1 Lon engol me ruuen ierin ach oola, lon aeuin ränin ewe engol me ruuen maram, ewe Samol mi Lapalap a kapas ngeniei, 2 “Nöün aramas, kopwe chietä echö kölün kechü usun Farao ewe kingen Isip. Iwe, kopwe üreni: Ka ekieki pwe en ka usun chök eman laion lein ekewe mwü, ngei ka usun chök eman alikitor mi nom leset. Ka mwetelong lon om kewe chanpupu o kümetätä pwülün lon ren pecheöm, pwe kolukun lon a pölök. 3 Iei aloi ngang Kot ewe Samol mi Lapalap. Üpwe aturala ai toloia womw ren eu mwichemongun aramasen chomong mwü. Ir repwe nukiiketä me lon ai toloia. 4 Iwe, üpwe aturukela won pwül, üpwe pwal pöütukela won eu leni mi amassawa o körato machangen fanüfan meinisin pwe repwe sotiu womw, nge mönün won unusen fanüfan repwe som le ocheek. 5 Iwe, üpwe atoropasafeili fitukom won ekewe chuk o amasoua ekewe lemol ren chum. 6 Üpwe achöchönü ewe fanü pwal tori ekewe chuk ren chaom, nge ekewe chanpupu repwe urela ren. 7 Lupwen üpwe niikela, üpwe pwölüela läng o akirocha ekewe fü, üpwe pwal achunoi akkar ren eu kuchu, nge maram esap chüen tin. ✡ Ais 13.10; Mat 24.29; Mark 13.24-25; Luk 21.25; Pwär 6.12-13; 8.12 8 Üpwe atopu ekewe saramen won läng o pwölüela fanüom ren rochopwak, ngang Kot ewe Samol mi Lapalap üa kapas.

9 Iwe, üpwe ariaföüü leluken aramasen chomong mwü, lupwen pworausen om feiengau epwe tori ekewe fanü kosamwo sileer me mwan. 10 Üpwe amairü aramasen chomong fanü pokitom, nge ar kewe king repwe rükö reöm, lupwen üpwe amwara ngeni meser nei ketilas. Iwe, lon ränin om feiengau repwe chechech fansoun meinisin eman me eman fän iten püsin manauan. 11 Pun iei aloi ngang Kot ewe Samol mi Lapalap ngeni ewe kingen Isip: Ewe ketilas nöün ewe kingen Papilon epwe feitiu womw. 12 Üpwe tinala sounfiu mi fokun pwora me mwänewüs lap seni sounfiun ekewe mwü, pwe repwe niela chomong noum aramas ren ketilas. Iwe, repwe awesi mine ka lamalamtekia won o arosala noum aramas meinisin. 13 Üpwe arosala noumw pwiin kow mi nom ünükün ekewe chanpupu. Iwe, esap chüen wor eman aramas ika man epwe fetal lon o apölökü. 14 Mürin üpwe alüai ekewe chanpupu pwe repwe pula usun lö. Ngang Kot ewe Samol mi Lapalap üa kapas. 15 Iwe, lupwen üpwe awili ewe fanü Isip ngeni fanüapö, lupwen üpwe angei meinisin mine a nom lon o arosala chon meinisin, mürin repwe silei pwe ngang ewe Samol mi Lapalap. 16 Iei ewe kölün kechü aramas repwe eäni lon ar letipeta fän iten Isip. Föpwülün ekewe mwü repwe eäni lupwen ar letipeta fän iten Isip me mwicheichen aramasan meinisin. Ngang Kot ewe Samol mi Lapalap üa kapas.”

17 Lon engol me ruuen ierin ach oola, lon engol me limuen ränin ewe aeuin maram ewe Samol mi Lapalap a kapas ngeniei, 18 “Nöün aramas, kopwe ngüngüres fän iten ekewe mwicheichen chon Isip. Kopwe atururetiu epin fanüfan fiti chon ekewe mwü mi pöchökül ren chokewe mi fen nom lon lenien sotup: 19 Kopwe üreniir,

20 Iwe, ekewe chon Isip repwe mäla lein chokewe ra fen mäla lon maun. Ewe ketilas a fen molotä. Oupwe nukieto Isip me mwicheichen aramasan meinisin. 21 Iwe, ekewe meilapen sounfiu mi pwora repwe apasa me lon ewe lenien sotup usun chon Isip me pelian kewe, ‘Ekewe aramas resap sirkomsais ra mäla lon maun, ra feitiu ikei o konola.’

22 Asiria a pwal nom lon ei leni fiti nöün mwicheichen sounfiu meinisin ra nom ünükün lon peiaser. Iwe, ir meinisin ra mäla lon maun. 23 Peiaser kewe ra nom epin ewe lenien sotup, nge nöün mwicheichen sounfiu ra kon ünükün peiasan. Iwe, ir meinisin ra mäla lon maun, nge me lom ra afisätä niuokus won fanüen chon manau.

24 Elam a pwal nom, nge nöün mwicheichen sounfiu ra kon ünükün peiasan. Ir meinisin ra mäla lon maun. Iwe, me lom ra afisätä niuokus won fanüen chon manau, nge iei ra feitiu leutun fanüfan, ir chokewe resap sirkomsais, ra pwal uwei ar itengau fiti chokewe ra fen nom lon ewe lenien sotup. 25 Ra ngeni Elam an lenien kon lein chokewe mi mäla lon maun, nge nöün mwicheichen sounfiu ra peias ünükün. Ir meinisin resap sirkomsais ra mäla lon maun. Me lom ra afisätä niuokus won fanüen chon manau, nge iei ra kon lein chokewe mi mäla, ra uwei ar itengau fiti chokewe ra fen nom lon ewe lenien sotup.

26 Mesek me Tupal ra pwal nom lon ei leni, nge peiasen nöür mwicheichen sounfiu meinisin ra nom ünükür. Ir meinisin resap sirkomsais, ra mäla lon maun. Nge me lom ra afisätä niuokus won fanüen chon manau. 27 Iwe, resap peias usun ekewe chon pwora mi mäla me lomlom, chokewe mi feitiu lon ewe lenien sotup fän ar pisekin maun, fän nöür ketilas mi nom fän mökürer me ar tittin maun mi nom wor. Ekei chon pwora ra afisätä niuokus won fanüen chon manau me lom. 28 Pwal en, Farao, kopwe mäla o kon lein chokewe resap sirkomsais, lein chokewe mi mäla lon maun.

29 Etom a pwal nom fiti an kewe king me samol. Ikamwo ir sounfiu mi pwora, nge ra chök peiasfengen me chokewe mi mäla lon maun. Ra kon ren chokewe resap sirkomsais, ra fen feitiu lon lenien sotup.

30 Iwe, ekewe samol meinisin seni efeng, pwal ekewe chon Siton meinisin ra nom. Ra feitiu fän ar säw ren chokewe mi ninnila, inamwo ika ar pwora a eniwokusu aramas me lom. Ir chokewe resap sirkomsais, ra kon ren chokewe mi mäla lon maun, ra pwal uwei ar itengau fiti chokewe mi feitiu lon ewe lenien sotup. 31 Iwe, Farao me nöün mwichen sounfiu repwe chipila lon ar feiengau, lupwen repwe küna chokewe meinisin mi mäla lon maun, iei aloi ngang Kot ewe Samol mi Lapalap. 32 Pun me lom üa föri pwe Farao a afisätä niuokus won fanüen chon manau. Nge iei i me nöün mwicheichen sounfiu repwe mäla o peiasfengen me chokewe resap sirkomsais, ra fen mäla lon maun,” iei alon Kot ewe Samol mi Lapalap.