1 “Nge iei, ekewe mwän mi ierkükün fai ra urumwoteei.

Semelaper kewe ra aücheangau me rei

pwe üsap mwo nge mwüt ngeniir ar repwe nom ren nei kewe kolak

le tümwünü nei kewe pwiin sip.

2 Met lomoten pöchökülen pöür ngeniei?

Pun ir mwän mi apwangapwang.

3 Ra asüngürü waren ekewe irä lon fanüapö,

ra fokun kichüchü pokiten ar mwelele me echik.

4 Ra fichi chön ewe irä malow me chön ekewe sokopaten irä pwe ener mongö,

ra pwal eni waren ewe irä pirum.

5 Aramas ra asürela me leir,

ra puchörula müriir usun ar puchörula mürin eman chon solä.

6 Ra imweimw won palen ekewe lemol,

lon pwangen pwül me pwangen achau.

7 Ra wörüwör me lein ekewe irän lemäl

o achachachfengen fän ewe irä lantana.

8 Ir nöün chokewe esap wor lomoter,

eu mwichen aramas esap wor iter.

Aramas ra fen asürela seni lon ewe fanü.

9 Nge iei ir ra kölüei lon ar kölün turunufas

o leaweniei lon ar kapasen ämängau.

10 Ra nioput ngang o nonom toau seniei,

resap mwo nge säw le atufolong lon mesei.

11 Pokiten Kot a apwangapwangaei o atekisonaei,

iei mine resap chüen meninitiei.

12 Eu mwichen aramas mi akürang a fiu ngeniei me pelifichi.

Ra iseis eu sär fän iten pechei

o senätä ar ororen maun pwe repwe afeiengauaei.

13 Ra pinei ai al, pwe üsap tongeni sü,

o awattelai ai feiengau, nge esap wor eman a apetiir.

14 Ra tolong usun chök ar tolong lon eu pwang mi chölap,

ra afawunoto woi me lein ekewe leni mi tala.

15 Eniweniw a pwölüeila,

ai iteüöch a sü seniei usun asepwäl a ässala mettoch,

wöüi a feil seniei usun eu kuchu.

16 Nge iei üa arap ngeni mäla,

esap wor ai ngasala seni riaföü.

17 Lepwin chüi ra cheuch,

ai metek mi weichin esap ükütiu.

18 Kot a turufi üfei fän pöchökül mi lapalap,

a angütü pöün won üei usun kalan üfei sööch.

19 Kot a aturueilong lon ewe pwakak,

üa wewe ngeni pwül moromor me falang.

20 Üa siö ngonuk, ai Kot, nge kosap pälüeniei,

lupwen üa iotek ngonuk, kosap afäliei.

21 Ka kulitiei o fokun ariaföüüei,

ka afeiengauaei ren pöchökülen poum.

22 Ka uweeitä lon asepwäl o föri pwe üpwe ässila,

ka pönieila ren eu mölümöl.

23 Ewer, üa silei pwe kopwe emweniei ngeni mäla,

ngeni ewe leni mi kefilitä fän iten chon manau meinisin.

24 Ifa usun, eman aramas mi kokotiu lon riaföü esap aitietä pöün

o siö pwe eman epwe alisi lon an feiengau?

25 Ifa usun, üsap kechüeiti ätewe mi nom lon riaföü?

Ifa usun, üsap letipeta fän iten ekewe chon wöüngau?

26 Nge lupwen ngang üa asüküsükü feiöch, feiengau a toriei.

Lupwen üa witiwiti saram, rochopwak a toriei.

27 Lelukei a fitikoko, nge esap manasösö,

iteiten rän ai riaföü a chök lapala.

28 Üa fetalfeil fän letipeta, nge esap wor ai chip.

Üa ütä lein ewe mwichen aramas o siö pwe eman epwe alisiei.

29 Üa pwiini ekewe kolak mi mwacho,

üa chiechi ngeni ekewe fukuro.

30 Ünüchei a cholola o säre seniei,

inisi a fokun pwichikar.

31 Tikin nei ükülele a wiliti kölün letipeta,

nge tikin nei aangün a wiliti ngingin kechü.”