1 Ai Kot, äm aia rongorong ren püsin selingem,

pun äm kewe lewo ra apworausa ngenikem

usun om kewe föför ka föriir lon ränin manauer,

lon ekewe fansoun lom.

2 Ka püsin asüela chon ekewe mwü,

nge ka fotukätiu äm kewe lewo lon ewe fanü.

Ka ariaföüü ekewe aramas,

nge ka angasa äm kewe lewo.

3 Pun resap liapeni ewe fanü ren püsin nöür ketilas,

resap pwal win ren püsin ar pöchökül,

ngei ren om pöchökül me manaman,

pwal ren om nonom rer, pun ka tongeer.

4 En ai king me ai Kot,

ka akota pwe noum kewe aramas repwe win.

5 Ren om manaman aia akufätiu ekewe chon oputakem.

Pokiten itom aia purätiu ekewe chon fiu ngenikem.

6 Pun üsap lükü ai likapich,

nei ketilas esap pwal tongeni amanauaei.

7 Nge en ka amanauakem seni ekewe chon ü ngenikem

o akufu chokewe mi oputakem.

8 Äm aia chök aingaing womw en äm Kot fansoun meinisin

o kilisou ngonuk tori feilfeilachök.

9 Nge iei ka pöütikeemila o föri pwe aipwe kuf,

kosap pwal chüen eti äm mwichen sounfiu le feila ngeni maun.

10 En ka föri pwe äm aipwe timär me mwen ekewe chon ü ngenikem,

nge ekewe chon oputakem ra angei liaper senikem fän pöchökül.

11 Ka asechikeemilong lepöür pwe repwe niikem usun sip mi amol ngeni ar repwe ninnila,

ka pwal atoropasafeilikem lein chon ekewe mwü.

12 Ka amömöla noum kewe aramas ren liwin mi kisikis,

nge kosap angei och win ren om amömörela.

13 Ka föri pwe äm aia uren takir me ren chon arüm,

ir ra ämängauakem o esitakem.

14 Ka föri pwe chon ekewe mwü ra leawenikem lon ar kapasen turunufas,

ra elifechefech ren ar ämängauakem.

15 Fansoun meinisin üa itengau,

üa pwölüla ren ai säw

16 pokiten än ekewe chon ämängau me chon turunufas kapas,

pwal pokiten än ekewe chon oputaei liwiningau ngeniei.

17 Ekei mettoch meinisin ra fis ngenikem,

nge äm aisap manlükukala

ika atai om we pwon.

18 Äm aisap kul senuk,

äm aisap pwal aleasolap ngeni om kewe allük.

19 Nge en ka atatakisikem me lon lenien ekewe kolak mi mwacho

o pwölükeemila ren rochokichin mäla.

20 Are äm aipwe manlükala iten äm we Kot

ika iotek ngeni pwal eman koten ekis,

21 ifa usun, Kot esap küna ei föför?

Ewer, pun Kot a silei mine a monomon me lon lelukem.

22 Nge fansoun meinisin aia küna ninni pokitom,

äm aia wewe ngeni sip mi amol ngeni ar repwe ninnila. ✡ Rom 8.36

23 Ai Samol, kopwe pwök! Pwota ka annut?

Kopwe nennela! Kosap pöütifochekeemila.

24 Pwota ka amona mesom senikem?

Kosap manlükala äm riaföü me weires.

25 Pun äm aia turula lon pwülümoromor,

inisim ra pacheri pwül.

26 Kopwe ütä o feito pwe kopwe alisikem.

Kopwe angasakem pokiten om tong ellet.