1 Iwe, ewe souasor mi lap Eliasip me pwin kewe souasor ra popuetä le försefäli ewe Asamalapen Sip. Ra apini ewe asamalap o amasalong ekewe asam lon lenier. Ra pwal senätä ewe tit tori ewe Imw Tekia itan Ipükü pwal tori ewe Imw Tekia imwen Hananel o apini. 2 Ekewe re Jeriko ra senätä ewe kinikin ünükün senier, nge Sakur nöün Imri we mwän a senisefälietä ewe kinikin ünükün senien ekewe re Jeriko.

3 Nöün Hasena kewe mwän ra förätä ewe Asamalapen Ik. Ra pachetä irän penkasaman o amasalong ekewe asam lon lenier, ra pwal apachätä amwöchür me lokkur kewe. 4 Meremot nöün Uria we mwän, nge Uria nöün Hakos, a senisefälietä ewe kinikin ünükün. Nge Mesulam nöün Perekia we mwän, nge Perekia nöün Mesesapel, a senisefälietä ewe kinikin ünükün senien Meremot. Iwe, Satok nöün Pana we mwän a senisefälietä ewe kinikin ünükün. 5 Ekewe chon Tekoa ra senisefälietä ewe kinikin ünükün senien Satok. Nge ar kewe aramas tekia resap pomwe ngeni pöür ewe angang nöür souemwen a awisa ngeniir.

6 Joiata nöün Pasea we mwän me Mesulam nöün Pesoteia ra försefäli ewe Asamalapen Lom. Ra pachetä penkasaman o amasalong ekewe asam lon lenier, ra pwal apachätä amwöchür me lokkur kewe. 7 Melatia ewe re Kipeon me Jaton ewe re Meronot, ekewe re Kipeon me re Mispa ra senisefälietä ewe kinikin ünükün tori imwen kepinan ewe fanü lotoun ewe chanpupu Oifrat. 8 Nge Usiel nöün Haraia we mwän seni ewe mwich mi angang ngeni kolt a senisefälietä ewe kinikin ünükün senier. Iwe, Hanania, eman me lein ekewe chon föri lö, a senisefälietä ünükün. Ra senisefälietä tittin Jerusalem tori ewe Tit mi Chölap. 9 Refaia nöün Hur we mwän, ewe sounemenemen esopun Jerusalem, a senisefälietä ewe kinikin ünükün. 10 Jetaia nöün Harumaf we mwän a senisefälietä ewe kinikin awenewenen imwan. Nge Hatus nöün Hasapneia a senisefälietä ewe kinikin ünükün. 11 Iwe, Malkia nöün Harim we mwän me Hasup nöün Pahat-moap ra senisefälietä ewe kinikin ünükün pwal ewe imw tekia Lenien Um. 12 Nge Salum nöün Haloes we mwän, ewe sounemenemen pwal ewe esopun Jerusalem, a senisefälietä ewe kinikin ünükün, i me nöün kewe fefin.

13 Iwe, Hanun me ekewe chon Sanoa ra försefäli ewe Asamalapen Lemol. Ra amasalong ekewe asam lon lenier o apachätä amwöchür me lokkur kewe. Ra pwal senisefälietä ewe tit ükükün engeröü limepükü fiit ator ngeni ewe Asamalapen Ioien Pipi.

14 Nge Malkia nöün Rekap we mwän, ewe sounemenemen ewe fanü Pet-hakerem, a försefäli ewe Asamalapen Ioien Pipi. A amasalong ekewe asam lon lenier o apachätä amwöchür me lokkur kewe.

15 Salum nöün Kolose we mwän, ewe sounemenemen ewe fanü Mispa, a försefäli ewe Asamalapen Chönüttu. A föri sissin o amasalong ekewe asam lon lenier, a pwal apachätä amwöchür me lokkur kewe. A pwal senisefälietä ewe tit arun ewe nomun koluk itan Sela ünükün än ewe king tanipi tori ewe latö mi feitiu seni ewe telinimwen Tafit. 16 Nge Nehemia nöün Aspuk we mwän, ewe sounemenemen esopun ewe fanü Petsur, a senisefälietä ewe tit ünükün tori ewe leni awenewenen peiasen Tafit, tori ewe nomun koluk aramas ra förätä, pwal tori imwen ekewe mwän mi pwora.

