1 Mürin, ewe Samol mi Lapalap a kapas ngeni Josua, 2 “Kopwe üreni ekewe aramasen Israel pwe repwe filätä ekewe telinimwen op, usun üa fen allük ngeni Moses pwe epwe ürenikemi. 3 Are eman aramas a niela eman fän chechengau, nge esap fän letipan, epwe tongeni sü ngeniir pwe epwe op seni ewe mi kütta liwinin chan aramasan. 4 Iwe, epwe tongeni sü ngeni eu lein ekewe telinimwen op, epwe ütä leasamalapan o apworausa ngeni ekewe souakomwen ewe telinimw mine a fis ngeni. Mürin, repwe emwenalong lon ewe telinimw o alenia pwe epwe nom rer. 5 Nge are ewe mi kütta liwinin chan aramasan a tapweri, ekewe souakom resap asechalong ewe mi niela eman aramas lepöün. Repwe tümwünü, pokiten a niela chon arun fän chechengau, nge esap oput i me mwan. 6 Iwe, ewe mi niela eman aramas epwe chök nom lon ewe telinimw tori a fis kapwüngün fän mesen ewe mwichen aramas. Nge lupwen ewe souasor mi lap mi wiseni ewe wis lon ewe fansoun a mäla, ina otun ewe aramas a tongeni liwiniti telinimwan we a sü seni.”

7 Iei mine ra aimwüela Ketes me lon Kalilea lon chukuchukutän ewe fanü Naftali me Sikem lon chukuchukutän ewe fanü Efraim, pwal Kiriat-arapa, iei Hepron lon chukuchukutän ewe fanü Juta me lotoun ewe chanpupu Jortan. 8 Nge ötiuen ewe chanpupu Jortan me Jeriko ra filätä Peser mi nom lon ewe fanüapö won ewe fanü mi sosonöch seni fanüen chon ewe ainangen Rupen, nge Ramot lon Kiliat seni fanüen chon ewe ainangen Kat, pwal Kolan lon Pasan seni fanüen chon ewe ainangen Manasa. 9 Ikkei ekewe telinimwen op mi kefilitä fän iten ekewe aramasen Israel meinisin, pwal fän iten chon ekis mi siamü lefiler. Pun iteiten eman me eman mi niela eman aramas fän chechengau a tongeni sü ngeniir, pwe esap mäla ren ätewe mi kütta liwinin chan aramasan, tori a fis kapwüngün fän mesen ewe mwichen aramas.