1 Ai Samol mi Lapalap, üa feito reöm pwe kopwe tümwünüei,

kosap mwüt ngeniei pwe üpwe kuf.

Kopwe angasaei, en ewe Kot mi pwüng.

2 Kopwe aü selingom ngeniei, kopwe müttir amanauaei.

En kopwe ai lenien op usun eu föimw mi pöchökül,

pwe kopwe amanauaei.

3 Ewer, en ai achau, pwal imwei imwen maun.

Kopwe emweniei o aiti ngeniei ewe al usun ka pwon.

4 Kopwe tümwünüei seni ewe sär mi molotä fän itei,

kopwe ti seniei feiengau.

5 Üa atolonga manauei lepoum,

kopwe amanauaei, ai Samol mi Lapalap,

ewe Kot mi allükülük. ✡ Luk 23.46

6 Ka oput chokewe mi fel ngeni anümwäl mi lomotongau,

nge ngang üa anomu ai apilükülük womw.

7 Üpwe mwänek o pwapwa

ren om tong ellet,

pun ka küna ai riaföü

o silei ai kewe weires.

8 Kosap atolongaei lepöün chon oputaei,

nge ka mwüt ngeniei pwe üpwe feila ia üa mochen feila ie.

9 Ai Samol mi Lapalap, kopwe ümöümöch ngeniei,

pun ngang üa nom lon riaföü.

Mesei ra toputopula ren ai kechü,

nge inisi a apwangapwangala.

10 Manauei a mochomochola ren riaföün letipei,

nge ierin manauei ren ai ngüngü.

Ai pöchökül a kisikisila pokiten ai riaföü,

pwal chüi mwo nge ra apwangapwangala.

11 Üa sachowun me ren ekewe chon oputaei meinisin o koput me ren chon ari.

Üa och pisekin eniw me ren chon sileei,

nge chokewe mi künaei me lon al ra sü seniei.

12 Üa manlüküla me ren aramas usun eman mi mäla,

üa usun eu sepi mi mök.

13 Ewer, üa rongorong pwe chomong ra möngününgün.

Lupwen ra raweei usun ar repwe angei manauei,

niuokus watte a nom pwelin ünüki.

14 Nge ngang üa apilükuk, ai Samol mi Lapalap,

üa apasa, “En ai Kot.”

15 Fansoun manauei a nom lepoum.

Kopwe angasaeila seni ekewe chon oputaei

me ekewe chon ariaföüüei.

16 Kopwe netiu won noum chon angang fän kirikiröch

o amanauaei lon om tong ellet.

17 Kosap mwütätä pwe üpwe itengau, ai Samol mi Lapalap,

pun üa kökköruk.

Nge kopwe mwütätä pwe ekewe aramasangau repwe itengau,

repwe fanafanala le feitiu lon lenien sotup.

18 Kopwe afanafanalai ekewe chon chofana

ra fos sikesik usun chon pwüng

lon ar lamalamtekia me oput.

19 Om kirikiröch a fokun somwola,

ka eäni ngeni chokewe mi niuokusituk.

Ka pwal kirikiröch ngeni chokewe mi eänuk lenien op

me fän mesen aramas meinisin.

20 Ka nonom rer o aopeer seni än ekewe aramas rawangau.

Ka tümwünüöchüür me lon leniom

seni än ekewe chon oputeer kapasen efitikoko.

21 Üpwe mwareiti ewe Samol mi Lapalap,

pun a eäni tong ellet mi amwarar ngeniei,

lupwen üa osupwang usun chon eu telinimw ra osupwang,

lupwen sounfiu ra pwelifeili fän pisekin maun.

22 Üa ekieki lon ai niuokus

pwe a asüeila seni fän mesan.

Nge i a rongorong ai tüngor,

lupwen üa siö ngeni pwe epwe alisiei.

23 Ämi nöün ewe Samol mi Lapalap chon pin meinisin, oupwe echeni i.

Ewe Samol mi Lapalap a tümwünü chokewe mi allükülük,

nge a liwiningau ngeni ekewe chon lamalamtekia won en me ükükün liwinin an föför.

24 Oupwe pöchökül o tipepwora,

ämi meinisin mi apilükülükü ewe Samol mi Lapalap.