1 Ama dedeo, te Godigo po odobo we bidi hani dabe te Masedonia moni tǫ tomode te haniani bulude elalubao. Tama dago homugo dagego koneao, te Godigo olo tau sabo wiegi yai kolesagago augwali tomode yali sę, te dagego koneao. E tiwai dao. 2 Genuai sęgę augwaliba pedalama, tama tego augwali homu usu sabo sę mu yali. Tama te sogo augwali magi nai meni yai mu bidali. Tiali goli magigo meni homu elama, augwaligo wiegi yai homu pemene genuai mu dali elaluali. Tama tiyu, augwaligo te gasa Godigo po odobo we bidi tau sabo homu mu genuai elama, tama augwaligo masigi hauwa sisinai dao. 3 Eno koneama tama eno po hanilama obao: augwaligo augwa digi homu kolesaga wali pelama tama te masigi muani. Augwaligo maiabo nai usu selama, tama te tiwai augwaligo mawai. Awe, augwaligo te maiabo masigi aiyaba elaluama tama umabo mu madu geai. 4 Augwaligo te dago usu da po omainogo bomo mu elama augwaligo me te Godigo po odobo gasa we bidi dabe dali hodobo augwaligo augwa masigigo te Godigo Juda we bidi olo tau sabo sę yaio po bomonama wali. * Rom 15:26 5 Polobadu dago augwalide tama tiwai homu yali, ‘Te augwaligo mone meba mawaibao,’ wai. Tiali goli augwaligo te tiwai naga me ebeo. Menio. Hasia bolo augwa bolo augwa digi te dago Genuai Bidibolo menama, tama augwaligo te Godigo homu wali pelama, tama augwa digi dabolo me mawai dao. Tama elama tama augwaligo augwa tau sabo masigi me mawai dao. 6 Polobadu Taitusgo te Juda bage olo tau sabo wiegi yai kolesaga ebo sę dage tomode hodolali. Tama te Masedonia we bidi augwaligo genuai olo tau sabo sę ebaso, dago bomo eyu agai dage tau siyu, tama dagego duga tau sabo sę silimainogo ebao. 7 Te tigidali sęde dagego kolesaga wiegi yai mu ebo dao. Dagego homude Kraisde konealubo po dąų olama, tama dagego te konealubo po hanilama pusubo sę bomo ebo dao. Dagego kolesaga hauwa koneama, tama dagego Godigo sę yabo homu mu hodaluali. Dagego da dali dwagi yai homu eyu godolo ebo kolesaga, tede me dagego bugagia mu yali dao. Tialima te tiwai naga megi dagego te gasa we bidi olo tau sabo wiegi yai kolesaga ebo sę me bugagia mu yao.

8 E tau sabo sęde eno bomai po dagebolo me mabo meni. Te menio. Eno dagebolo te meba bidi dabe augwaligo te wiegi yai sę yabo homu hodaluali po obao, tama te kolesagade eno dagego ama dabe dali dwagi yai homu eyu godolo ebo kolesaga usu sobao. Te dago koneainogo, te dagego te we bidi godolo ebo kolesaga te nai mu dao. 9 Magi baso meni. Dagego te dago Genuai Bidi Jisas Kraisgo olo tau sabo wiegi yai kolesaga ebo sę koneai. Aga God dali hodobo bidiyu, tama genuai nogi dali, bomo yai ula dali si umabo elalubadi, tiali goli agai dage tau somainogo eyu tama aga magi nai meni yai bidi pedalali. Tama aga te magi nai meni yai bidi tiwai pedalaligo te dagebolo te God dali bidiyu bomo yai ula umabo sabo tų dawai dao.

