1 Nei, kopwe etiwa ai kewe kapas o iseis ekewe allük lon lelukom. 2 Kopwe aü selingom ngeni tipachem o suki lelukom pwe kopwe wewe ren. 3 Ewer, kopwe siö ngeni Kot pwe epwe fang ngonuk om silelap, kopwe alapatä mweliom o tüngor ngeni pwe kopwe weweöch ren. 4 Kopwe kütta tipachem usun om kütta silifer, ika usun om kütta pisek aüchea mi monomon. 5 Are kopwe föri iei usun, mürin kopwe weweiti aüchean om niuokusiti ewe Samol mi Lapalap o fefeitä lon om silei Kot. 6 Pun ewe Samol mi Lapalap a fangala tipachem, i a atowu silelap me weweöch. 7 A atufichi ekewe chon pwüng o tümwünü chokewe mi wenechar seni feiengau usun eu tit. 8 A mamasa ekewe chon pwüng o tümwünü nöün kewe mi allükülük. 9 Are kopwe aüselingaei, mürin kopwe weweiti mine a pwüng, let me wenechar, kopwe pwal silei mine kopwe föri. 10 Pun tipachem epwe tolong lon lelukom, nge silelap epwe apwapwai ngünum. 11 Iwe, mirit epwe mamasok, nge weweöch epwe tümwünuk, 12 repwe epetuk seni om kopwe föri mine a ngau, pwal seni ekewe aramas mi eäni kapasen likatuputup, 13 ir chokewe mi likitala ekewe al mi wenechar o fetal won ekewe alen rochopwak me tipis, 14 ra pwapwa le föri föför mi ngau o meseikeiti angangen likatuputup, 15 ir aramas resap allükülük, esap wor eman a tongeni lüküür.

16 Tipachem epwe atufichuk pwe kosap tup ren ewe fin lisowu, ren ewe fin ekis mi eäni kapas amichimich, 17 neminewe mi likitala pwülüan a pwülüeni lupwen an föpwül o manlükala ewe pwon a eäni ngeni Kot. 18 Are kopwe feila lon imwan, kopwe fetal ngeni ewe al mi ale ngeni mäla. 19 Esap wor eman mi feila ren neminewe epwe liwinsefäl, esap wor eman epwe liwiniti ewe alen manau.

20 Iei mine kopwe apirü ekewe aramasöch o föri föför mi pwüng. 21 Pun ekewe chon pwüng repwe fanüeni ewe fanü, pwal ekewe aramas mi wenechar repwe nonom lon. 22 Nge ekewe aramasangau repwe kärila seni ewe fanü, pwal chokewe resap allükülük repwe üttütä seni me lon, usun irä ra üttütä seni pwül.