1 Iwe, a wor künaei seni Kot ewe Samol mi Lapalap. Üa küna eu chükün föün irän leres. 2 Iwe, ewe Samol mi Lapalap a aisiniei, “Amos, met ka küna?” Nge üa pälüeni, “Üa küna eu chükün föün irän leres.” Mürin, ewe Samol mi Lapalap a üreniei, “A tori sopolan fän iten nei aramasen Israel. Üsap chüen siwili ai ekiekin apwüngüür. 3 Lon ena fansoun kölün lon ewe imwen king epwe wiliti ngüngüres. Epwe wor somä ekis meinisin. Repwe atururowu lükün, nge esap wor eman epwe fos.” Iei usun mine Kot ewe Samol mi Lapalap a apasa.

4 Mürin, Amos a üra: Oupwe rongorong ämi mi purätiu ekewe chon mwelele o niela ekewe chon wöüngau me lon ei fanü. 5 Oua apasa, “Inet ewe chulapen popun maram epwe wes, pwe sipwe tongeni amömö föün wiich? Inet ewe ränin sapat epwe wes, pwe sipwe tongeni popuetä le amömö? Mürin sia tongeni akükünätiu ewe aükük o alapätä ewe liwin, pwe sipwe föri angangen atuputup ren eu kilo mi mwäl. 6 Sia tongeni amömöla ekewe wiich mi aücheangau ren eu liwin mi watte. Sipwe möni ewe chon wöüngau pokiten esap tongeni mönätiu an liwinimang me ewe chon mwelele ren ükükün liwinin eu pea chori.”

7 Iwe, ewe Samol mi Lapalap än chon Israel we Kot a akapel, “Ellet, üsap fokun manlükala eu lein ar kewe föför mi ngau. 8 Ifa usun, ewe fanü esap chechech pokiten ei föför, nge chokewe meinisin mi nom lon resap letipeta? Ewer, unusen ewe fanü epwe chechech, epwe pwotä o morotiu usun kolukun ewe chanpupu Nil lon Isip.”

9 Iwe, Kot ewe Samol mi Lapalap a apasa, “Lon ena fansoun üpwe föri pwe akkar epwe tuputiu leoloas, nge fanüfan epwe rochola lerän. 10 Üpwe awili ämi kewe fansoun chulap ngeni fansoun letipeta me ämi kölün pwapwa ngeni kölün kechü. Üpwe föri pwe ämi meinisin oupwe üföüf üf seni tuk o räisöüla möküremi. Lon ena fansoun üpwe föri pwe oupwe letipeta usun eman a letipeta ren nöün aleman mi mäla. Meinisin mine a fis epwe sopolong lon riaföü. 11 Epwe war ewe fansoun lupwen üpwe tinato lengita won ewe fanü. Esap eu echiken mongö ika kakan koluk, nge i eu mwonen än aramas repwe mochen rong än ewe Samol mi Lapalap kapas. Ngang Kot ewe Samol mi Lapalap üa kapas. 12 Aramas repwe saifetal seni ötiu tori lotou, pwal seni efeng tori ör. Repwe saifeil o kütta än ewe Samol mi Lapalap kapas, nge resap fokun küna.

13 Lon ena fansoun ekewe föpwül mi liöch me ekewe alüal mi pöchökül repwe turula ren ar kaka. 14 Chokewe mi akapelü Asima ewe anün Samaria o apasa, ‘Mwo manauen ewe koten Tan,’ ika ‘Mwo manauen ewe koten Persepa,’ ir repwe turula, nge resap fokun üsefälitä.”