1 Iwe, lupwen ekewe chon Israel ra nonom lon Sittim, ekewe mwän ra lisowu ngeni ekewe fin Moap. 2 Iwe, ekewe fin Moap ra aweineer pwe repwe etiir le asor ngeni ar kewe kot. Iwe, ekewe aramas ra etiir le mongö seni ewe asor o chapetiu ngeni ar kewe kot. 3 Iei usun ekewe chon Israel ra etiir le fel ngeni Paal me lon Peor. Nge ewe Samol mi Lapalap a fokun song ngeniir. 4 Iwe, ewe Samol mi Lapalap a üreni Moses, “Kopwe angei ekewe samolun aramas meinisin, kopwe nirela o eitiweer fän akar me fän mesei, pwe pöchökülen ai song epwe kul seni ekewe chon Israel.” 5 Iwe, Moses a üreni ekewe soukapwüng lon Israel, “Eman me eman leimi epwe niela chokewe seni en me an ainang mi eti ekewe chon Moap le fel ngeni Paal me lon Peor.”

6 Nge nengeni, eman me lein ekewe aramasen Israel a feito o emwenato lon imwan eman fin Mitian fän mesen Moses pwal fän mesen ekewe aramasen Israel meinisin, lupwen ra kechü leasamalapen ewe imw mangaku ia aramas ra churi Kot ie. 7 Iwe, lupwen Pineas nöün Eleasar mwän, nge Eleasar nöün ewe souasor Aaron mwän, a küna ei, a ütä o towu seni ewe mwichen aramas. A angei efoch siles 8 o tapwelong mürin ewe re Israel me ewe fefin lon ewe rumwen lon o posurifengeniir me ruoman. Iei usun ewe mätter a ükütiu seni ekewe aramasen Israel. 9 Nge chokewe ra fen mäla ren ewe mätter ükükün rüe me rüanüngeröü.

10 Iwe, ewe Samol mi Lapalap a üreni Moses, 11 “Pineas a akulu ai song seni ekewe aramasen Israel. Pokiten i a lukomonguni ai lukomong wor, iei mine üsap chüen arosala ekewe aramasen Israel lon ai lukomong. 12 Iei mine kopwe üreni Pineas pwe üpwe föri ai pwonen kinamwe ngeni. 13 Ei pwon epwe fän itan me fän iten mwirimwirin pwe repwe wiseni ewe wisen souasor tori feilfeilachök. Pun a lukomong woi o föri asoren amusamusen tipis fän iten ekewe aramasen Israel.” 14 Iwe, iten ewe re Israel mi ninnilafengen me ewe fin Mitian Simri nöün Salu mwän, i samolun eu famili seni ewe ainangen Simeon. 15 Nge iten ewe fin Mitian mi ninnila Kospi nöün Sur fefin. Iwe, Sur i samolun eu cho lon Mitian.

16 Iwe, ewe Samol mi Lapalap a üreni Moses, 17 “Oupwe afeiengaua ekewe chon Mitian o nirela. 18 Pun ir ra afeiengauakemi, lupwen ra atupukemi me lon Peor, pwal mine a fis ren Kospi fefiner we, nöün eman samolun Mitian fefin, neminewe mi ninnila lon ewe rän, lupwen a fis ewe mätter pokiten ewe föför lon Peor.”