1 Iwe, Apimelek nöün Kition we mwän a feila Sikem ren mongeen inan, pwal ren unusen än inan we eterekes, o kapas ngeniir, 2 “Oupwe asile ngeni chon Sikem meinisin ai kei kapas ais, ‘Met epwe öch ngenikemi? Ir me fik nöün Kition kewe mwän repwe nemenikemi, ika eman chök?’ Nge oupwe chechemeni pwe pwal ngang eman fitukemi me chami.” 3 Iwe, mongeen inan ra asile ngeni ekewe re Sikem ekei kapas meinisin fän itan. Mürin ra päi ngeni Apimelek pwe repwe eti, pun ra apasa, “I pwich.” 4 Iwe, ra ngeni Apimelek ükükün fik föün moni silifer seni lon ewe imwen Paal-perit. Nge ren ei moni Apimelek a möni mwän mi mwäneson me lomotongau, pwe repwe tapwela mürin. 5 Iwe, a feila ren imwen saman we lon Ofra o niela ükükün fik pwin kewe nöün Kition won eföü chök fau. Nge Jotam nöün Kition setiputur a chüen manau, pun a op. 6 Mürin, chon ewe telinimw Sikem meinisin me chon Pet-milo ra mwichefengen ren ewe üren achem fän ewe irä ook lon Sikem, o seikätä Apimelek pwe epwe nöür king.

7 Lupwen ei pworaus a tori Jotam, a feila o ütä won ungen ewe chuk Kerisim. Iwe, a leüömong le kökkö o kapas ngeniir, “Oupwe aüselingaei, ämi re Sikem, pwe Kot epwe pwal aüselingakemi. 8 A nonom, ekewe irä ra chufengen pwe repwe seikätä eman king, pwe epwe nemeniir. Iwe, ra üreni ewe irä olif, ‘Kopwe nemenikem.’ 9 Nge ewe irä olif a pälüeniir, ‘Ifa usun ai üpwe ükütiu le afisätä noppuk ekewe kot me aramas ra ling ren, pwe üpwe nemenikemi?’ 10 Mürin, ekewe irä ra üreni ewe irä fiik, ‘En kopwe feito o nemenikem.’ 11 Nge ewe irä fiik a pälüeniir, ‘Ifa usun ai üpwe ükütiu le afisätä uai mi mürina o arar, pwe üpwe feila o nemenikemi?’ 12 Iwe, ekewe irä ra pwal üreni ewe irän wain, ‘En kopwe feito o nemenikem.’ 13 Nge ewe irän wain a pälüeniir, ‘Ifa usun ai üpwe ükütiu le afisätä wain mi apwapwai ekewe kot me aramas, pwe üpwe feila o nemenikemi?’ 14 Mürin, ekewe irä meinisin ra üreni ewe iräfölüföl, ‘En kopwe feito o nemenikem.’ 15 Iwe, ewe iräfölüföl a pälüeni ekewe irä, ‘Are a wesewesen let ämi mochen seikieitä pwe üpwe ämi king, oupwe feito o op fän nüri. Nge are ousap mochen, ekkei epwe towu seni palei kewe mi föl o kenala ekewe irä setar won Lepanon.’ ”

16 Mürin, Jotam a üra, “Ifa usun, oua wesewesen föri mine a mürina o let ren ämi seikätä Apimelek pwe epwe king? Ifa usun, oua föri mine a pwüng ngeni Kition me chon leimwan o liwini ngeni semei ükükün mine a föri ngenikemi? 17 Oupwe chechemeni pwe semei a maun fän itemi, a fang manauan o amanauakemi seni chon Mitian. 18 Nge ämi oua ü ngeni chon leimwen semei ikenai o niela nöün kewe fik mwän won eföü chök fau. Iwe, oua seikätä Apimelek nöün nöün we chon angang fefin mwän pwe epwe king won chon Sikem pokiten i pwimi. 19 Are oua wesewesen föri mine a mürina o let ngeni Kition me chon leimwan ikenai, mürin oupwe pwapwaiti Apimelek, nge i epwe pwapwaitikemi. 20 Nge are esap iei usun, ekkei epwe küwu seni Apimelek o kenala chon Sikem me chon Pet-milo. Ekkei epwe pwal küwu seni chon Sikem me chon Pet-milo o kenala Apimelek.” 21 Iwe, Jotam a müttir ssä o süla, a tori Peer o nonom ikenan, pun a niuokusiti Apimelek pwin we.

