1 Iwe, ewe Samol mi Lapalap a apasa, “Nöün aramas, kopwe osuni usun ekewe chukun Israel o üreniir: Ämi chukun Israel, oupwe rongorong aloi 2 ngang Kot ewe Samol mi Lapalap: Chon oputakemi ra apasa usumi, ‘Ää, ekewe leni tekia mi nom seni me lomlom ra wiliti leniach.’ 3 Iei mine kopwe osuni o asile ngeniir mine ngang Kot ewe Samol mi Lapalap üa apasa: Lupwen ekewe mwü ünükümi ra liapenikemi o atakemi, ekewe lusun mwü ra lenienikemi, ra pwal ngününgünükemi o turunufaseekemi. 4 Iei mine oupwe rongorong aloi ngang Kot ewe Samol mi Lapalap, ämi kewe chukutekia me chukutekison, ämi kewe öüwö me lemol, pwal ämi kewe leni mi tatakis me ämi kewe telinimw ousap chüen so, mi oola o küna turunufas me ren chon ekewe mwü mi nom ünükümi. 5 Iei usun mine ngang Kot ewe Samol mi Lapalap üa apasa: Fän puropuren ai song üa pälüeni ekewe mwü mi nom ünükümi, pwal unusen ewe fanü Etom, pun ra angei fanüei pwe repwe fanüeni fän pwapwamongun letiper me ar turunufas, ra pwal liapeni ekewe leni a mär fetil lon fän iten enen man. 6 Iei mine kopwe osuni usun ewe fanü Israel o üreni ekewe chukutekia me chukutekison, pwal ekewe öüwö me ekewe lemol, pwe iei aloi ngang Kot ewe Samol mi Lapalap: Nengeni, fän puropuren ai lingeringer üa kapas, pun oua riaföü ren än chon ekewe mwü turunufaseekemi. 7 Iei mine ngang Kot ewe Samol mi Lapalap üa pwon fän akapel pwe ekewe mwü mi nom ünükümi repwe pwal püsin riaföü ren ar küna turunufas.

8 Nge ekewe chukun Israel repwe apwükü irä o afisätä ua fän itemi nei kewe aramasen Israel, pun oupwe müttir liwiniti fanüemi. 9 Iwe, üpwe pelienikemi o kul ngenikemi, üpwe pwal föri pwe epwe wor tanipi won fanüemi. 10 Üpwe achomongakemi ämi chon Israel. Ekewe telinimw repwe sosefäl, nge ekewe imw mi tala repwe kaüsefälitä. 11 Iwe, üpwe achomonga aramas me man won ewe fanü, oupwe oupwukemiitiu o chomongola. Üpwe asoi leniemi ren aramas usun lon ekewe fansoun lom, nge üpwe alapala feiöchümi seni me mwan. Mürin oupwe silei pwe ngang ewe Samol mi Lapalap. 12 Iwe, üpwe aliwinisefälikemi ämi nei aramasen Israel, pwe oupwe asosefäli ewe fanü o fanüeni, nge nöümi kewe resap chüen mäla ren echik me won. 13 Iei aloi ngang Kot ewe Samol mi Lapalap: Pokiten aramas ra apasa usun ewe fanü Israel, pwe a ochoch aramas o niela püsin nöün, 14 iei mine seni lon ei fansoun esap chüen ochoch aramas, esap pwal chüen niela püsin nöün. Ngang Kot ewe Samol mi Lapalap üa kapas. 15 Üpwe pinei än ekewe mwü kapasen turunufasei ewe fanü o aükätiu ar ämängaua. Üpwe pwal föri pwe ewe fanü esap chüen angei seni mwün Israel nöün kana. Ngang Kot ewe Samol mi Lapalap üa kapas.”

16 Iwe, ewe Samol mi Lapalap a kapas ngeniei, 17 “Nöün aramas, lupwen chon Israel ra nom lon püsin fanüer, ra alimengaua ren lapalapen ar föför. Iwe, ar föför a usun chök limengauen eman fefin, lupwen a tori an samaun maram. 18 Iei mine üa awarato ai lingeringer wor, pokiten ra nimanauei aramas lon ei fanü, pwal pokiten ekewe uluulun anümwäl ra alimengaua fanüer ren. 19 Iwe, üa apwüngüür won ükükün ar föför o atoropasafeiliir lein chon ekewe mwü, pwe ra toropasfetal lon ekewe fanü. 20 Nge lupwen ra tori chon ekewe mwü, ra aitengaua itei mi pin ekis meinisin, pun aramas ra apasa usur, ‘Inamwo ika ir nöün ewe Samol mi Lapalap aramas, nge ra chök towu seni fanüan.’ 21 Iwe, ngang üa ekiekin tümwünü iteüöchün itei mi pin, nge chon Israel ra chök aitengaua lein chon ekewe mwü ia ra feila ie.

