18
Njan keyoh whuti Babylon 'awet musai whuzdli'
1 'Et ndo ho hukw'elh'az 'uyoon lizas yak'uz ndus de út'o whe tís'en. Soo ulhtus whe k'úne' 'ut'en doút'en. Oots'u hánuyuzduz-i ndi yun k'ut be hóot'en.
2 'Ink'ez soo dultul whe nja ndutni,
“Njan keyoh whuti Babylon 'awet musai whuzdli',
musai whuzdli'.
'Ink'ez njan keyoh whuti Babylon,
ndi ntsi'-i nududeh-i lhai bukeyoh whúzdli'.
Nududeh-i dutsun-i ts'iyawh dilhts'i-un whuzdli'.
Ndai la dut'ai dutsun 'ink'ez oots'o dutni-i,
cha 'et dilhts'i.
3 Soo nint'i whe 'uyoon dune bulh ninta' 'ut'ih,
ts'ekoo too' k'un'a 'udun yun k'ut whut'enne,
'et whuz un'a za bube inulhnai.
Ndi yun k'ut whulerwene cha huyulh ninta' ut'ih inle'.
'Ink'ez ndi yun k'ut 'e'óoketne,
ndun ts'eke whe hoonzoo 'unt'oh-un 'ink'ez whélhtus-un,
'et huwa hoonzoo 'uhuja.”
4 'Et doo cha ndus de yak'uz ts'e 'uwhutni whudásts'o whe nja duwhútni,
“Sdune'ne oots'u hanáhdilh doo ka si 'en bulh lubeshi 'oolh'en.
'Ink'ez doo ka si ndi dune ye dzoh nudeh-i,
'i nohghá dolts'it.
5 Oolubeshi ndo yat'ah ts'e 'udiltai suli' 'et huwa.
'Ink'ez yé tank'us 'unt'oh-i ts'iyawh Yak'usda yunalni.
6 Danóhinla-un whuz un'a za ooba 'uk'elha hoolhtsi.
'Ink'ez be 'ut'en nawh 'ultsuk ooba 'uk'elha hoolhtsi.
Ndi lubot mbez nohba lhtainílhzo-i,
'i nawh 'et 'ultsuk 'i ooba lhtanaoolhdzeh.
7 Duba nacha 'ink'ez whudízti' hukw'un'a za yinka usda,
whuz un'a dzoh nuzut 'ink'ez ts'odi unli-un oogha óonah'aih.
Dudzi yo whe nja ndutni,
‘Lerwe ts'eke k'un'a susda.
'Aw tsándilh lhúsdloh,
'ink'ez ts'odi cha lhuzis'en.’
8 'Et huwa dune ye dzoh nudeh-i,
'ilhoh dzin za 'et ndi ts'iyawh oogha whútalts'ulh.
Bé dats'utsah-i, ts'odi,
'ink'ez dai cha ts'iyawh.
'Ink'ez kwun be soo ts'iyawh dutak'un.
NeMoodihti Yak'usda yuba nahuyeh-un,
'en ulhtus 'et huwa.”
Ndun Babylon musai whuzdli'-un hukw'e hunudleh
9 “Ndi yun k'ut whulerwene yulh ninta' 'ut'ihne, 'enne soo hiyulh hoonzoo 'ant'e'ne ndi dizk'un whe oolut hinilh'en de, hik'e titso 'ink'ez hik'e ni untileh.
10 Ndi ye dzoh nadinzut-i hinilh'en 'ink'ez hiye nuljut 'inka yoo 'un cho nódilhya 'ink'ez 'uhutni,
‘Keyoh whuti Babylon 'uk'enus hoontsi'-un huwá whults'ut,
'uk'enus hoontsi'-un huwá whults'ut.
Nyo hoolhtus-un keyoh whuti-un,
'ilhoh sadzi huk'oh hunist'o-un, 'et mba nahisda-un, whusahóolts'ut.’
11 'Et whu la gha ts'e ndi yun k'ut 'e'óoketne hik'e titso 'ink'ez 'enne cha hik'e ntidleh. Ndai la hiye ooket-i, 'aw dune lhuhuyoosket suli' 'et huwa.
12 Gold, 'ink'ez silver, 'ink'ez tse dunizti'-i, 'ink'ez kw'usul dunízti'-i, 'ink'ez naih dízti'-i, 'ink'ez naih dulk'un 'ankw'us dulhk'us, luswe soo dulk'un-i, khuna-i ncha-i oode, ivory huyúlhni, hoonliyaz hiyilh'i-i ts'iyai dizti'-i duchun, dulk'un t'eh, iron, tse marble huyulhni, 'ants'i ts'iyai dizti'-i,
13 'ink'ez bulh buta'whut'en-i cinnamon huyulhni, 'ink'ez sooltsun-i dizk'un-i, khe sooltsun-i, yoo Frankincense huyulhni, ts'ekoo too', 'ink'ez khe olive huyulhni, lhes 'ink'ez lhes hanúyeh-i, 'ink'ez musdoos 'ink'ez 'usbai, yeztli 'ink'ez nuyúlhgoo-i tubulh, dune yust'e 'ink'ez buzul cha, ts'iyawh be 'óoket.”
