1 Iwe, ewe Samol mi Lapalap a üreni Moses me Aaron, 2 “Are eman aramas a wor och pwo won inisin, ika och tir ika och tikepwechepwech, a tongeni wiliti eu kilingau mi afeiengau * Ewe kilingau mi afeiengau a pachelong sokopaten samaun ünüchen aramas, pwal kainapan me rupun pwötür. won inisin, repwe emwenala ren ewe souasor Aaron ika ren eman lein mwirimwirin kewe. 3 Iwe, ewe souasor epwe nenengenöchü ewe kilingau won inisin ewe aramas. Nge are a pwechepwechela ülöülen ewe ia a kilingau ie, are a pwal pwä pwe ewe kilingau a enalong silin, ewe aramas a eäni eu kilingau mi afeiengau. Iwe, wesin än ewe souasor nenengenöchü ewe aramas, epwe anomu lon tettelin chon limengau. 4 Nge are ewe kilingau a pwechepwech won, nge esap enalong silin, are ülöülan resap pwal pwechela, ewe souasor epwe aimwüela ewe aramas lon ükükün fisu rän. 5 Iwe, lon ewe afisuen rän ewe souasor epwe nenengenöchüsefäli ewe aramas. Nge are a küna pwe ewe kil esap lapala, esap pwal töfetal won silin, ewe souasor epwe aimwüela ewe aramas pwal lon ükükün fisu rän. 6 Iwe, lon afisuen rän ewe souasor epwe nenengenöchüsefäli ewe aramas. Nge are ewe kil a aromomo, esap pwal töfetal won silin, ewe souasor epwe anomu lon tettelin chon limöch. Ewe kil och tir echök. Ewe aramas epwe sopuni üfan, mürin epwe limöch. 7 Nge are ewe tir a töfetal won silin ewe aramas mürin an pwäri ngeni ewe souasor inisin o nom lon tettelin chon limöch, ewe aramas epwe liwinsefälila ren ewe souasor. 8 Iwe, ewe souasor epwe nenengenöchüsefäli ewe aramas. Nge are ewe tir a töfetal won silin, ewe souasor epwe anomu ewe aramas lon tettelin chon limengau, pun a eäni och kilingau mi afeiengau.

9 Iwe, are eman aramas a eäni och kilingau mi afeiengau, repwe emwenala ewe aramas ren ewe souasor, 10 pwe epwe nenengenöchü. Nge are a wor eu pwo mi pwechepwech o ülöülen ewe ia a pwo ie ra pwechela, are a pwal parapar fituken lon ewe pwo, 11 iei eu kilingau mi afeiengau won inisin ewe aramas mi nom seni chök me lom. Iwe, ewe souasor epwe anomu i lon tettelin chon limengau. Esap chüen aimwüela ewe aramas ren an epwe nenengenisefäli, pun a fen limengau. 12 Nge are ewe souasor a küna pwe ewe kilingau a rangewu won inisin ewe aramas o chöüla won inisin seni won möküran tori pechen, 13 ewe souasor epwe nenengenöchü ewe aramas. Are ewe kilingau mi afeiengau a pwölüela unusen inisin, ewe souasor epwe anomu ewe aramas lon tettelin chon limöch. Iwe, pokiten unusen inisin a pwechela, a limöch. 14 Nge are a pwä fituk mi parapar won inisin ewe aramas, epwe limengau. 15 Iwe, ewe souasor epwe nenengenöchü ewe fituk mi parapar o anomu ewe aramas lon tettelin chon limengau. Fituk mi parapar a limengau, pun iei eu kilingau mi afeiengau. 16 Nge are ewe fituk mi parapar won ewe aramas a siwil ngeni fituk mi pwechepwech, epwe feito ren ewe souasor. 17 Iwe, ewe souasor epwe nenengenöchü ewe aramas. Nge are ewe kil a pwechela, ewe souasor epwe anomu ewe chon samau lon tettelin chon limöch, pun a limöch.

