31
1 Iei alon ewe Samol mi Lapalap, “Lon ena fansoun ngang üpwe än ekewe ainangen Israel meinisin Kot, nge ir repwe nei aramas. 2 Ekewe aramas resap ninnila ren ketilas ra küna ümöümöch me lon ewe fanüapö, lupwen chon Israel ra kütta ar lenien asösö. 3 Üa pwä ngeniir me toau o apasa: Üa echenikemi ren ewe chen esemüch, iei mine üpwe sopwela le pwäri ngenikemi ai tong ellet. 4 Ämi chon Israel, üpwe aüsefälikemiitä pwe oupwe ütä. Oupwe angesefäli ämi pisekin kaktai o pwörük fän pwapwa. 5 Oupwe fotukisefäli ekewe tanipin wain won ekewe chukun Samaria. Ekewe chon tanipi repwe fotuki ekewe irän wain o ochei uar fän pwapwa. 6 Pun epwe war eu fansoun, lupwen ekewe chon mas repwe kökkö me won chukuchukutän ewe fanü Efraim, ‘Oupwe etto, ousipwe feila ngeni Sion ren ewe Samol mi Lapalap ach we Kot.’ ”
7 Iei alon ewe Samol mi Lapalap,
“Oupwe leüömong le köl fän pwapwa fän iten Israel,
oupwe akapwas fän iten ewe mwü mi lap me lein ekewe mwü.
Oupwe ingemwar, oupwe asilefeili ekei kapas o apasa,
‘Ewe Samol mi Lapalap a amanaua nöün aramas,
a angasa chokewe mi chüen manau me lon Israel.’
8 Nengeni, üpwe emwenireto seni ewe fanü efeng
o achufengeniir seni lesopun fanüfan.
Chon chun me chon pechemä repwe etiir,
pwal fefin mi pwopwo me chokewe mi toriir ar cheuchen fam.
Repwe liwiniti ei fanü fän eu mwich mi watte.
9 Repwe feito fän kechü,
repwe iotek lupwen üpwe aliwinireto.
Üpwe emwenirela ünükün chanpupu,
repwe fetal won efoch al mi wenechar, ia resap chepetek me ie.
Pun üa eman sam ngeni Israel,
nge Efraim nei mwänichi.”
10 Iei alon ewe Samol mi Lapalap,
“Oupwe aüseling, ämi chon ekewe mwü
o asilefeili ai kei kapas lon ekewe fanü aroset mi toau.
Oupwe apasa, ‘Ätewe mi atoropasa chon Israel epwe pwal achufengeniir
o tümwünüür usun eman chon mas a tümwünü nöün pwiin sip.’
11 Pun ngang ewe Samol mi Lapalap üa möni ekewe aramasen Israel
o angaserela seni chokewe mi kon pöchökül seniir.
12 Iwe, repwe feito o köl fän pwapwa me won ewe chuk Sion,
repwe meseik ren ai lifang ngeniir,
ren ekewe föün wiich me wain me apüra,
pwal ren ekewe nienifön sip me kow.
Iwe, repwe usun chök eu tanipi mi atütü ngeni koluk,
nge resap chüen aiengau.
13 Mürin, ekewe föpwül repwe meseik lon ar pwörük,
nge ekewe alüal me chinlap repwe pwapwa.
Üpwe awili ar letipeta ngeni pwapwa.
Üpwe achipeer o fang ngeniir pwapwa
akasiwilin ar lolilen.
14 Üpwe amötü ekewe souasor ren mongö mi annö,
nge nei aramas repwe mötüla ren ai kewe lifang mi somwola.
Ngang ewe Samol mi Lapalap üa kapas.”
15 Iei alon ewe Samol mi Lapalap,
“Aramas ra rongorong akürangen ngüngüres me kechüangau me lon Rama.
Rahel a kechüeiti nöün kana.
Esap mochen chipila,
pun resap chüen nom. ✡ Ken 35.16-19; Mat 2.18
16 Kopwe ükütiu le kechü
o tölüpwasei mesom,
pun om angang fän iten noum kewe
epwe wor lomotan,
repwe liwinto seni fanüen chon oputer.
17 Epwe wor om apilüköch lon kan fansoun mwom,
pun noum repwe liwinsefäl ngeni poputän fanüer.
Ngang ewe Samol mi Lapalap üa kapas.
18 Üa rongorong mine Israel a eäni ngüngü,
‘En ka amiritiei,
nge ngang üa küna amirit usun eman nienifön kow esamwo mirit.
Kopwe aliwiniei
pwe ngang üpwe liwin,
pun en ewe Samol mi Lapalap ai we Kot.
19 Mürin ai tokola senuk
üa ekieksefäl.
Mürin ai miritila
üa rorotiu fän letipeta.
Üa säw o itengau
pokiten ai tipis lealüali.’
20 Ifa usun, Israel esap nei mwän mi achengicheng?
Ifa usun, sap i nei üa pwapwa ren?
Inamwo ika üa kulu söküri ngeni,
nge üa chüen chechemeni.