10 Te tau siyu maiabo masigi, tede eno yali homu megi eno dagebolo pusubao: te hasia bidali kibu bede dagego te sę yabo homu godolo naga hasia yai dao, tama te Masedonia tǫde bidibo we bidi augwaligo nosali te sę yabo homu yai. 11 Teda te sę megi tama dagego ela sili yao. Polobadu dagego te sę yabo godolo polo yali, tama tiwai yali gilama megi me dagego te sę polo silao, te duga nai usu nama te mone gego tiao. 12 Magi baso meni. Te bidigo godolo mu elama nai maiabo homu ebaso da, teda Godigo te kolesaga godolo mu yaibao. Godigo te bidigo elalubo nai tigidalide homu koneama, tama agai kolesaga tede dagalaibao. Agai te aga elalusiąbo naide me dagalogobeo.

13 Te Juda bage tau siyu, tama dagego duga mone hauwa mayu, tama augwali bugagia bidiyu, tiali goli dage sǫą peyu emainogo eno te homu ebeo. Te menio. Eno homugo dage bidibo tigidali ususu si naga elama bidimainogo homu ebo dao. 14 Megi e sogo dagego nai hauwago te nai sǫą pali we bidi usu numainogo yaibao. Tama nosali me sogo dage nai sǫą pelama tama te Juda dabe augwaligo nai hauwa elalubaso da, teda augwaligo naigo dage usu numainogo yao, eno te homu ebao. Te kolesagade te dage dali augwali dali si tiwai usu yaibao.

15 Te bukude wali po e tiwai dao,

16 Eno Godibolo po weyu usu da po obao, agai te bidi Taitusgo homu hodolobaso, tama agai dago homu tiwai ebao. Agai me dage tau sabo homu godolo mu ebo dao. 17 Magi baso meni. Agai dago Korin buluba pao wali po wali pali. Tiali goli aga me te sę yabo homu godolo mu ebaso, tama aga digi aga homugo dage bidibo madi asabo homu ebao. 18 Tama dago ama me deli aga dali hodobo tagala palaibao. Te tigidali bulude te Godigo po odobo we bidide te ama agai Godigo gesi wiegi yai po pusubo sę ebo nogi elalubao. 19 Tama te tiwai naga me ebeo. Menio. Te haniani bulude bidibo Godigo po odobo we bidi augwaligo te aga sa munama, te aga da dali Jerusalem hanuba biliyu, te olo tau sabo wiegi yai kolesaga tau sabo sę emainogo yai. Dago te Genuai Bidi nogi ugwaba siyu te sę ebao, tama te bidi dabe augwali ola menalama augwaligo konemainogo yali, te dago te tau sabo sę yabo homu mu ebao.

20 Dago te olo mabo genuai nai tonalubo kolesaga ebode te bidi me deligo dwai po da dali weyu, “Polgo te Juda bagebolo olo mu maiabo masigi meba buga salio,” te tobage po waidali weyu dago homu yai. Tama tiyu dago te ama dali tagala palobao. 21 Dago wiegi yai dolo kolesaga yabo homu ebo, te dago Genuai Bidigo gedude naga te kolesaga me egobeo. Menio. Te e tǫde bidi dabego gedude dali te kolesaga ebo dao. * Prs 3:4

22 Tama tibaso, dago dena ama me deli augwali si dali hodobo tagala palobao. Hauwa sogo dago aga haniani sęde usu sali, tama agai sę bomo elama ebo dago suali. Megi agai homugo te dagego wiegi yai kolesaga naga ebo homu bomo ebaso, tama agai te sę yabo homu bomo ebao. 23 Te Taitusde dagego konemainogo ebao: aga tama ena dali deli sęde dage tau sabo sę ebao. Tama dago ama si aga dali hodobo pabo bage, te dagego konemainogo yai: augwali si te Godigo po odobo we bidigo sa muani tagala palali bidi bidibao, tama augwa sęde te Kraisgo nogi ugwaba sabo dao. 24 Teda dagego duga dwagi yai homu eyu godolo mu ebo kolesaga te bidi dabe augwalibolo ola maiąo. Tama te Godigo po odobo we bidi dabe augwaligo dagego te kolesaga ebo mu konemainogo elama, tama dagego sęde dago dagede wiegi yai homu pemene ebo page me augwaligo konemainogo tiao.