18 Are a wor eu mach mi fen mo won inisin eman aramas, 19 nge mürin a pwüküwu eu pwo mi pwech lerasen ewe mach ika eu pwo mi tikeparepwech, ewe aramas epwe aküna ngeni ewe souasor inisin. 20 Iwe, ewe souasor epwe nenengenöchü machen ewe aramas. Pun ika a pwä pwe ewe kil lon ewe mach a enalong silin o ülöülan ra pwechela, ewe souasor epwe anomu ewe aramas lon tettelin chon limengau. Iei eu kilingau mi afeiengau a pwüküwu me lon ewe mach. 21 Are ewe souasor a nenengenöchü ewe mach o küna pwe ülöülen won resap pwechela, are ewe kil lon esap pwal enalong silin pwe a aromomo, mürin ewe souasor epwe aimwüela ewe aramas lon ükükün fisu rän. 22 Nge are ewe kil a töfetal won inisin ewe aramas, ewe souasor epwe anomu lon tettelin chon limengau, pun iei eu kilingau mi afeiengau. 23 Nge ika ewe kil esap lapala, esap pwal töfetal, a chök eu lemomon mach. Iwe, ewe souasor epwe anomu ewe aramas lon tettelin chon limöch.

24 Are eman a kar, nge mürin ewe kar a wiliti eu kil mi tikeparepwech ika pwech, 25 ewe souasor epwe nenengenöchü ewe kar. Nge are ülöülen ewe ia a kar ie a pwechela, are ewe kil a pwal enalong silin, iei eu kilingau mi afeiengau. Iwe, ewe souasor epwe anomu ewe aramas lon tettelin chon limengau, pun a samaun rupun pwötür. 26 Are ewe souasor a nenengenöchü ewe kar o küna pwe ülöülen won resap pwechela, are ewe kil esap pwal enalong silin pwe a aromomo, mürin ewe souasor epwe aimwüela ewe aramas lon ükükün fisu rän. 27 Iwe, lon afisuen rän ewe souasor epwe nenengenisefäli ewe aramas. Nge are ewe kil a töfetal won inisin, ewe souasor epwe anomu ewe aramas lon tettelin chon limengau, pun iei eu kilingau mi afeiengau. 28 Nge are ewe kil esap lapala, esap pwal töfetal won silin pwe a aromomo, a chök eu pwo seni ewe kar. Iwe, ewe souasor epwe anomu ewe aramas lon tettelin chon limöch, pun iei eu lemomon kar.

29 Are eman mwän ika eman fefin a kilingau won möküran ika won ngächin, 30 ewe souasor epwe nenengenöchü ewe kilingau. Nge are ewe kilingau a enalong silin, are ülöülen won ra pwal oleol o ülöngau, ewe souasor epwe anomu ewe aramas lon tettelin chon limengau. Iei eu kil mi pwerik, eu kilingau mi afeiengau won möküran ika won ngächin. 31 Nge are ewe souasor a nenengenöchü ewe kilingau mi pwerik o küna pwe esap enalong silin, esap pwal wor ülöülan mi chol won, ewe souasor epwe aimwüela ewe aramas mi üri kilingau mi pwerik lon ükükün fisu rän. 32 Iwe, lon afisuen rän ewe souasor epwe nenengenöchüsefäli kilingauen ewe aramas. Nge are ewe kil mi pwerik esap lapala, are esap wor ülöülen won mi oleol, esap pwal enalong silin, 33 ewe aramas epwe räisöü, nge esap räisöü won ewe kil mi pwerik. Mürin, ewe souasor epwe aimwüela ewe aramas pwal lon ükükün fisu rän. 34 Iwe, lon afisuen rän ewe souasor epwe nenengenöchüsefäli kilingauen ewe aramas. Nge are ewe kil mi pwerik esap lapala, esap pwal enalong silin, ewe souasor epwe anomu ewe aramas lon tettelin chon limöch. Iwe, epwe sopuni üfan, mürin epwe limöch. 35 Nge are ewe kil mi pwerik a töfetal won inisin mürin an nom lon tettelin chon limöch, 36 ewe souasor epwe nenengenöchüsefäli ewe aramas. Pun ika ewe kil mi pwerik a töfetal won inisin, ewe souasor esap chüen ekiekin kütta ewe ülöül mi oleol, pun ewe aramas a limengau. 37 Nge are ewe souasor a küna pwe ewe kil mi pwerik esap lapala, pwe ra pwükütä ülöülan mi chol won o ewe kil mi pwerik a mo, ewe aramas a limöch. Iwe, ewe souasor epwe anomu i lon tettelin chon limöch.

