1 Te king Solomongo pode augwaligo bras selama, alta me deli nigali. Te nai bobobage te 9 mita usu nama, tama aga genuai me te 9 mita usu nama nigali, tama aga bobobage ugwaba da te 4 hap mita tama usu nama nigali. * Sai 27:1-2 2 Tama augwaligo te genuai tank wę me deli te brasgo nigali. Te tank wę bobobage te 2 mita me te 20 sentimita usu nama nigali. Tama aga tomo dedage hala pali da, te 4 mita me 40 sentimita tama usu nama nigali, tama agai genuai usu da te 13 hap mita tama dao. 3 Tama te tank wę bogo badu tobolu badu augwaligo te lain si te kau kibu omai piksa noma tiwai si nigali. Te piksa noma sesego te tank wę ugwadu daide usu nama nigilama silalio. Tama te tigidali hap mita elalua pabo tomode te nogo si 10 kau kibu noma elalua pali. Tiali goli augwaligo te piksa noma nigilama te tankde daganebeo. Menio. Te augwaligo te tank nigali sogo augwaligo te piksa dali tama nigali. Tama augwali te tank pedai me tiwai tama elaluali. 4 Augwaligo nogo si olama, ugwadu si genuai kau kibu omai piksa noma te brasgo nigilama, tama augwaligo te tank wę ugwadu daide tede muani. Te kau kibu dabego tudi te tank dologode elaluama, tama augwaligo gesabidi te tigidali buluba ugwa gesabidi elalua pali. Te kau kibu selago te giliga asoboba poloba tonaluali, tama me selago te giliga paboba tonaluali, tama me selago te pobase oloba te notba pedai badu tonaluali, tama me selago te dolo olo badu te saut badu pedaiba tonaluali. 5 Te brasgo dąį te tank bulu badu gagalama, tama te tank tomoba usu nigi pai elaluali, teda te 8 sentimita usu nama elaluali. Tama te tank po te kapu po tiwai elaluali, tama te wiegi yai sawi yai plaua diniga pai elalubo tiwai yali. Tama te tank tomode augwaligo te 60,000 lita usu nama wę tomode pągąnama elaluabo usu yali. 6 Tama me augwaligo te nogo si te 10 tank dwasianu me nigali. Tama augwaligo a naga te saut badu te Genuai Bidigo tempel be daga pąde muani, tama me a naga te not badu be daga pąde muani. Te tank dabe da, te ofa yali hasa dage dabe ąį telayabo tank dabe dao. Tama te genuai tank te pris bidi dabe tede ąį pauabo dao. * Sai 30:17-21

7-8 Tama augwaligo gol selama, tama lam sole walabo bobobage nai geselali. Te lam sole walabo te bobobage nai nigibode bomai po elaluali. Augwaligo bugagia wali pelama, tama augwaligo te lam sole walabo nai dabe nigali, augwa te bomai pode elaluali kolesagadu bugagia wali pali. Tama me augwaligo nogo si 10 tebol sai geselali. Tama augwaligo te tebol me lam dabe augwaligo Genuai Bidigo tempel be tomode te Tedali Gasagi Yai Be Habude muani. Te tebol a naga ebadi me lam sole walabo bobobage nai a naga ebadi augwaligo not badu polo badu te be habu tomode muani, tama te a naga tebol me lam sole walabo bobobage nai dabe me augwaligo te saut badu polo badu muani, te be habu badu, te be tomode. Tama augwaligo gol selama, 100 dis pou nigali. * Sai 25:23-30, 31-40 9 Augwaligo genuai me dwasianu bidi sisinibo pesage nigali. Te dwasianu yalawai sisinibo pesage te pris bidi dabe naga sisinibo pesage nigali. Tama augwaligo genuai sisinibo pesageba pabo sunumi dabe nigali. Tama augwaligo bras dabe selama, te sunumi dabe hagalu pelama, simanigi pelama silali. 10 Tama augwaligo te genuai tank augwaligo te be mesalode te saut badu muani, te kona o sabi pąde gana muani.

11 Te Huramgo te wę paubo dis dabe geseliyu, me dwasianu savol dabe geseliyu, me gasa meba dis pou dabe geseliyu yali. Tama tialima megi da, Huramgo te king Solomongo agabolo nigilama Godigo tempel be tomode muabo nai dabe nigao wali, te nai dabe nigila silali. 12 Te Huramgo nigali nai dabe te e tama dao. Te genuai bobobage bras pos si, me te pos si ugwadu bagulali bagua sai nai me nigali, tama me te umben te wa tiwai nai geselama te pos si ugwadu au ilabo geselali. 13 Tama agai te pomigranet du piksa noma te 400 geselali, te pos side bagulali te umben bono dabede wawalo pabo nai dabe geselali. Te deli deli pos tobolude te pomigranet du te hani si te umben bonode te pos bagulama elaluali. 14 Tama agai te wilkar geselali, tama me agai te wilkarde muabo tank dabe geselali. 15 Tama me te genuai tank wę me te tank tolaluabo nogo si olama ugwadu si genuai kau kibugo piksa noma te tank tolaluabo nigali, te omai kau kibu piksa noma nigali. 16 Tama agai te sene dabe me dwasianu savol dabe me te pok dabe geselali.

Te Huram, te haniani nai dabe nigibo kolesaga mu konea pai bidigo, te Solomongo po wali pelama, tama agai te Genuai Bidigo tempel bede muabo nai dabe tigidali te brasgo geselai dao. Agai te nai dabe augwali gesela silama, tama agai augwali bugagia sawi yai ilali.

17 King Solomongo te Hurambolo te nai dabe geselao po te Jordan węde odogo malu bulude, te hanu Sukot me hanu Sereda tomode nigao po wali. Te bulude augwaligo te tobage sę yabo mama yai tǫ elalubo pesage wiegi yai madi mu dao. 18 Huram agai Solomongo po wali pelama, tama agai te nai dabe hauwa mu geselali, tama te nai dabego sęgę bidigo me konebeo.

19 Solomongo te sę bidi dabebolo te Godigo tempel be tomode muabo nai dabe geselao po wali. Tialima augwaligo gol selama alta geselali, tama me augwaligo Godiba mabo bret muabo tebol dabe me geselali. 20 Tama me augwaligo te gol selama, tama augwaligo lam dabe geseliyu me te lam walabo bobobage nai dabe me geselali, te Tedali Gasagi Yai Mu Be Habu pąde muabo madi geselali. Te lam walabo bobobage nai dabe geselabo sę yabode po te bomai po te elaluali. Tama augwaligo bugagia wali pelama, tama te lam walabo nai dabe geselali. 21 Tama me augwaligo te wiegi yai gol selama, tama augwaligo te plaua dabe geseliyu, me te lam dabe geseliyu, me te sisis tiwai te isi nogo tuabo nai dabe geselali. 22 Tama augwaligo te wiegi yai gol selama, tama lam sole sula sąyabo nai geselali, tama te ofa ebo nai kaneme muabo dis pou me geselali. Tama me te wiegi yai denami hano holobo pauda ulabo plet pou me geseliyu, me te isi sabilabo plet pou geseliyu yali. Tama me augwaligo gol selama, tama augwaligo te Tedali Gasagi Yai Mu Be Habu tomoba pabo sunumi daide muyu, me eda badu te Tedali Gasagi Yai Be Habu sunumi daide muyu tama yali, tama sese tama te golgo haluali.