1 “Iwe, oupwe echeni ewe Samol mi Lapalap ämi we Kot o aleasochisi an akot, an öüröür, an kewe allük me pwüüng iteiten fansoun meinisin. 2 Ikenai oupwe chechemeni pwe sap nöümi kewe mi küna ika mefi än ewe Samol mi Lapalap emirit, pwe ämi. Oua küna an tekia me pöün mi manaman o aköüpöü. 3 Iwe, oua küna an kewe manaman me an kewe föför a föriir me lon Isip ngeni Farao ewe kingen Isip me unusen fanüan. ✡ Eks 7.8–12.13 4 Oua pwal küna mine a föri ngeni ewe mwichen sounfiun Isip, ngeni nöür oris me war woken, usun an amopuretiu lon ewe Setipar, lupwen ra tapwerikemi, pwal usun än ewe Samol mi Lapalap a aroserela. ✡ Eks 14.28 5 Iwe, oua silei mine a föri ngenikemi me lon ewe fanüapö tori oua feito lon ei leni, 6 pwal mine a föri ngeni Tatan me Apiram nöün Eliap kewe mwän seni ewe ainangen Rupen. Oua küna usun ewe pwül a sangfesen o oromirela fän mesen chon Israel meinisin fiti chon leimwer, pwal imwer imw mangaku, nöür chon angang me nöür man meinisin mi nom rer. ✡ Num 16.31-32 7 Iwe, oua püsin küna ren mesemi ekei föför mi manaman meinisin ewe Samol mi Lapalap a föri.”

8 “Iwe, oupwe aleasochisi ekewe allük üa allük ngenikemi ikenai, pwe oupwe pöchökül le feila pekilan ewe chanpupu Jortan o tolong lon ewe fanü oupwe le pwerelong lon pwe oupwe fanüeni. 9 Iwe, ren ämi aleasochisi ekewe allük, oupwe pwal manauatam lon ewe fanü ewe Samol mi Lapalap a pwon fän akapel ngeni ämi kewe lewo pwe epwe ngeniir me mwirimwirir, ewe fanü mi pwülüöch o fanüeräs. 10 Pun ewe fanü oupwe le tolong lon pwe oupwe fanüeni esap usun ewe fanü Isip oua towu seni. Ikenan oua angang weires le fotuki föün irä o föri warawar, pwe koluk epwe puwu ngeniir, usun eman a föri ngeni eu tanipin iasai. 11 Nge ewe fanü oupwe le pwerelong lon pwe oupwe fanüeni eu fanüen chukuchukutä me lemol mi chöchön ren üt seni läng, 12 pwal eu fanü ewe Samol mi Lapalap ämi we Kot a tümwünü. Iwe, mesan a nenengeni ewe fanü seni lepoputän eu ier tori lesopolan.

13 Iwe, are oua aleasochisi ekewe allük üa allük ngenikemi ikenai, pwe oupwe echeni ewe Samol mi Lapalap ämi we Kot o angang ngeni seni unusen lelukemi me unusen ngünümi, 14 i epwe fang ngenikemi üt fän iten fanüemi lon fansoun öch, epwe ngenikemi ewe ütten leefen me ütten leräs, pwe oupwe tongeni ionalong kiniemi föün wiich me föün wain me ämi föün olif, pwe epwe wor ämi apüra. 15 Iwe, epwe apwükü fetil lon ämi tanipi fän iten nöümi pwiin kow, nge ämi oupwe mongö o mötüla. 16 Oupwe afälikemi pwe ousap tupula o tokola ren ämi angang ngeni pwal ekoch kot o fel ngeniir. 17 Iwe, are oupwe föri iei usun, ewe Samol mi Lapalap epwe song ngenikemi. Epwe apüngala läng pwe esap püng üt, nge ewe fanü esap ua. Mürin oupwe müttir rosola seni ewe fanü mi mürina, ewe Samol mi Lapalap epwe ngenikemi. ✡ Lif 26.3-5; Tut 7.12-16; 28.1-14

18 Iei mine oupwe atolonga ai kei kapas lon lelukemi pwal lon ämi ekiek. Oupwe fötiretä won pöümi pwe eu pisekin achem, oupwe pwal fötiretä won chamwemi. 19 Iwe, oupwe aiti ngeni nöümi kewe ekei kapas, oupwe fos usur lupwen oua mot lon imwemi pwal lupwen oua fetal won al, lupwen oua konola pwal lupwen oua pwätä. 20 Oupwe makeretä won penkasamen imwemi pwal won asamalapen ämi kewe telinimw, ✡ Tut 6.6-9 21 pwe ränin manauemi me ränin manauen nöümi repwe chomongola me lon ewe fanü ewe Samol mi Lapalap a pwon fän akapel ngeni ämi kewe lewo pwe epwe ngeniir lon ükükün fansoun läng a nom asen fanüfan. 22 Iwe, are oua achocho le föri pwüngün ekei allük meinisin üa allük ngenikemi pwe oupwe apwönüretä, are oua echeni ewe Samol mi Lapalap ämi we Kot o föri meinisin mine a allük ngenikemi, are oua pwal fitipacheiti, 23 mürin ewe Samol mi Lapalap epwe asüela me mwemi chon ekei mwü meinisin, oupwe pwal fanüeni fanüen chon ekewe mwü mi watte o pöchökül senikemi. 24 Ekewe leni meinisin ia pechemi repwe ipwelong ie epwe fanüemi. Iwe, kiännin fanüemi epwe seni ewe fanüapö mi nom ör tori ewe chuk Lepanon mi nom efeng, pwal seni ewe chanpupu Oifrat mi nom ötiu tori ewe matau watte mi nom lotou. 25 Iwe, esap wor eman aramas epwe tongeni ü ngenikemi. Ewe Samol mi Lapalap epwe föri pwe oupwe eu minen eniwokus me eniweniw ngeni chon ewe fanü meinisin ia oupwe ipwelong ie, usun a fen pwon ngenikemi. ✡ Jos 1.3-5

26 Nengeni, ikenai üa anomu mwemi feiöch me anümamau. 27 Oupwe feiöch are oua aleasochisi än ewe Samol mi Lapalap ämi we Kot kewe allük üa ngenikemi ikenai. 28 Nge oupwe anümamau, are oua aleasolap ngeni än ewe Samol mi Lapalap ämi we Kot kewe allük, are oua tok seni ekei allük üa ngenikemi ikenai o fel ngeni pwal ekoch kot ousap sileer me lom. 29 Iwe, lupwen ewe Samol mi Lapalap ämi we Kot epwe emwenikemiilong lon ewe fanü oupwe le pwerelong lon pwe oupwe fanüeni, oupwe apasa ewe kapasen feiöch seni won ewe chuk Kerisim, nge ewe kapasen anümamau seni won ewe chuk Epal. ✡ Tut 27.11-14; Jos 8.33-35 30 (Ekei chuk ra nom pekilan ewe chanpupu Jortan lotoun ewe al sasape ngeni epiläng lon fanüen chon Kanaan mi nonom lon Arapa awenewenen Kilkal ünükün ewe irä ook mi nom lon More.) 31 Ämi oupwe le feila pekilan ewe chanpupu Jortan, pwe oupwe fanüeni ewe fanü ewe Samol mi Lapalap ämi we Kot epwe ngenikemi. Iwe, lupwen oupwe fanüeni o nonom lon, 32 oupwe tümwünüöchü le apwönüetä ekewe allük me pwüüng meinisin üa ngenikemi ikenai.”