8
Sizi 'andit lubret unli whe dude 'ut'en k'oh huwana
1 'Et 'awet niz de daja uzdani', nja 'et 'uwhúlhni, wheni neba lubret 'uk'enus dizti'-un ts'ut'i, mbe la yak'uz k'us úncha-un, 'en ookw'uts'uzda cho dízti'-i, 'i nailhni ts'un k'us yughu nátl'adida'.
2 Ndi ndai nimbali cho neMoodihti nénin'ai-i, 'i ts'ih'un un'a 'uhoont'oh-un 'uhoont'oh. 'I 'aw dune iloh nénin'ai. 'Et huwa 'udéni' nimbali bet whambez, 'ink'ez 'et 'uk'enus whudízti'-un, 'et cha Sizi Gri neba ne'ut'en.
3 'Et mbene la lubret 'uk'enus dizti' unline, 'enne loodel k'ut hudilhk'un 'ink'ez doo cha hoonliyaz Yak'usda gha hóo'alh huba' hoont'oh. 'Et whuz un'a za ndun mbe la ooghu yats'ulhduk-un, 'en cha hoonli huwa óo'alh huba' hoont'oh.
4 'Et lhane lubretne ndi yun k'ut, 'enne nts'en'a la Moses ooghuni k'un'a, 'et whuz un'a 'et nduhút'en. 'Et huwa Sizi Gri 'awhuz ndi yun k'ut usda de, 'aw da' lubret lhiloh oolé'.
5 Ndunne nimbali cho t'ah ts'e dunene buba ne'hut'en te, 'et ndi nimbali cho 'et yak'uz whuz'ai-un, 'et whunduhúl'en whe' hut'en. 'I yak'uz dahoont'oh-un 'ants'i 'et whunduhúl'en le'hut'en. 'Oh da' Moses nimbali cho netí'alh whe, Yak'usda yudáni', “Nts'e la dzulh k'ut nimbali cho netílts'ulh-un whunyunistan-un, 'et wheni ooghá ne'tant'en-i mba usdla, 'i k'un'a onleh. 'Et nts'en'a la whúnyunistan, ndúwhulcho whe whuz un'a onleh!”
6 'Et hoonts'i Sizi Gri ndunne 'on nus soo buba nus soo ne'út'en-un suli'. Ndi 'uk'enus hoonzoo khuni nets'u lhaídinla-i, 'et huwa Sizi Gri 'en neba k'elha whulhtsi-un unli. Yak'usda 'on nus hoonzoo k'un'a nets'ú hoozi-un, 'et whuz un'a neba 'uhóonla.
'Andidi khuni nets'u lhaídinla-i
7 'Et njan khuni 'udechoo khuni buts'u lhaídinla-i buba hoolhtus, 'aw hik'unelhe'hít'el. 'Inka 'i gha dune Yak'usda nalh ts'ih'un lhe'hit'oh. 'Et huwa doo cha za whulh nat-un nets'u nahizya.
8 'Ink'ez Yak'usda oodune'ne, 'enne ts'iyawh hukwa' budáni'. 'Et whuz un'a ooghuni 'uk'uwhusguz whe nja dutni,
“Soo zulhts'ai, 'ilhudzin whuz de hóolts'ulh,
'et whusahóolts'ut de,
'et de Israel buyun k'ut dilhts'ine
'ink'ez Judah buyun k'ut dilhts'ine,
'oh de ndi 'andidi whulh nat-un khuni buba lhaídutisdleh.
9 Ndet la butsoda'ne 'udechoo khuni buba lhaídusdla,
'et whulh nat-un 'aw 'et hukw'un'a lhe'whutást'el.
'Et 'oh da' 'ants'i bula úschoot
'ink'ez Egypt yun k'ut hukw'unabutísdla.
'Et hoonts'i sghuni 'aw lhuhuyílhchulh,
'et huwa bula disni, ni neMoodihti.
10 'Ink'ez cha neMoodihti ndutni,
'et hukw'elh'az Israel buzkehke soo 'andidi-i,
'i khuni buba lhaídutisdle.
Ndiz un'a ndótat'elh,
sk'oh ts'e 'et bubeni táwhudutasdlelh,
'ink'ez budzi k'ut cha 'uk'ehóotasgus.
'Ink'ez si buYak'usda tisdleh,
'ink'ez 'enne sdune'ne hutileh.
11 'Oh de de ts'iyawh 'ilhoghun hinli whe ts'oodunneyaz
'ink'ez yoo 'un udohne bulh 'alhgoh, Si t'esontizeh.
'Et huwa datíst'elh-un,
'et huwa dudenghoh whut'íne,
k'us dudulhutsinke 'aw 'ilhoghun hoonts'i,
doo cha za ‘neMoodihti ghun hodulh'eh!’
hudooni' huba lhe'hoot'oh.
12 'Et dáhoont'oh la 'aw ts'ih'un lhe'hust'en de,
'et huwa bugha té'untaszeh.
'Ink'ez bulubeshi 'ink'ez sk'únulhe'ust'en-un,
'et 'i ts'iyawh 'aw 'on 'un 'aw buba whunaooznih ait'oh.”
13 'Et huwa Yak'usda ndi soo 'andit-un khuni neba lhaídinla-i howu yailhduk, 'et dája ni whe ndutni, 'i gha njan 'udechoo khuni buba lhaídinla-i, 'aw whe lhé'hoot'oh suli', 'et huwa Yak'usda neba lhk'enaoodan'ai, 'ink'ez 'aw 'on 'un ook'une' ts'oot'en ait'oh.