17 Ikkei iten ekewe mwän seni ewe ainangen Lefi mi senisefälietä ekoch kinikinin ewe tit: Rehum nöün Pani we mwän a senisefälietä ewe kinikin ünükün senien Nehemia. Nge Hasapia ewe sounemenemen esopun ewe fanü Keila, a senisefälietä ewe kinikin ünükün fän iten aramasen fanüan. 18 Pawai nöün Henatat, ewe sounemenemen pwal ewe esopun fanü Keila, a senisefälietä ewe kinikin ünükün. 19 Nge Eser nöün Jesua we mwän, ewe sounemenemen Mispa, a senisefälietä pwal eu kinikin ünükün awenewenen ewe al mi feitä ngeni ewe imwen iseis pisekin maun tori pwokukun ewe tit. 20 Paruk nöün Sapai we mwän a senisefälietä pwal eu kinikin ünükün seni pwokukun ewe tit tori asamalapen imwen ewe souasor mi lap Eliasip. 21 Meremot nöün Uria we mwän, nge Uria nöün Hakos, a senisefälietä pwal eu kinikin ünükün, seni asamalapen imwen Eliasip tori lesopun imwan. 22 Nge ekewe souasor mi imweimw ünükün Jerusalem ra senisefälietä ewe kinikin ünükün. 23 Peniamin me Hasup ra senisefälietä ewe kinikin awenewenen imwer. Nge Asaria nöün Maseia we mwän, nge Maseia nöün Anania, a senisefälietä ewe kinikin ünükün imwan. 24 Pinui nöün Henatat we mwän a senisefälietä pwal eu kinikin seni imwen Asaria tori pwokukun ewe tit. 25 Palal nöün Usai we mwän a senisefälietä ewe kinikin awenewenen ewe pwokuku me ewe imw tekia mi kouwu seni ewe imwen king mi nom asan arun ewe lenien chon mamas. Nge Petaia nöün Paros we mwän a senisefälietä ewe kinikin ünükün. 26 Nge ekewe chon angang ngeni ewe imwenfel mi nonom lon Ofel, eu kinikinin lon ewe telinimw Jerusalem, ra senisefälietä ewe kinikin ünükün tori awenewenen ewe Asamalapen Koluk mi nom ötiu, pwal tori ewe imw tekia mi kouwu. 27 Iwe, ekewe re Tekoa ra senisefälietä pwal eu kinikin seni ewe imw tekia o watte mi kouwu tori ewe tit ünükün Ofel.

28 Iwe, asen ewe Asamalapen Oris ekewe souasor ra senisefälietä ewe tit awenewenen en me püsin imwan. 29 Satok nöün Imer we mwän a senisefälietä ewe kinikin ünükün senier awenewenen püsin imwan. Nge Semaia nöün Sekania we mwän, ewe chon mamasa ewe asamalap mi nom ötiu, a senisefälietä ünükün. 30 Hanania nöün Selemia we mwän me Hanun ewe awonomanün nöün Salaf ra senisefälietä pwal eu kinikin ünükün. Nge Mesulam nöün Perekia we mwän a senisefälietä ewe tit ünükün awenewenen ewe ia a imweimw ie. 31 Malkia eman me lein chokewe mi angang ngeni kolt a senisefälietä eu kinikin ünükün tori imwen ekewe chon angang ngeni ewe imwenfel pwal imwen ekewe chon amömö awenewenen ewe Asamalapen Chon Mamas, pwal tori ewe rumw mi nom asen pwokukun ewe tit. 32 Nge chokewe mi angang ngeni kolt me ekewe chon amömö ra senisefälietä ewe tit seni ewe rumw mi nom asen pwokukun ewe tit tori ewe Asamalapen Sip.