Iei mine lelukei a positi i,
üpwe fokun eäni ümöümöch ngeni.
Ngang ewe Samol mi Lapalap üa kapas.
21 Kopwe fotuki asisil o asisila ewe al fän itom,
kopwe ekieköchü ewe alelap ka fetal won.
Kopwe liwinto, en Israel,
kopwe liwiniti om kewe telinimw.
22 Ifa ükükün fansoun om kopwe rikirikfetal, en Israel kosap allükülük?
Ngang ewe Samol mi Lapalap üa afisätä och mettoch mi fö o sokola won fanüfan:
Israel epwe fitipacheiti Kot.”
23 Iei alon ewe Samol mi Unusen Manaman ewe Koten Israel, “Lupwen üpwe aliwinisefäli ekewe aramas ngeni fanüer, repwe apasasefäli ekei kapas me lon ewe fanü Juta me telinimwan kewe,
‘Ewe Samol mi Lapalap epwe afeiöchuk,
en leni ia pwüng a nom ie,
en chuk mi pin.’ 24 Iwe, aramas repwe nonomfengen lon Juta me telinimwan kewe meinisin, epwe pwal wor chon tanipi me chon mas fiti nöür pwiin sip. 25 Üpwe apöchökülasefäli chokewe mi malülü o amongöni chokewe mi apwangapwangen echik.”
26 Ren ei üa nela o nennefetal, üa kinamwe lon ai annut.
Ewe pwon mi fö
31.27-40
27 Iei alon ewe Samol mi Lapalap, “Epwe war ewe fansoun, lupwen üpwe amasoua ewe fanü Israel me Juta ren aramas me man. 28 Iwe, usun üa mamasa ai üpwe üttiretä o kupiretiu, pwe üpwe atururetiu, ataretiu o afeiengaueer, iei usun üpwe pwal mamasa ai üpwe aüretä o fotukiir. 29 Lon ekana rän resap chüen apasa,
‘Ekewe sam ra ochoch föün wain mi mwoon,
nge nöür kewe ra niimwoon.’ ✡ Is 18.2 30 Pun ätewe mi ochoch föün wain mi mwoon epwe püsin niimwoon. Iwe, eman me eman epwe püsin mäla fän iten an tipis.”
31 Iei alon ewe Samol mi Lapalap, “Epwe war ewe fansoun üpwe föri eu pwon mi fö ngeni chon Israel me chon Juta. ✡ Mat 26.28; Mark 14.24; Luk 22.20; 1.Kor 11.25; 2.Kor 3.6 32 Ei pwon esap usun ewe pwon üa föri ngeni ar kewe lewo, lupwen üa amwöchü pöür o emwenirewu seni ewe fanü Isip. Ir ra atai ai pwon, inamwo pwe üa usun eman rereimw ngeniir. 33 Nge iei ewe pwon mi fö üpwe föri ngeni chon Israel lon ekana rän: Üpwe atolonga ai kewe allük lor o makeretiu lon leluker. Iwe, üpwe ar Kot, nge ir repwe nei aramas kana. ✡ Ipr 10.16 34 Esap wor eman epwe chüen aiti ngeni chon arun ika pwiin an epwe sileei, pun ir meinisin repwe sileei seni ewe mi kis tori ewe mi lap. Iwe, üpwe amusala ar föföringau, nge üsap chüen chechemeni ar tipis. Ngang ewe Samol mi Lapalap üa kapas.” ✡ Ipr 8.8-12; 10.17
35 Iei alon ewe Samol mi Lapalap,
ewe mi awisa akkar pwe epwe tin lerän
o allük ngeni maram me fü kana pwe repwe tin lepwin,
mi amwökütükütü ewe matau, pwe nonoon ra ngüngü,
itan ewe Samol mi Unusen Manaman,
36 “Are ekei akoten fän läng repwe ükütiu me fän mesei,
mürin ekewe chon Israel repwe pwal ükütiu le iteni eu mwü me fän mesei.
Ngang ewe Samol mi Lapalap üa kapas.
37 Are eman epwe tongeni aükü ekewe läng
o ouwasacha longolongun fanüfan,
mürin üpwe tongeni pöütala ekewe chon Israel
pokiten ar föför meinisin ra föriir.
Ngang ewe Samol mi Lapalap üa kapas.”
38 Iei alon ewe Samol mi Lapalap, “Epwe war ewe fansoun pwe ewe telinimw Jerusalem epwe kaüsefäl fän itei seni ewe imw tekia än Hananel me pelilotou tori ewe Asamalapen Pwokuku. 39 Iwe, seni ikenan ewe selin aükük epwe feil wenewenewu tori ewe chuk Karep, mürin epwe kul ngeni Koa. 40 Unusen ewe lemol ia ekewe somä me ewe falangen ekkei ra nom ie, pwal ekewe lemäl meinisin achöüala ngeni ewe oüwö Kitron tori lepwokukun ewe Asamalapen Oris awenewenen ötiu, ekei kinikin meinisin repwe pin fän itei. Ewe telinimw esap fokun chüen katatiu ika tala.”