26
Kölün lükü usun än Kot tümwün
26.1-21
1 Lon ena fansoun aramas repwe chietä ei köl lon ewe fanü Juta:
A wor rech eu telinimw mi pöchökül,
nge ren tittin mi nükünük sa küna manau.
2 Oupwe suki asamalapen ewe telinimw,
pwe ewe mwichen aramas mi pwüng
o allükülük epwe tongeni tolong lon.
3 Ka ngeni chokewe mi kamwöchünük womw kinamwe,
pun ra anomu ar apilükülük womw.
4 Iwe, oupwe lükü ewe Samol mi Lapalap fansoun meinisin,
pun Kot ewe Samol mi Lapalap eu achau tori feilfeilachök.
5 A atekisonätiu chokewe mi lamalamtekia.
A ataetiu ewe telinimw mi pöchökül ra imweimw lon,
o aturätiu tittin lepwül.
6 Iwe, chokewe mi nom lon riaföü me wöüngau
ra puri ewe telinimw.
7 Äm Samol mi Lapalap, ka asonosonöchü ewe al ekewe chon pwüng repwe fetal won,
ka pwal awenöchü ar kewe al.
8 Äm aia apwönüetä om kewe allük o anomu äm apilükülük womw.
Letipem a chök mochen chechemeni itom.
9 Iwe, üa posituk lepwin, üa küttok ren unusen letipei.
Lupwen ka apwüngü fanüfan,
chon fanüfan ra kaiö mine a pwüng.
10 Iei mwo nge ka eäni ümöümöch ngeni ekewe chon föföringau,
nge resap kaiö föförün pwüng.
Iwe, lon fanüen chon wenechar
ra chök föri mine a ngau,
resap ekieki om tekia me om ling, en äm Samol mi Lapalap.
11 Äm Samol mi Lapalap, ka aitietä poum pwe kopwe apwüngüür, nge resap mefi.
Kopwe aiti ngeniir usun om echeni noum aramas pwe repwe säw ren.
Nge ewe ekkei ka amolätä fän iten chon oputok epwe kenirela. ✡ Ipr 10.27
12 Äm Samol mi Lapalap, kopwe ngenikem kinamwe,
pun äm angang meinisin aia föri
en ka afisätä.
13 Äm Kot Samol mi Lapalap, chomong samol lukum ra nemenikem,
nge äm aia chök asomoluk.
14 Iei ra mäla, nge resap chüen manausefäl.
Ra wiliti sotup, nge resap chüen pwätäsefäl.
Ka apwüngüür o afeiengaueer,
ka föri pwe esap wor eman a chüen chechemeniir.
15 Nge en, äm Samol mi Lapalap, ka fokun achomongala aramasen ei mwü.
Ka pwal awattela kiännin fanüem.
Ren ei ka iteüöch.
16 Äm Samol mi Lapalap, aia küttok lon äm riaföü,
aia pwal iotek ngonuk, lupwen ka apwüngükem.
17 Usun eman fefin mi pwopwo a tori an cheuchen fam o kechü,
iei usun aia kechü fän mesom, äm Samol mi Lapalap.
18 Iwe, äm aia pwopwo, aia pwal cheuchen fam,
nge mine aia nöüni esap wor, pwe asepwäl chök.
Aisap atoto manau fän iten ewe fanü,
nge esap wor chon fanüfan mi up senikem.
19 Nge ir mi mäla senikem repwe manau,
inisir epwe manausefäl.
Ämi sotup mi möür fän pwül,
oupwe nela, oupwe köl fän pwapwa.
Usun amurenipwin a amanaua irän fanüfan,
iei usun ewe Samol mi Lapalap epwe amanaua
chokewe mi mäla me lomlom.
20 Oupwe tolong lon imwemi, ämi nei aramas, o apüngala asamemi. Iwe, oupwe aopakemi eu fansoun mochomoch tori än Kot song epwe wesila. 21 Iwe, ewe Samol mi Lapalap epwe towu seni lon lenian, pwe epwe apwüngü chon fanüfan pokiten ar tipis. Ewe angangen nimanau mi fis won fanüfan le monomon epwe pwäpwäla, nge ewe pwül esap chüen aopala chokewe mi ninnila.