1 Kosap apwüngüchou eman mwän mi chinlap, nge kopwe chök fönöü usun itä nge om kopwe fönöü semom. Kopwe fönöü ekewe alüal usun itä nge ir pwiüm kewe. 2 Kopwe fönöü ekewe chinlap fefin usun itä nge ir inelap, kopwe pwal fönöü ekewe föpwül usun itä nge ir fefinom. Kopwe föri ei ren limöchün lelukom.

3 Kopwe meniniti ekewe fefin mi mä pwülüer, chokewe mi wesewesen akaleman, esap wor eman a tümwünüür. 4 Nge ika eman fefin mi mä pwülüan a wor nöün ika nöün nöün, ir repwe akomwen apwönüetä pwüngün wiser lon ar souläng ngeni püsin ar famili. Ren ei repwe liwini ngeni semer me iner, pwal ngeni semen me inen semer me iner mine ra piin föri ngeniir, pun iei met Kot a pwapwa ren. 5 Eman fefin mi mä pwülüan o akaleman, esap wor eman a tümwünü, a anomu an apilükülük won Kot, a sopwela le iotek lerän me lepwin o tüngor ngeni Kot pwe epwe alisi. 6 Nge eman fefin mi mä pwülüan nge a chök apwapwai inisin lon sokun pwapwan fanüfan, neminei a fen mäla, inamwo ika a chüen manau lon inisin. 7 Kopwe aiti ngeni ekewe aramas ekei kapasen öüröür, pwe esap wor och mine eman epwe atipisimwäliir won. 8 Nge are eman esap püsin tümwünü aramasan, fokun püsin chon an famili, a amamäsini an lükülük o an föför a ngau seni föförün eman esap souläng.

9 Kopwe makkeelong eman fefin mi mä pwülüan lon tettelin ewe mwichen fefin mi mä pwülüer are a ierini wone feitä. Pwal eu, are neminewe a chök pwülüeni eman chök mwän, 10 a pwal sil me ren aramas ren an föför mürina, a foleniöchü nöün kana, a etiwaöchü wasöla lon imwan, a talü pechen ekewe chon pin, a alisi aramas mi nom lon osupwang o fokun achocho le föri föför mürina fansoun meinisin.

11 Nge kosap apachalong ekewe fefin mi mä pwülüer lon ewe tettel are ierir a kis seni wone, pun lupwen ra mochen pwüpwülü lon ar mochenia, repwe kul seni Kraist. 12 Iei usun repwe tipis ren ar atai ar we pwon ngeni Kraist ra eäni me mwan. 13 Ra pwal aörüni ngeniir ar repwe asolapala ar fansoun ren ar einimweifeil. Nge resap chök asolapala ar fansoun, pwe ra pwal aörüni ngeniir ar epwe luapas o fosolong lon än eman angang, ra kakapas won mettoch esap wiser pwe repwe kapas won. 14 Iei mine üa mochen pwe ekewe fefin mi mä pwülüer nge ra ier kükün repwe pwüpwülüsefäl, repwe nöünöü o tümwünü angangen lon imwer. Repwe föri ei pwe resap awora ngeni ekewe chon oputakich och popun ar repwe kapasingau usuch. 15 Pun ekoch me leir ra fen tokola o ra aleasochis ngeni Satan. 16 Nge are eman souläng fefin a wor ren fefin mi mä pwülüer, i epwe fokun tümwünüür, nge esap wätä won mwichefel och weires, pwe mwichefel epwe tongeni tümwünü ekewe fefin mi mä pwülüer, ir chokewe mi akaleman chök.

17 Ekewe souakom mi angangöch le emweni mwichefel a aüchea ngeniir ar repwe angei liwiniir fän ruu, fokun ätekewe mi angang weires lon ar afalafal me asukula aramas ewe kapasen Kot. 18 Pun iei usun mine a mak lon ekewe Toropwe mi Pin, “Kosap föti awen eman ätemwänin kow lupwen a puri ekewe irän wiich, pwe föür repwe towu seni pöör.” A pwal mak, “Eman chon angang epwe angei liwinin.” ✡ Tut 25.4; Mat 10.10; Luk 10.7 19 Kosap aüseling ngeni än eman atipisi eman souakom are esap wor ruoman ika ülüman chon pwärätä an tipis. ✡ Tut 17.6; 19.15 20 Kopwe apwüngüchou ekewe souakom mi föri tipis mwen mesen souläng meinisin, pwe pwal ekewe ekoch souläng repwe niuokus.

21 Me mwen mesen Kot me Kraist Jesus me ekewe chon läng mi fil üa fokun allük ngonuk pwe kopwe aleasochis ngeni ekei kapasen öüröür, nge kosap oput eman ika efich eman lon meinisin mine ka föri. 22 Kosap müttir le iseis poumw won eman om kopwe afeiöchü fän iten ewe angangen ach Samol. Kosap atolongok lon tipisin pwal ekoch aramas. Kopwe püsin tümwünuk om kopwe limöch. 23 Kosap ünümi koluk echök, nge kopwe ünümi ekis wain pokiten chükünükanom, pwal pokiten ka samau fän chomong. 24 Tipisin ekoch aramas ra fokun pwäpwäla, ra akomwola mwer lon ewe lenien kapwüng, nge tipisin ekoch a chök pwä me mürin. 25 Ina chök usun föför mi mürina ra fokun pwäpwäla, inamwo ika ekoch ekei föför resap kon pwäpwäla, nge resap tongeni monola.