22 Iei mine kopwe üreni ekewe chon Israel pwe iei aloi ngang Kot ewe Samol mi Lapalap: Mine üpwe föri, üsap föri fän itemi chon Israel, nge üpwe föri fän iten iteüöchün itei mi pin, oua aitengaua lein chon ekewe mwü ia oua feila ie. 23 Üpwe aüöchüsefäli pinin itei mi tekia, ämi oua aitengaua me lein chon ekewe mwü. Mürin chon ekewe mwü repwe silei pwe ngang ewe Samol mi Lapalap, lupwen üpwe pwäri ngeniir pwe üa pin me remi. Ngang Kot ewe Samol mi Lapalap üa kapas. 24 Iwe, üpwe angeekemi seni lein ekewe mwü o achufengenikemi seni lon ekewe fanü meinisin, üpwe pwal aliwinikemiilong lon püsin fanüemi. 25 Üpwe äsupu ngenikemi koluk mi fat pwe oupwe limöch. Üpwe alimöchükemi seni ämi limengauen tipis meinisin, pwal seni ämi kewe uluulun anümwäl meinisin. 26 Iwe, üpwe ngenikemi eu leluk mi fö, üpwe pwal fangelong lomi eman ngün mi fö. Üpwe angei me leutumi ewe leluk mi pöchökül usun fau o ngenikemi eu leluk mi pwetete. 27 Üpwe fangelong lomi Ngüni, pwe oupwe tümwünüöchü ai kewe pwüüng o aleasochisi ai kewe allük. 28 Oupwe nonom lon ewe fanü üa ngeni ämi kewe lewo. Iwe, oupwe nei aramas, nge ngang üpwe ämi Kot. ✡ Is 11.19-20 29 Üpwe angasakemi o limetikemi seni ämi limengauen tipis meinisin. Iwe, üpwe achomongato wiich, nge üsap chüen tinato lengita remi. 30 Üpwe achomongato uän ekewe irä o asomwala resin ekewe tanipi, pwe esap chüen wor lengita oupwe itengau ren me lein chon ekewe mwü. 31 Mürin oupwe chechemeni ämi lapalapangau me ämi föföringau, nge oupwe püsin anioputakemi pokiten ämi tipis me ämi föför mi anioput. 32 Üa mochen pwe oupwe fokun silei, pwe mine üpwe föri, üsap föri fän itemi, ämi chon Israel. Oupwe säw o itengau ren ämi föföringau. Ngang Kot ewe Samol mi Lapalap üa kapas.”

33 Iei alon Kot ewe Samol mi Lapalap, “Lon ena fansoun, lupwen üpwe limeti senikemi ämi tipis, üpwe asosefäli ekewe telinimw, nge ekewe imw mi tala repwe kaüsefälitä. 34 Iwe, aramas repwe tanipinisefäli ewe fanü mi tala, inamwo ika a fanüapö me mwan me ren chokewe mi pwerela lon. 35 Iwe, repwe apasa, ‘Ei fanü mi tala me lom a usun chök ewe tanipi Eten. Ekewe telinimw mi turula o tatakis, resap pwal chüen so, iei ra kaüsefälitä o so, a pwal pöchökül tittir.’ 36 Mürin, chon ekewe mwü mi chüen nom ünükümi repwe silei pwe ngang ewe Samol mi Lapalap, üa aüsefälietä ekewe telinimw mi tatakis, üa pwal tanipinisefäli mine a tala. Ngang ewe Samol mi Lapalap üa kapas, üpwe pwal apwönüetä.”

37 Iei alon Kot ewe Samol mi Lapalap, “Üpwe awirisefäli än chon Israel tüngor o achomongeer usun epwi pwiin sip. 38 Ekewe telinimw mi tatakis iei repwe masou ren mwicheichen aramas, usun Jerusalem a masou ren chomongun mönün asor lupwen fansoun ar kewe chulap mi pin. Mürin repwe silei pwe ngang ewe Samol mi Lapalap.”