22 Iwe, Apimelek a nemeni Israel lon ükükün ülüngat ier. 23 Mürin, Kot a tinato och ekingau lefilen Apimelek me ekewe re Sikem. Iwe, ekewe re Sikem ra kirikiringau ngeni Apimelek. 24 Ei a fis pokiten ewe föringau mi fis ngeni nöün Kition kewe fik mwän epwe wor chappan, pwe char epwe ukun Apimelek pwiir we mi nirela, epwe pwal ukun ekewe re Sikem mi apöchöküla ngeni pwe epwe niela pwin kewe. 25 Iwe, ekewe re Sikem ra tinala ekoch mwän pwe repwe asesera Apimelek me won ungen ekewe chuk. Ekewe mwän ra pwal angei fän pöchökül pisekin chokewe mi feila won ewe al. Ei pworaus a tori Apimelek.

26 Mürin, Kaal nöün Epet we mwän a mwöküt ngeni Sikem me aramasan. Nge ekewe re Sikem ra anomu ar apilükülük won Kaal. 27 Iwe, ekewe aramas ra feila lon ar kewe tanipin wain o kini ekewe föün irän wain, ra pwal üchü ekewe föün o föri eu kametip. Iwe, ra feila lon imwen ar kot, ra mongö o ün, ra pwal eäni kapasen turunufas usun Apimelek. 28 Mürin, Kaal a üra, “Iö Apimelek, pwe oukich chon Sikem sipwe angang ngeni? Ifa usun, sap i nöün Kition we mwän, nge Sepul kisin fan? Ousipwe angang ngeni ekewe mwirimwirin Hamor i semelapen chon Sikem. Pwota chök sipwe angang ngeni Apimelek? 29 Amwo ekei aramas repwe fen nom fän nemeniei. Mürin, üpwe asüela Apimelek, üpwe pwal üreni, ‘Kopwe achomongala noum sounfiu o feito pwe sipwe maun.’ ”

30 Iwe, lupwen Sepul ewe mi nemeni ewe telinimw a rongorong alon Kaal nöün Epet we mwän, a fokun song. 31 A tinala chon künö ren Apimelek mi nom Aruma, pwe repwe üreni, “Kaal nöün Epet we mwän me aramasan ra feito Sikem o atipetipa chon ewe telinimw pwe repwe ü ngonuk. 32 Iei mine kopwe feito lepwin, ämi me ekewe mwän mi nom reöm, nge oupwe chök witiwit lemäl. 33 Iwe, lesosorusich, lupwen akkar a tötä, oupwe pwätä o maun ngeni ewe telinimw. Nge lupwen Kaal me ekewe mwän mi nom ren ra towu pwe repwe maun ngonuk, kopwe föri ngeniir ükükün om tongeni.”

34 Iei mine Apimelek me ekewe mwän meinisin mi nom ren ra feito lepwin o op ünükün Sikem lon rüanü mwich. 35 Iwe, Kaal nöün Epet we mwän a towu o ütä leasamalapen ewe telinimw. Lon ena chök otun Apimelek me ekewe mwän mi nom ren ra ütä seni ar lenien op. 36 Lupwen Kaal a küna ekewe mwän, a üreni Sepul, “Nengeni, a wor mwän ra feito seni won ungen ekewe chuk.” Nge Sepul a üreni, “Ka chök küna ngünüen ekewe chuk ra usun mwän.” 37 Iwe, Kaal a pwal ürenisefäli, “Nengeni, a wor mwän ra feitiu seni lukalapen ewe fanü, nge eu mwich a pwal feito seni akawenewenen ewe ook soupwe ra pwee fan.” 38 Mürin, Sepul a üreni Kaal, “Ifa chök alom we ka üra, ‘Iö Apimelek pwe sipwe angang ngeni.’ Sap ikkei ir ekewe mwän ka turunufasei? Iei kopwe towu o maun ngeniir.” 39 Iwe, Kaal a emwenawu ekewe re Sikem o maun ngeni Apimelek. 40 Nge Apimelek a tapweri Kaal pwe a sü me mwan, nge chomong ra mäla won ewe al tori asamalapen ewe telinimw. 41 Iwe, Apimelek a nom lon Aruma, nge Sepul a asüela Kaal me aramasan, pwe resap chüen tongeni nonom lon Sikem.

