40
Kot a achipa Sion
40.1-11
1 “Oupwe achipa, oupwe achipa nei aramas kana,” ämi Kot a apasa.
2 Oupwe fos pwetete ngeni Jerusalem
o asile ngeni pwe an angangochou a wesila,
nge an tipis a musala.
Pun fän ruu a angei liwinin an tipis seni lepöün ewe Samol mi Lapalap.
3 A wor eu möngüngü mi leüömong,
“Oupwe amolätä alen ewe Samol mi Lapalap lon fanüapö,
oupwe awenala efoch alalap lon fanüpwas fän iten ach we Kot. ✡ Mat 3.3; Mark 1.3; Joh 1.23
4 Lemolun chuk meinisin repwe irela,
nge ekewe chuk meinisin repwe tekisonola.
Iwe, mine a sonongau epwe sonosonöch,
nge ekewe leni mi pukopuk repwe wiliti eu maasies.
5 Mürin, lingen ewe Samol mi Lapalap epwe pwäpwäla,
nge aramas meinisin repwe küna,
pun iei alon ewe Samol mi Lapalap.” ✡ Luk 3.4-6
6 A wor eu möngüngü a apasa, “Kopwe kökkö!”
Nge üa ais, “Met üpwe üra le kökkö?”
Kopwe kökkö pwe aramas meinisin ra wewe ngeni fetil,
nge linger meinisin a wewe ngeni pön irän lemäl.
7 Lupwen enienin ngasangasen ewe Samol mi Lapalap a enitiir,
ewe fetil a pwasala, ewe pön irä a morotiu.
Ellet, aramas meinisin ra chök wewe ngeni fetil.
8 Iwe, ewe fetil a pwasala, ewe pön irä a morotiu,
nge alon ach we Kot epwe nonom tori feilfeilachök. ✡ Jas 1.10-11; 1.Pet 1.24-25
9 Kopwe feitä won eu chuk mi tekia,
en mi uwato pworaus mürina ngeni Sion.
Kopwe leüömong le kökkö,
en mi uwato pworaus mürina ngeni Jerusalem.
Kopwe leüömong le kökkö, nge kosap niuokus,
kopwe aronga ngeni ekewe telinimwen Juta,
“Ämi we Kot a war.”
10 Kot ewe Samol mi Lapalap a feito pwe epwe nemenem fän pöchökül.
Nengeni, a uwato an liwin fän iten nöün aramas, nge liwiningau fän iten chon oputan. ✡ Ais 62.11; Pwär 22.12
11 Iwe, epwe tümwünü nöün mwichen sip usun eman chon mas,
epwe pwal achufengeni ekewe apanen sip o ekiretä fän mwärin,
nge ekewe inelapen sip epwe emwenirela fän kinamwe. ✡ Is 34.15; Joh 10.11
Ewe Koten Israel a tufich ngeni mettoch meinisin
40.12-31
12 Iö a tongeni aükü lölön lematau lon pöün,
ika aükü kiännin läng ren eangen pöün?
Iö a tongeni achufengeni pwülün won fanüfan lon eu sepi
ika kiloni ekewe chukutekia me ekewe chukutekison won eu kilo?
13 Iö a emweni Ngünün ewe Samol mi Lapalap,
nge iö souöüröür a aiti ngeni mine epwe föri? ✡ Rom 11.34; 1.Kor 2.16
14 Iö Kot a kütta an öüröür seni pwe epwe saram letipan,
iö a pwal aiti ngeni mine a pwüng?
Nge iö a atipachema pwe epwe wor an silelap me weweöch?
15 Ellet, ekewe mwü ra usun chök eu chiin koluk lon eu pwekit,
ra pwal wewe ngeni pwül moromor won eu kilo.
Ekewe fanüen lematau ra pwas usun chök pipisüsü me ren ewe Samol mi Lapalap.
16 Irän won Lepanon resap naf ngeni amwüchün asor,
nge ekewe mönün won resap pwal naf
ngeni asoren kek ngeni Kot.
17 Iwe, ekewe mwü meinisin esap wor aüchear fän mesan, pwe ra lomotongau usun mettoch mi pön.
18 Met om ekiek usun lapalapen Kot,
ika iö kopwe awewe ngeni?
19 Esap wewe ngeni eu uluulun anümwäl, eman chon ketel mächä a föri,
nge eman chon angang ngeni kolt a pwölüela ren kolt,
a pwal foutei ngeni sein seni silifer. ✡ Föf 17.29
20 Nge eman chon wöüngau esap tongeni eäni ei sokun asor,
a chök filätä irä esap kiroula.
Iwe, a kütta eman mi silelap le falafal,
pwe epwe falei uluulun eman anümwäl esap mwökütüküt.
21 Ifa usun, ousap silei, ousap pwal rongorong?
Ifa usun, esap wor eman a asile ngenikemi seni me lomlom?
Are ifa usun, ousap weweiti usun än fanüfan fisitä?
22 Kot ewe mi mot won an lenien motun king asen fanüfan a föri,
nge chon fanüfan ra fokun kükün, usun chök lifichimas.
I ewe a emeresala läng usun echö chenikam,
a pwal oletala usun eu imw mangaku pwe lenien nonom.
23 I a arosala ekewe samol
o awesi chon nemenem won fanüfan.
24 Ra usun chök irä mi pwukufö
ra kärän fotetiu, esamwo tö warer.
Nge lupwen Kot a tinato eu mölümöl,
ra pwasala o ässila usun chöpwasapwas.
25 Iwe, Ewe mi Pin a ais, “Iö oupwe awewe ngeniei,
nge iö a tongeni wewe ngeniei?”
26 Oupwe netä läng.
Iö a förätä masouan meinisin?
Iwe, Kot a emwenawu mwicheicher meinisin,
a pwal aita ngeniir iter.
Meinisin ra nom pokiten watten an tufich,
pwal ren pöchökülen an manaman.
27 Pwota ämi chon Israel oua apasa,
“Ewe Samol mi Lapalap esap silei äm riaföü,
äm Kot esap ekieki äm pwüng?”
28 Ousap silei usun? Are ousap rong usun?
Ewe Samol mi Lapalap eman Kot mi nonom tori feilfeilachök,
a föri unusen fanüfan.
Iwe, esap malülü, esap pwal achanü,
nge an tipachem esap wor aükükün.
29 A ngeni ekewe chon malülü pöchökül,
nge ekewe chon lipwäkingau a ngeniir tufich mi somwola.
30 Iwe, pwal mwo nge ekewe alüal ra malülü o achanü,
pwal ekewe alümau ra chepetek o turula.
31 Nge chokewe mi anomu ar apilükülük won ewe Samol mi Lapalap repwe angei pöchökül mi fö.
Repwe ässitä ren pöükässir usun chök ekewe asaf.
Repwe fefeil, nge resap achanü.
Repwe fetal, nge resap malülü.