1 Iwe, ewe Samol mi Lapalap a kapas ngeni Moses, 2 pwe epwe üreni ekewe aramasen Israel, “Are eman me lein ekewe aramasen Israel ika eman me lein ekewe chon ekis mi nom lon Israel epwe eäni asor eman nöün ngeni Molok, epwe fokun ninnila. Iwe, aramasen ewe fanü repwe monei ngeni fau. 3 Püsin ngang üpwe ü ngeni ewe aramas o ärawu me lein aramasan, pun a eäni asor ngeni Molok eman nöün. Ren ei a pwal apiningaua imwei mi pin o turunufasei itei mi pin. 4 Nge are aramasen ewe fanü ra ömönüngau seni föförün ätewe mi eäni asor nöün ngeni Molok pwe resap niela, 5 püsin ngang üpwe ü ngeni ewe aramas me an famili o ärirewu me lein aramaser. Iwe, üpwe ärawu ätewe me chokewe meinisin mi eti le fel ngeni Molok.

6 Iwe, are eman aramas a feila ren watawa me sourong pwe epwe angei an öüröür seniir, ngang üpwe ü ngeni ewe aramas o ärawu me lein aramasan. 7 Iei mine oupwe püsin apinikemi pwe oupwe pin, pun ngang ewe Samol mi Lapalap ämi we Kot. 8 Oupwe aleasochisi ai kewe allük o apwönüretä. Ngang ewe Samol mi Lapalap üa apinikemi. 9 Iteiten eman me eman mi otteki saman ika inan epwe fokun ninnila. Pokiten an otteki saman ika inan chan epwe ukan chök. ✡ Eks 21.17; Mat 15.4; Mark 7.10

10 Iwe, are eman mwän a lisowu ngeni pwülüen chon arun, ir me ruoman, ewe mwän me ewe fefin, repwe ninnila. ✡ Eks 20.14; Lif 18.20; Tut 5.18 11 Eman mwän mi lisowu ngeni pwülüen saman a turunufasei saman. Ir me ruoman repwe ninnila, nge char epwe uker chök. ✡ Lif 18.8; Tut 22.30; 27.20 12 Are eman a lisowu ngeni pwülüen nöün mwän, ir me ruoman repwe ninnila. Ra föri tipisin lisowu lefilen märär, char epwe uker chök. ✡ Lif 18.15 13 Nge are eman mwän a lisowu ngeni eman mwän usun chök an lisowu ngeni eman fefin, ir me ruoman ra föri och föför mi anioput. Iwe, repwe ninnila, nge char epwe uker chök. ✡ Lif 18.22 14 Are eman mwän a pwülüenifengeni eman fefin me inan, ei föför a fokun ngau. Iwe, ewe mwän me ekewe ruoman fefin repwe kek, pwe esap wor föföringau leimi. ✡ Lif 18.17; Tut 27.23 15 Nge are eman mwän a kon ren eman man, ewe mwän epwe ninnila. Oupwe pwal niela ewe man. 16 Are eman fefin a oror ngeni eman man pwe epwe lisowu ngeni, ewe fefin me ewe man repwe ninnila, nge char epwe uker chök. ✡ Eks 22.19; Lif 18.23; Tut 27.21

17 Iwe, are eman mwän a pwülüeni fefinan, ese lifilifil ika nöün saman ika nöün inan, nge ra künafengeni selelar, ei eu föför repwe säw ren fän mesen aramas. Iwe, repwe käriwu seni aramaser. Ewe mwän a lisowu ngeni fefinan, iei mine epwe angei chappen an föföringau. ✡ Lif 18.9; Tut 27.22 18 Nge are eman mwän a kon ren eman fefin lupwen an samaun fefin o lisowu ngeni, ätewe a pwärala lenien samaun neminewe, nge neminewe a apwälai lenien an samau. Iei mine ir me ruoman repwe käriwu me lein aramaser. ✡ Lif 18.19 19 Iwe, kosap lisowu ngeni pwin inom ika fefinen semom, pun ren ei föför ka aseleloi fitukom. Ir me ruoman repwe angei chappen ar föföringau. 20 Are eman mwän a kon ren pwülüen pwin saman ika pwülüen mwänin inan, a turunufasei pwin saman ika mwänin inan. Iwe, ir me ruoman repwe angei chappen ar föför, pun repwe mäla, nge esap wor nöür. ✡ Lif 18.12-14 21 Nge are eman mwän a pwülüeni pwülüen pwin, ei föför a fokun ngau. Ätewe a turunufasei pwin, iei popun esap wor nöür. ✡ Lif 18.16

22 Iei mine oupwe aleasochisi ai kewe allük me pwüüng meinisin pwe oupwe föriir. Are oua föri iei usun, ewe fanü Kanaan ia üpwe emwenikemiilong ie esap musäsinikemiiwu. 23 Ousap angei örünien chon ekewe mwü üpwe asürela me mwemi. Pun ir ra föri ekei mettoch meinisin, iei mine ngang üa fokun oputeer. 24 Nge üa pwon ngenikemi pwe üpwe ngenikemi fanüer pwe oupwe fanüeni, ewe fanü mi pwülüöch o fanüeräs. Ngang ewe Samol mi Lapalap ämi we Kot üa aimwükemiila seni chon ekewe mwü. 25 Iei mine oupwe fokun alefila lefilen man mi limöch me man mi limengau, pwal lefilen machang mi limengau me machang mi limöch. Ousap alimengauakemi ren ämi ochoch man ika machang ika sokopaten man mi tö won pwül, pun üa aimwürela pwe repwe limengau me remi. 26 Ämi oupwe pin fän itei, pun ngang ewe Samol mi Lapalap üa pin. Üa aimwükemiila seni chon ekewe mwü pwe oupwe nei.

27 Iwe, eman mwän ika eman fefin i watawa ika sourong epwe ninnila. Oupwe monei ngeni fau, nge chan epwe ukun chök.”