Eu kapasen osuni: 1 Iei ewe pworaus ewe Samol mi Lapalap a apasa fän äsengesin Israel. Iei alon ewe Samol mi Lapalap mi ameresala ekewe läng, ewe mi föri fanüfan o atolonga ewe ngasangasen manau lon aramas, 2 “Nengeni, üpwe föri pwe Jerusalem epwe usun chök eu kapen wain. Chon ekewe mwü mi nom ünükün repwe ün seni o taroporop. Lupwen repwe pwelifeili Jerusalem fän pisekin maun, repwe pwal pwelifeili ekewe telinimwen Juta. 3 Lon ena fansoun, lupwen chon ekewe mwü meinisin won fanüfan repwe mufengen o maun ngeni Jerusalem, üpwe föri pwe Jerusalem epwe wewe ngeni eföü fau mi fokun chou fän iter. Chokewe meinisin mi ekietä ewe fau repwe püsin feiengau ren.” 4 Iei alon ewe Samol mi Lapalap, “Lon ena fansoun üpwe eniwokusu nöür kewe oris meinisin o aumwesi chokewe mi wawa ekewe oris. Üpwe mamasaöchü ekewe chon Juta, nge üpwe ochuna nöün chon ekewe mwü kewe oris. 5 Mürin, chon ekewe eterekesin Juta repwe kapasfengen lefiler, ‘Ekewe chon Jerusalem ra pöchökül pokiten ewe Samol mi Unusen Manaman i ar we Kot.’ 6 Lon ena fansoun üpwe föri pwe ekewe eterekesin Juta repwe usun chök eu ekkei lon eu wöllap, ika usun chök efoch töl mi nget me lein pilükün wiich. Repwe arosala chon ekewe mwü meinisin mi nom pwelin ünükür, nge chon Jerusalem repwe chök imweimw lon ar telinimw fän kinamwe.

7 Iwe, ngang ewe Samol mi Lapalap üpwe akomwen awinna ekewe chon Juta, pwe iteüöchün ekewe mwirimwirin Tafit me chon Jerusalem esap tekia seni iteüöchün chon Juta. 8 Lon ena fansoun ewe Samol mi Lapalap epwe tümwünü ekewe chon Jerusalem, pwe chokewe mi fokun apwangapwang repwe pöchökül usun chök Tafit, nge ekewe mwirimwirin Tafit repwe emweniir usun chök Kot, usun chök nöün ewe Samol mi Lapalap chon läng. 9 Lon ena fansoun üpwe arosala chon ekewe mwü meinisin mi maun ngeni Jerusalem.

10 Üpwe tinato won ekewe mwirimwirin Tafit me chon Jerusalem eman ngün mi amefi ngeni aramas usun ewe ümöümöchün Kot me eman ngün mi atufichiir lon ar iotek. Iwe, repwe nenengeni ätewe ra posu o ngüngüres won, usun eman a ngüngüres won nöün aleman, repwe kechüengau won, usun eman a kechüengau won nöün mwänichi. ✡ Joh 19.37; Pwär 1.7 11 Lon ena fansoun ewe ngüngüres lon Jerusalem epwe watte usun ewe ngüngüres fän iten Hatat-rimon me lon ewe maasiesin Mekito. 12 Iwe, chon ewe fanü repwe ngüngüres lon en me an famili. Ekewe famili ir mwirimwirin Tafit, ekewe mwän won ar, nge pwülüer won ar. Ekewe famili ir mwirimwirin Natan, ekewe mwän won ar, nge pwülüer won ar. 13 Ekewe famili ir mwirimwirin Lefi repwe ngüngüres, ekewe mwän won ar, nge pwülüer won ar. Ekewe famili ir mwirimwirin Simei, ekewe mwän won ar, nge pwülüer won ar. 14 Pwal ekewe lusun famili meinisin repwe ngüngüres, ekewe mwän won ar, nge pwülüer won ar.