38 Are a wor tikepwechepwech won inisin eman mwän ika eman fefin, 39 ewe souasor epwe nenengenöchü ewe aramas. Nge are ewe tikepwechepwech won inisin esap nien lingewu, a chök üri eu kil. Iwe, ewe aramas a limöch.

40 Are eman mwän a mworola meten möküran, ewe aramas a mongopal, nge a chök nom lon tettelin chon limöch. 41 Iwe, are eman mwän a mworola meten möküren eten mesan me meten esen mongön, a chök pal eten mesan, nge a nom lon tettelin chon limöch. 42 Nge are a wor eu kil mi parepwech won pallen möküran ika won eten mesen ewe mwän, iei eu kilingau mi afeiengau a üri won möküran ika won eten mesan. 43 Mürin, ewe souasor epwe nenengenöchü ewe mwän. Nge are ewe pwo won pallen möküran ika won eten mesan a tikeparepwech usun chök eu kilingau mi afeiengau won inis, 44 ewe aramas a limengau. Iwe, ewe souasor epwe anomu ewe aramas lon tettelin chon limengau, pun a eäni eu kilingau mi afeiengau won möküran.

45 Iwe, eman mi eäni eu kilingau mi afeiengau epwe üföüf üf mi kam o atorongaua möküran, epwe pwal pwölüela awan o kökkö, “Üa limengau, üa limengau.” 46 Epwe chök nonom lon tettelin chon limengau lon ükükün langatamen fansoun an eäni ewe samau. Iwe, epwe imwüla lon lenian lükün ewe ia aramas ra nonom ie.

47 Iwe, are a wor niwangir won echö üf, ese lifilifil ika ewe üf a för seni ülen man ika seni sokun silin irä, 48 are a nom won echö mangaku mi för seni sokun silin irä ika seni ülen man, are a pwal nom won silin man ika won och pisek mi för seni silin man, 49 are ei niwangir a anüefetil ika anüepar, iei eu niwangir mi chöfetal. Iwe, repwe aküna ngeni ewe souasor. 50 Ewe souasor epwe nenengenöchü ewe niwangir o aimwüela ewe pisek lon ükükün fisu rän. 51 Nge lon afisuen rän epwe nenengenöchüsefäli ewe niwangir. Iwe, are ewe niwangir a lapala won ewe üf ika won ewe mangaku ika won ewe silin man, ese lifilifil met sokun aean ewe silin man, ewe niwangir a fokun ngau, ewe pisek a limengau. 52 Iwe, ewe souasor epwe kenala ewe pisek. Pokiten ewe niwangir a fokun ngau, epwe chök kekila.

53 Nge are ewe souasor a nenengenöchüsefäli o küna pwe ewe niwangir esap lapala won ewe üf ika won ewe mangaku ika won och seni silin man, 54 ewe souasor epwe allük pwe repwe sopuni ewe pisek mi niwangir. Mürin epwe aimwüela pwal lon ükükün fisu rän. 55 Mürin, ewe souasor epwe nenengenöchüsefäli ewe pisek mi niwangir mürin an sop. Nge are ewe niwangir esap siwil anüanün, inamwo are esap pwal lapala, ewe pisek a chök limengau. Kopwe chök kenala ewe pisek, ese lifilifil ika ewe niwangir mi ngau a nom lon ika lükün.

56 Nge are ewe souasor a nenengenöchüsefäli o küna pwe ewe niwangir a aromomo mürin an sop, epwe kamwewu ewe ia a niwangir ie me won ewe üf ika ewe silin man ika ewe mangaku. 57 Iwe, are ewe niwangir a pwäsefäl me mürin won ewe üf ika won ewe mangaku ika won och pisek seni silin man, ewe niwangir a chöfetal. Kopwe chök kenala ewe pisek mi ngau niwangirin. 58 Nge are niwangirin ewe üf ika ewe mangaku ika och pisek mi för seni silin man a mola mürin om sopuni, kopwe chök sopuni fän aruuan. Mürin epwe limöch.”

59 Iei ewe allük fän iten ewe niwangir mi fokun ngau won üf mi för seni ülen man ika seni sokun silin irä ika won mangaku are pwal och pisek mi för seni silin man, pwe epwe fat ika och pisek a limöch ika a limengau.