1 Iei än Kot kapas usun Papilon: Usun eu ewiniär a äs seni ewe fanü Nekep, iei usun feiengau epwe feito seni ewe fanüapö, eu fanü mi eniwokus. 2 A wor künaei mi fokun amairü. Ewe chon solä a solä, nge ewe chon kata a atai. Ämi sounfiun Elam, oupwe maun, ämi sounfiun Metia, oupwe pwelifeili ekewe telinimw fän pisekin maun. Pun Kot epwe aükätiu ekewe riaföü meinisin ra pop seni Papilon. 3 Ren ei inisi a fokun metek, och cheuch a cheriei usun cheuchen fam a cheri eman fefin. Üa fokun niuokus ren mine üa rongorong, üa rükö ren mine üa küna. 4 A püngüpüng fän mwäri, inisi a chechech ren watten ai niuokus. Üa ösüküsükü lekuniol, nge lupwen üa tori, üa chök niuokus. 5 Iwe, lon künaei we üa küna pwe eu chepel a molotä, ekewe kieki ra meresila pwe aramas repwe mot won. Ra mongö o ün. Ämi meilapen sounfiu, oupwe ütä o amisi ämi tittin maun.

6 Mürin, ewe Samol a üreniei, “Kopwe feila o awisa eman chon mas, pwe epwe mamasa ewe leni o asile ngonuk mine a küna. 7 Iwe, lupwen epwe küna ruu telin chon wawa oris ika chon wawa aas me kamel, epwe fokun nenengenifichi.” 8 Iwe, ewe chon mas a leüömong le kökkö, “Ai samol, üa chök ükütä won ai lenien mamas lerän me lepwin.” 9 Mürin chök ekewe chon wawa oris ra war. Iwe, ewe chon mas a apasa, “A tur, a tur Papilon, ar kewe uluulun anümwäl ra mökküla o parasala le pwül.” ✡ Pwär 14.8; 18.2 10 Ämi nei aramasen Israel, chon oputakemi ra purikemi usun wiich. Iei üa asile ngenikemi mine üa rongorong seni ewe Samol mi Unusen Manaman, ewe Koten Israel.

11 Iei än Kot kapas usun Etom: Eman a kökkö ngeniei seni Etom, “Chon mas, ifa usun, a tori wilingäch? Ifa usun, esamwo ränila?” 12 Iwe, üa pälüeni, “A fen tori wilingäch, nge epwe pwal pwinsefäl. Are oua mochen ais, oupwe chök liwinsefäl o ais.”

13 Iei än Kot kapas usun Arapia: Ämi chon Tetan mi wawa kamel le sai o möür lein pötöwölün Arapia, 14 oupwe aünü ekewe chon kaka koluk. Ämi chon Tema, oupwe amongöü ekewe choisä. 15 Pun ir ra sü seni ekewe ketilas mi molotä ngeni ar repwe niela aramas, ra sü seni ekewe likapich mi mei, pwal seni feiengauen maun. 16 Iwe, ewe Samol a kapas ngeniei, “Mürin eu ier, iei ükükün fansoun än eman chon angang pwon, lingen chon ekewe ainangen Ketar meinisin epwe wesila. 17 Nge ekewe chon Ketar mi chüen manau, ir chon likapich me chon pwora, repwe chokükün. Ngang ewe Samol mi Lapalap, ewe Koten Israel, üa kapas.”