1 Ikkei kapasen ewe pwon ewe Samol mi Lapalap a allük ngeni Moses fän iten ekewe aramasen Israel me lon ewe fanü Moap, lükün ewe pwon a fen föri ngeniir me fäsonun ewe chuk Horep.

2 Iwe, Moses a körifengeni chon Israel meinisin o üreniir, “Oua küna meinisin mine ewe Samol mi Lapalap a föri fän mesemi ngeni Farao ewe kingen Isip, ngeni nöün kewe nöüwis meinisin, pwal ngeni unusen fanüan. 3 Oua püsin küna ekewe riaföü mi watte, ekewe asisil me ekewe manaman mi lapalap. 4 Nge tori ikenai ewe Samol mi Lapalap esap ngenikemi ekiek mi mirit, mas mi nenela me seling mi rongorong. 5 Iwe, a emwenikemi lon ewe fanüapö lon ükükün faik ier. Üfemi oua üföüf pwal ipwemi sus resap kamwala. 6 Ousap mongö pilawa, ousap pwal ün wain ika sokopaten minen ün. Ewe Samol mi Lapalap a föri ei pwe oupwe silei pwe i ämi Kot. 7 Nge lupwen sa tori ei leni, Sihon ewe kingen Hespon pwal Ok ewe kingen Pasan ra feito pwe repwe maun ngenikich, nge sa akufuur. ✡ Num 21.21-30; Num 21.31-35 8 Sa angei fanüer o ngeni chon ewe ainangen Rupen me Kat me esopun ewe ainangen Manasa, pwe repwe fanüeni. ✡ Num 32.33 9 Iei mine oupwe tümwünüöchü le apwönüetä kapasen ei pwon, pwe oupwe fefeitä lon meinisin mine oua föri.

10 Iwe, ikenai ämi meinisin oua ü fän mesen ewe Samol mi Lapalap ämi we Kot. Ekewe mwänirelan ämi ainang, nöümi souakom me nöümi kewe meilap, ekewe re Israel meinisin, 11 nöümi semirit me pwülüemi, ekewe chon ekis mi nom leimi, ir ätekewe mi os ämi mwüch o üfi ünümemi koluk, 12 ämi meinisin oua ü ikei, pwe oupwe tolong fän ewe pwon mi fis fän akapel, ewe Samol mi Lapalap ämi we Kot a föri ngenikemi ikenai. 13 Ei pwon a aükemiitä ikenai pwe ämi oupwe nöün aramas, nge i epwe ämi Kot, usun a fen pwon ngeni ämi kewe lewo, ngeni Apraham, Isaak me Jakop. 14 Iwe, ewe Samol mi Lapalap a föri ei pwon fän akapel, sap ngenikemi chök, 15 pwe pwal ngeni mwirimwirich resamwo uputiu, usun chök ngenikich meinisin mi nom ikei ikenai fän mesen ewe Samol mi Lapalap ach we Kot.

16 Iwe, oua silei usun ach nonom lon ewe fanü Isip, pwal usun ach pwerelong lukalapen fanüen chon ekewe mwü sa lu seniir. 17 Oua küna ar kewe uluulun anümwäl mi anioput ra för seni mwüch me fau, seni silifer me kolt. 18 Oupwe afälikemi pwe esap wor me leimi eman mwän ika fefin, eu famili ika eu ainang ikenai epwe tokola seni ewe Samol mi Lapalap ach we Kot, pwe epwe feila o fel ngeni koten ekewe mwü. Pun ika eman epwe föri iei usun, epwe usun chök waaren efoch irä pwennan a märitä o uani ua mi poison me maras, ✡ Ipr 12.15 19 Oupwe pwal afälikemi pwe esap wor eman me leimi a püsin ikeetä, lupwen a rong kapasen ei pwon mi fis fän akapel o ekieki lon lelukan, ‘Üpwe chök feiöch, inamwo ika üa chei mochenin lelukei mi ülöförea.’ Ei epwe chök afeiengaua ämi meinisin, chokewe mi mürina me chokewe mi ingau. 20 Iwe, ewe Samol mi Lapalap esap amusala än ätewe tipis. An song me an lukomong epwe küw ewe mwän, nge ekewe anümamau meinisin ra mak lon ei puk repwe nonom won, tori ewe Samol mi Lapalap epwe amoola itan seni won fanüfan. 21 Ewe Samol mi Lapalap epwe aimwüela ewe mwän seni chon ekewe ainangen Israel meinisin, pwe epwe afeiengaua ren ekewe anümamau meinisin ra nom lon ewe pwon mi mak lon ei puken allük.

22 Iwe, ekewe täppin aramas repwe up me mürin, ir mwirimwirimi kewe me ekewe chon ekis mi feito seni fanü toau repwe küna feiengauen ewe fanü me samaun chon, ewe Samol mi Lapalap epwe aworato wor. 23 Unusen ewe fanü epwe fokun tala o pönüla ren pirimston me salt, pwe esap wor eman a tongeni fotuki ika ämärätä och won, esap pwal pwük fetil won. Ewe fanü epwe usun chök Sotom me Komora, Atma me Sepoim, lupwen ewe Samol mi Lapalap a ataarala lon an song me lingeringer. ✡ Ken 19.24-25 24 Iwe, chon ekewe mwü meinisin repwe ais, ‘Pwota ewe Samol mi Lapalap a föri iei usun ngeni ewe fanü? Met popun a kon watte an song?’ 25 Mürin, aramas repwe apasa, ‘Popun a fis ei pwe ekewe chon Israel ra atai ewe pwon ewe Samol mi Lapalap än ar kewe lewo we Kot a föri ngeniir, lupwen a emwenirewu seni ewe fanü Isip. 26 Iwe, ra feila o angang ngeni pwal ekoch kot o fel ngeniir, sokun kot resap sileer me mwan, Kot esap pwal mwüt ngeniir pwe repwe fel ngeniir. 27 Iei mine ewe Samol mi Lapalap a fokun song ngeni nöün aramas o awarato won ei fanü ekei anümamau meinisin mi mak lon ei puk. 28 Iwe, ewe Samol mi Lapalap a wiiretä seni fanüer lon an song me chou me lingeringer watte o monerela lon pwal eu fanü, usun a fis ikenai.’

29 Iwe, ekewe mettoch mi monomon än ewe Samol mi Lapalap ach we Kot. Nge ekewe mettoch mi pwäpwäla kapasen ei allük meinisin ach me än nöüch kana tori feilfeilachök, pwe sipwe aleasochisiir.”