14 'Et 'uhutni, “'Ink'ez soo t'alh-i unzoo-i za kúndunut'a, ndai la tube hika' ninzun-i, 'i cha ts'iyawh nch'a hooloh suli'. Ndai la dizti'-i 'ink'ez soo 'ot'en-i, 'ohwhi ts'iyawh nch'a hooloh suli', 'aw naóonlelh ait'oh.”
15 Mbene la ndowhi be óoketne, 'enne la ndun ts'eke hoonzoo 'unt'oh ubulhtsine, ndun ts'eke ye dzoh nuzut-i, 'i hiyé nuljut 'inka yoo 'un cho highu núdilhya 'ink'ez tube cho hutso, 'ink'ez hukw'e ni nahunudleh.
16 'Ink'ez cha 'uhutni,
“'Uk'enus hoontsi'-un nghá whults'ut!
'Uk'enus hoontsi'-un nghá whults'ut!
'Uya! 'Uya!
Nyo keyoh whut'i naih dulk'un-i 'ankwus dulhk'us,
'ink'ez dulk'un-i be húdilhts'i,
'ink'ez gold, tseyaz dunízti'-i,
'ink'ez kw'usul dunizti'-i be nódilhtsi'.
17 Soo ts'ih'un 'ilhoh sadzi ha' hunit'o-un ndi whe' hoonzoo' hoont'oh-i cho, gak whuzdli'.”
'Ink'ez mbene la ts'i cho be nukene, 'ink'ez bumoodihne cha, mbene la whuz un'a 'e'hooket 'ink'ez 'oohooketne, 'enne ts'iyawh yoo 'un cho nuhúdilhya.
18 'Ink'ez nyoo dizk'un oolut, 'et hinalh'en whe tube cho nja nduhútni, “'Aw ndóohoont'oh-un keyoh whuti 'aw 'udun whuz un'a keyoh whuti hooloh!”
19 'Ink'ez lhez dutsi k'ehúyidzeh 'ink'ez 'ahúldzul 'ink'ez hutso 'ink'ez 'uhutni,
“'Uk'enus hoontsi'-un ooghá whults'ut!
'Uk'enus hoontsi' ooghá whults'ut!
Nyo keyoh whuti ts'i yatoo k'ut núkat-i ts'iyawh hoonzoo' hint'oh ubulhtsi.
'Ilho sadzi ha' hunit'o-un soo ts'ih'un gak whuzdli'.”
20 “Nohni yak'uz whut'enne 'ink'ez nohni Yak'usda ooch'e'ne 'ink'ez nohni whel'a'ne,
'ink'ez nus hoo'enne cha ndun ts'eke 'ul'en-un bulh dahooja,
'et huwa soo cho whunúlhni!
Nts'en'a la nohba nahizya whuz un'a Yak'usda nohba yuk'elha whulhtsi 'et huwa.”
Keyoh whuti Babylon 'awet 'ilhiz 'etsul 'uhóoja
21 'Et lizas ulhtus-un tse cho ook'ut lhes dunutsut-i ndoút'en-i, 'i yílhchoot 'ink'ez yatoo k'ut taínalh'uz. 'Ink'ez 'utni,
“Soo wheóonujut whe keyoh whuti Babylon whuz un'a Yak'usda nawhúntiyus 'ink'ez 'aw 'on 'at dune nahó'alh ait'oh.
22 Nela be ts'ujun-i,
'ujune cha, duze whé huye jun-i
'ink'ez be ts'újih be hújihne,
'aw 'on 'at dune ubuhudóts'o ait'oh.
Mbene la lhelhdowh didowh 'ulh'enne,
'enne cha 'ilhiz huhooloh tileh.
'Ink'ez tse k'ut lhes hundunutsut-un be duts'o-i 'et cha 'ilhiz 'etsul 'uwhudutánelh,
'aw 'on 'at dune whudóts'o ait'oh.
23 'Aw be hóot'en-i cha hootáloh.
'Aw nyo dune lhghu dilhts'i-un,
'et cha 'etsul 'uwhutanelh.
Mbene la mba 'e'óoketne ndi yun k'ut dune nchane 'uhant'e'.
Duyun-un k'un'a ndi yun k'ut dune lhelhdowh didowhne nyun nabunan'a 'et huwa.
24 'Ink'ez nus hoo'enne 'ink'ez Yak'usda ooch'e'ne bubuzkai',
'ink'ez ndi yun k'ut dune ubanghanne,
'enne cha ts'iyawh bubuzkai' 'et 'unt'oh!”
ni, lizas ulhtus-un.