16
Ekewe asor fän iten ekewe souläng lon Jerusalem
16.1-4
1 Iwe, iei mine üa makkei ngenikemi usun ewe alilis oua ionifengeni fän iten ekewe chon pin lon Jutea: oupwe fokun föri usun met üa fen üreni ekewe souläng lon ekewe mwichefel lon Kalatia. ✡ Rom 15.25-26 2 Iteiten räninfel eman me eman leimi epwe aimwüela och alilis lon ükükün met a tufich ngeni. Iwe, oupwe iseis, pwe esap fis ämi ionifengeni ewe alilis lupwen üpwe war. 3 Lupwen üpwe torikemi, üpwe tinala ätekewe oua filiiretä o ngeniir toropwe, pwe repwe uwala ewe lifang lon Jerusalem. 4 Nge are epwe öch ngeniei ai üpwe pwal feila, iwe, ir repwe tongeni etiei.
Än Paulus kokot
16.5-12
5 Iwe, üpwe feila remi mürin ai saifeil lon Masetonia, pun üa fen akota ai üpwe saifeil lon Masetonia. ✡ Föf 19.21 6 Eli üpwe nom remi lon ekoch fansoun, eli lon unusen fansoun patapat. Iwe, oua tongeni alisiei pwe üpwe sopwela ai sai ekis meinisin ia üpwe feila ie. 7 Pun üsap mochen üpwe churikemi fansoun mochomoch, nge üa apilüköch pwe üpwe nonom remi fansoun langatam are ach Samol a mwüt ngeniei.
8 Üpwe nonom ikei lon Efisos tori ewe ränin Pentikost, ✡ Lif 23.15-21; Tut 16.9-11 9 pun a wor eu asam mi suk chöchöla pwe üpwe föri ewe angang mi aüchea, nge a pwal wor chomong chon pinei ewe angang.
10 Iwe, are Timoty epwe torikemi, oupwe tümwünüfichi ämi oupwe etiwöchü, pun i a angang fän iten ach Samol usun chök ngang. 11 Esap wor eman leimi epwe ösüfölüngauei, nge oupwe alisi pwe epwe sopwela an sai fän kinamwe. Iwe, epwe liwinsefälito rei, pun üa witiwiti fiti pwal pwiich kewe.
12 Iwe, ren pwiich we Apolos, ngang üa fokun tüngor ngeni fän chomong, pwe epwe churikemi me pwal pwiich kewe ekoch, nge esap fokun mefi pwe a öch an epwe feila lon ei fansoun. Iwe, epwe feila remi are a wor an fansoun.
Än Paulus kapasen lesopolan
16.13-24
13 Oupwe mamasa, oupwe üppos lon ämi lükülük, oupwe eäni sokun mwän, oupwe pöchökülela. 14 Meinisin mine oupwe föri, oupwe föri lon chen.
15 Oua silei usun Stefanas me chon an famili. Ir ra akom le soulängila me lon Akaia, ra fokun achocho le angang ngeni ekewe chon pin. Ämi pwii kana, üa tüngormau ngenikemi, ✡ 1.Kor 1.16 16 pwe oupwe aleasochis ngeni ekei sokun aramas usun ir, pwal ngeni chokewe mi etiir le angang o angang weires.
17 Üa pwapwa ren än Stefanas, Fortunatus me Akaikus wareto, pun ra siwilikemi lupwen ämi ousap nom rei. 18 Ra apwapwai letipei usun chök ra apwapwai letipemi. Ekana sokun aramas oupwe aücheaniir. 19 Chon ekewe mwichefel lon ewe fanü Asia ra kapong ngenikemi. Akwila me Prisila pwal chon ewe mwichefel mi mwichfengen lon imwer ra fokun kapong ngenikemi lon ach Samol. ✡ Föf 18.2 20 Pwiich kewe meinisin mi nom ikei ra kapong ngenikemi. Oupwe kapongfengen lefilemi ren ewe kapongen souläng. 21 Ngang Paulus üa makkei ai ei kapong ren püsin pei. 22 Iö esap tongei ach Samol i epwe anümamau! Maranatha. (wewen: Äm Samol kopwe feito!) 23 Ümöümöchün ach Samol Jesus epwe nonom remi. 24 Ai chen epwe nonom remi meinisin lon Kraist Jesus. Amen.