1 Mürin, ewe Samol mi Lapalap a kapas ngeni Moses, “Kopwe feila ren Farao, pun ngang üa fen aföreai letipan me letipen nöün kewe nöüwis, pwe üpwe föri ekewe manaman me leir. 2 Nge en kopwe eäni apworaus ngeni noum me nöün noum mine üa föri ngeni chon Isip, pwal usun ekewe manaman üa föri me leir. Ren ei oupwe silei pwe ngang ewe Samol mi Lapalap.”

3 Iwe, Moses me Aaron ra feila ren Farao o üreni, “Iei alon ewe Samol mi Lapalap än chon Ipru we Kot, ‘Ifa ükükün fansoun om kosap mochen atekisonok me fän mesei? Kopwe mwüt ngeni nei aramas pwe repwe feila o fel ngeniei. 4 Pun ika kosap mochen mwüt ngeni nei aramas pwe repwe feila, lesor üpwe le awarato lifichimas lon fanüom. 5 Repwe pwölüela unusen ewe fanü, pwe ewe pwül esap chüen ling. Iwe, repwe eni met lusun ewe ütten fau esap atai, repwe pwal eni fotämi irä meinisin mi nom lemäl. 6 Iwe, imwom epwe ur rer, pwal imwen noum kewe nöüwis me imwen chon Isip meinisin. Sememi me semen sememi resap mwo küna ei sokun fän eu, seni fansoun ar uputiu tori ikenai.’ ” Mürin, Moses a kul seni Farao o feila.

7 Mürin, nöün Farao kewe nöüwis ra aisini Farao, “Ifa ükükün fansoun än ewe mwän epwe afeiengauakich? Kopwe mwüt ngeni ekewe mwän pwe repwe feila o fel ngeni ewe Samol mi Lapalap ar we Kot. Kose mwo silei pwe Isip a tala?” 8 Iwe, ra aliwinato Moses me Aaron ren Farao, nge a üreniir, “Oupwe feila pwe oupwe fel ngeni ewe Samol mi Lapalap ämi we Kot. Nge iö kana repwe feila?” 9 Moses a üreni, “Äm aipwe feila fiti nöüm kükün me chinlap, nöüm mwän me fefin pwal nöüm kewe sip me kow. Pun äm aipwe föri eu chulap ngeni ewe Samol mi Lapalap.” 10 Mürin, Farao a pälüeniir, “Ewe Samol mi Lapalap epwe etikemi ika üpwe mwüt ngenikemi me nöümi kana kükün pwe oupwe feila. A pwä pwe oua ekiekingau. 11 Apwi! Ämi mwän chök oupwe feila o fel ngeni ewe Samol mi Lapalap, pun iei ämi tüngor.” Iwe, ra asüela Moses me Aaron seni fän mesen Farao.

12 Mürin, ewe Samol mi Lapalap a üreni Moses, “Kopwe aitiela poum won ewe fanü Isip pwe ekewe lifichimas repwe feito won ewe fanü o eni irän lon, ekewe irä meinisin mi chüen nom mürin ewe ütten fau.” 13 Iei mine Moses a aitiela wokun won ewe fanü Isip, nge ewe Samol mi Lapalap a awarato asepwälin ötiu won ewe fanü lon unusen ewe rän me pwin. Nge sorotän ewe rän ewe asepwälin ötiu a fen awarato ekewe lifichimas. 14 Iwe, ekewe lifichimas ra wareiti unusen ewe fanü Isip o sotiu won. Ei sokun ochochen pwiin lifichimas ese mwo pwäpwä me mwan, esap pwal pwä me mürin. 15 Ekewe lifichimas ra pwölüela won unusen ewe fanü pwe a kiroch rer. Ra eni irän ewe fanü meinisin mi chüen nom mürin ewe ütten fau, pwal uän ekewe irä. Esap chüen wor och mi arauarau won ekewe irätam me iräkis won unusen ewe fanü Isip. ✡ Pwär 9.2-3 16 Iwe, Farao a müttir titi Moses me Aaron o üreniir, “Üa tipis ngeni ewe Samol mi Lapalap ämi we Kot, pwal ngenikemi. 17 Iei oupwe amusala ai tipis pwal fän eu, oupwe iotekin tüngor ngeni ewe Samol mi Lapalap ämi we Kot pwe epwe angasaei seni ei mäfeiengau.” 18 Mürin, Moses a feila seni Farao o iotekin tüngor ngeni ewe Samol mi Lapalap. 19 Iwe, ewe Samol mi Lapalap a siwili ewe asepwälin ötiu ngeni enienin lotou a ässätä ekewe lifichimas o pönirelong lon ewe Setipar. Esap fokun nonom mwo eman lifichimas lon unusen ewe fanü Isip. 20 Nge ewe Samol mi Lapalap a aföreai letipen Farao pwe esap mwüt ngeni ekewe aramasen Israel repwe feila.

21 Mürin, ewe Samol mi Lapalap a üreni Moses, “Kopwe aitietä poum läng pwe epwe fis rochopwak won ewe fanü Isip, eu rochopwak esap wor eman a tongeni emereirei lon.” 22 Iei mine Moses a aitietä pöün läng. Iwe, a fis rochopwak watte lon unusen ewe fanü Isip lon ükükün ülüngat rän. ✡ Kölf 105.28; Pwär 16.10 23 Ekewe chon Isip resap tongeni künafengeniir, esap pwal wor eman mi mwöküt seni lenian lon ükükün ülüngat rän. Nge lon lenien aramasen Israel a wor saram. 24 Mürin, Farao a körato Moses o üreni, “Oupwe feila o fel ngeni ewe Samol mi Lapalap, nöümi ra pwal tongeni etikemi, nge oupwe chök likitätiu foleniemi sip me kow.” 25 Nge Moses a üreni, “Kopwe mwüt ngenikem man fän iten sokun asor me asoren kek, pwe aipwe tongeni asor ngeni ewe Samol mi Lapalap äm we Kot. 26 Äm aipwe pwal uwei foleniem man. Esap fokun wor eman leir epwe tiwetiu. Äm aipwe püsin angei seni foleniem man fän iten äm fel ngeni ewe Samol mi Lapalap äm we Kot. Äm aisap mwo silei meni sokun man ika ifa ükükün aipwe eäni asor ngeni ewe Samol mi Lapalap, tori aipwe tikeri ewe leni.” 27 Nge ewe Samol mi Lapalap a aföreai letipen Farao, pwe esap mwüt ngeniir pwe repwe feila. 28 Iwe, Farao a üreni Moses, “Kopwe sü seniei. Kopwe afäliik pwe kosap künasefäli mesei, pun lon ewe rän kopwe küna mesei kopwe fokun mäla.” 29 Nge Moses a üra, “Mi pwüng reöm. Üsap künasefäli mesom.”