Israel dabego kingo bede. Magi baso meni, polobadu Godigo Dąų Wali Bomai Po Munalubo Halobage te pesagede munaluai da weyu. Tama te halobage munaluali pesage te habu selai mu elaluai dao,” te po wali. Tama tibaso, Solomongo aga wego gesi be me sęnama, tama aga te we te beba odasa pelama, tama aga te beba bidigi pali.

12 Te Solomon aga te Genuai Bidigo tempel be elalubo pesageba pelama, tama agai te alta elaluboba pelama,, tama agai tede te isigo mu dela silibo ofa igi peyu yali. 13 Agai te ofa tigidali sogo mu iyu iduali, te Mosesgo wali gilama tiali. Tama me agai te Sabat side dabe me ofa iyu, me te genuai sogo dabe me ofa iyu, me gesi polua nanobo side me ofa iyu, me tigidali kibu bede sela sogo genuai side me ofa iyu yali. Te da te Yis Meni Yai Bret Ulubo Genuai Sogo, me Wiegi Yai Homu Ebo te Gide Nai Dabe Sabo Sogo, me te Osogo Bidabo Bede Bidibo Genuai Sogo me. * Sai 23:14-17; 34:22-23; Nam 28:9-16; Bom 16:16 14 Solomongo aga aya Devitgo bomai po dabe me gasa po dabe wali pali, te Godigo sę bidigo po. Tama agai pris bidi dabe deli deli haniba dobayali, te sę tigidali sogo emainogo. Tama agai te Livai dabe te deli deli haniba dobayali, te pris dabe tau selama, te sę emainogo, tama me te Godigo nogi ugwaba sabo tęąbi po me weyu emainu yali. Te Livai dabego augwalibolo emainu deli deli sogo sa muani sę naga ebo dao. Tama me Solomongo deli deli haniba bidi tonaluabo bidi dobayali, te Genuai Bidigo tempel be sunumide tonaluyu emainogo yali. 15 Te pris dabe me Livai dabego Devitgo augwalibolo mena sę emainu wali po tigidali dolo tama wali peyu yali. Tama me augwaligo mone dabe mubo be tonalubo kolesaga dabe po ola mani me augwaligo wali pali.

16 Te Genuai Bidigo tempel be sę eyu, Solomongo genuai sę mu yali. Hasia aga sę bidi dabego genuai masigi dabe dodobage dodolama elaluali. Augwaligo te sę ela pidubadi te gagaloboba usu nigi pali, tama te sę me ela pidubadi te be sę mu siligi pabo si tagalali. Megi da, Solomongo Genuai Bidigo tempel be sę mu siligi pali. Tama te be sawi yai mu pedelali.

17 Tama nosali Solomon te hanu Esiongeber me taun Elatba pali. Te hanu si te kantri Idomde elaluali, te tamu ąį Retsi wabo te bulu nabis badu elaluali, te u badu Akababa polo badu. 18 Tama king Hiram te Tair bidigo aga sip meba dabe me wiegi yai boskru dabe selama, king Solomon bidibo madi tagala palali. Augwaligo Solomongo sę bidi dabe selama, kantri Ofirba odasa pali, tama tede dobu ebo sę eyu, gol hauwa selama, Solomon bidibo madi ma sesali. Te golgo sęgę te pąde 16 ton dao.