1 Üa apilüköch, ai Kot,

üa apilüköch.

Üpwe köl o mwareituk.

Ngüni, kopwe pwök.

2 Ekewe kitar me ükülele repwe pwök.

Üpwe apwökü mallen rän.

3 Ai Samol mi Lapalap, üpwe kilisou ngonuk me lein ekewe mwichen aramas,

üpwe kölün mwareituk me lein chon ekewe mwü.

4 Pun om tong ellet a tekia seni ekewe läng,

om allükülük a tori ekewe kuchu.

5 Ai Kot, kopwe pwäri om tekia asen ekewe läng.

Om ling epwe pwäla won unusen fanüfan.

6 Kopwe amanauakem ren om manaman o pälüeni ai iotek.

pwe chokewe ka tongeer repwe ngasala.

7 Kot a kapas me lon imwan mi pin,

“Lon ai meseik üpwe ineti Sikem

o aineti ewe lemolun Sukot ngeni nei aramas.

8 Kiliat fanüei, Manasa pwal fanüei,

Efraim imwei akkau,

Juta woki wokun king.

9 Moap sepiei sepien töttöl,

üpwe moneela ipwei sus won Etom asisilan pwe fanüei,

nge won ewe fanü Filistia üpwe arükak fän ai win.”

10 Iö epwe emwenieilong lon ewe telinimw mi pöchökül tittin?

Iö epwe emweniei ngeni Etom?

11 Ai Kot, ifa usun, ka wesewesen pöütikeemila?

Ifa usun, kosap chüen eti äm mwichen sounfiu le feila maun?

12 Kopwe alisikem, pwe aipwe tongeni maun ngeni ekewe chon oputakem,

pun än aramas alilis a lomotongau.

13 Are Kot a etikich, kich sipwe win,

i echök epwe akufu chon oputakich.