42 Iwe, sorotän ewe rän ekewe aramasen Sikem ra feila lemäl. Nge Apimelek a rong usun. 43 Iei mine Apimelek a angei nöün kewe mwän o aimwüfeseniir lon ülüngat mwich. Iwe, ra op o witiwit lemäl. Nge lupwen Apimelek a küna pwe ekewe aramas ra towu seni ewe telinimw, a ütä pwe epwe maun ngeniir. 44 Iwe, Apimelek me an mwich mi eti ra müttir ssä ngeni asamalapen ewe telinimw o ütala lon, nge ekewe ruu mwich ra cheri meinisin mi nom lemäl o nirela. 45 Mürin, Apimelek a maun ngeni ewe telinimw lon unusen ewe rän tori a liapeni o niela aramasen lon. A pwal atai ewe telinimw o amorafeili salt won.

46 Iwe, lupwen aramasen ewe imw tekia lon Sikem ra rong mine a fis, ra tolong lon ewe leni mi pöchökül fän ewe imwenfelin El-perit. 47 Nge lupwen Apimelek a rong ewe pworaus, pwe ekewe aramas meinisin seni ewe imw tekia lon Sikem ra chufengen, 48 a feitä won ewe chuk Salmon, ir me ekewe mwän mi eti. Iwe, Apimelek a angei nöün we kouk, a pökü epilük mwüch o ekietä won afaran. A pwal üreni ekewe mwän mi eti, “Oupwe müttir le föri mine oua küna pwe ngang üa föri.” 49 Iei mine eman me eman leir a pökü epilük mwüch, a tapwela mürin Apimelek o isetiu won ewe leni mi pöchökül. Mürin ra kenala ewe mwüch, pwe ekewe aramas meinisin seni ewe imw tekia mi nom lon ewe leni ra mäla, ina epwe ükükün engeröü mwän me fefin.

50 Mürin, Apimelek a feila Tepes, a maun ngeni ewe telinimw o liapeni. 51 Nge a wor eu imw tekia mi pöchökül lukalapen ewe telinimw. Iwe, aramasen ewe telinimw meinisin ekewe mwän me fefin ra süiti ewe imw tekia. Ra apüngürelong lon o feitä won ewe imw. 52 Lupwen Apimelek a tori ewe imw tekia pwe epwe maun ngeni, a kan ngeni asamalapan pwe epwe keni. 53 Nge eman fefin a aturätiu eu nüüf seni fau won möküren Apimelek, pwe a amökkü pören möküran. ✡ 2.Sam 11.21 54 Mürin, Apimelek a müttir körato ewe alüal mi wisen uwei an tittin maun, o üreni, “Kopwe üttawu noum ketilas o nieila, pwe aramas resap üra rei pwe eman fefin a nieila.” Iwe, ewe alüal a posu pwe a mäla. 55 Nge lupwen ekewe re Israel ra küna pwe Apimelek a mäla, ra en me liwinla lon lenian. 56 Iei usun Kot a ngeni Apimelek chappen an tipis a föri ngeni saman ren an püsin niela pwin kewe fik. 57 Iwe, Kot a pwal föri pwe ekewe re Sikem ra angei chappen ar föföringau, usun Jotam nöün Kition we mwän a apasa lupwen a anümamaueer.