1 Tsinquitai hapobo jisanan Pablonen jato yohiquin:

—Hea huetsabaan, shinanquin sirijahax, tiromahaxma jihuepahonish tah hen rahma caman jascarai, Papan hea jisi honanax.

2 Pablonen jascajahiya jaa pataxaibaan Pablo copasnon sacerdotebaan hapon jato yohiquin.

3 —Papa Diosen ta miabi rishquiyaxihquiqui, maoxen sicaha chiquepan. ¿Jascajatima Moisesnin yohinih que bi min hea jato copasmahin? ¿Jascajaquin min hea Moisesnin yohini quescajaquin min hea pontecatsihquin? —hahquin Pablonen.

4 Jaa pataxaibaan sca:

—¿Papa Diosen sacerdote hapo min jascajaquin tiromajaquin yohihin? —hahcanquin.

5 —Sacerdotebaan hapo tah hen honanyamahahqui, hea huetsabaan. Maton hapo tah man tiromajaquin yohitimahi hah ta huishani joi jaiqui —hahquin Pablonen.

6 Jaatian caibo fariseobo caibo rihbi saduceobo honanscaxon hapobaan nincacahbo coshin sca yohuani:

—Hea ta fariseo qui, hea huetsabaan. Fariseobaan baque ta hea qui. Mahuanihbo ta Papan hahquirihbi teehihmayaxihquiqui hen jai copi ta hea casticancanihqui.

7 Jan jascaraiya fariseobo betan saduceobo join bahchinanscai. Jaa copi caibaan Pablo casticancatsihqui bi caibo queenyamascai. 8 Mahuanihbo ta Papan teehihmaribitimahiqui. Papan naihoh queha yonotibo ta yamahihqui, yoshin rihbi ta yamahihqui, hih saduceobo jai bi ta Hah ta jatihiqui, jaí rahan, jaí rahan, fariseobo jaiqui. 9 Join bahchinani corotaiboya fariseo huishani honanbo nihrenenxon hani join coshin jato yohiquin:

—Noquen jisi ta nea joni hohcha yamahihqui. Yoshiman jaa yohuanquihnaiya jaa hihyamahiya Papan yonotinin jaa yohuanquihnaiya mato jahua hihtihin? —hahcanquin.

10 Hashoan sca rainyamacani. Nininanquin Pablo huaxabahincanmis hihxon, Jato bichinnahue hapon jahuen sontarobo jaquin. Mehuetani caxon bichinxon coshin ninibehnantanxon jaton xoboho sontarobaan Pablo boresscaquin.

11 Jascajahipi huesti neten sca yame Pablo janin noquen Hihbo sanarenenxon:

—Raqueyamahue. Neno Jerusalen jema janinxon min hehqui jato yohicoinai quescajaribiquin tah min Roma jema janinxon jatihi —hahquin.

12 Xaba paquescaiya Pablo rehteti shinancanquin judiobaan.

—Non jaa rehtenoxon caman tah non pitimahi, xehatimarihbihi. Non jaa rehteyamahiya noque sca Papan rehtenon —hahcanquin. 13 Cuarenta joni hihxon jascajacanquin. 14 Jascajahax jano sacerdote hapobo betan jaton hanibo jaiton bocani. Nocoxon:

—Non yohihi quescabijaquin non hahyamahiya Papan noque rehtenon hihxon tah non yohihahqui, Pablo rehtenoxon caman tah non jahuabi piti nohuejatimahi. 15 Tsinquitai hapobo yocaxon sontaro hapo rihbi yocanahue jan neno mato janin jaa bexonnon. Pablo yohuanai man sirijaquin sca nincacatsihqui janahue. Janin noconon tah non rehtetihi, non tah non manascai —hahcanquin.

16 Rehteti shinanaibo honanax Pablon pihasha pishca cahi sontarobaan xoboho caxon Pablo yohiquin. 17 Jaan sca capitan quenaquin. Jahuiton:

—Nea beronan miin hapo janin hioxonhue jan nincabehnanai jan yohitannon —hahquin.

18 Jahuen hapo janin sca capitanen hioquin.

—Non bichipi Pablonen ta hea quenaxon nea beronan mihqui hihuexonnon hea yocacaxqui. Mia roqui nincamacatsihquiqui.

19 Jascajaha mehuetanxon hahmebi hiohax sca yocacahti:

—¿Jahua min hea yohicatsihquin?

20 —Heen caibaan ta hashoan sirijaquin honancatsihquin hahcajaquin mia nescajaquin yocati shinanihqui. Non Pablo yocanon hapobo tsinquitai janin bahquish Pablo hioxonyaxahnhue hih ta jacanihqui. 21 Jaabo hihcoinai shinanyamahue. Cuarenta hihxon hashoan hicharihbixon ta jaa rehtenoxon caman pitimahi, xehatimahi yohicaniqui, rehteyamahiboya jaabo sca Papan rehtenon hihxon. Rahma ta quexescacanihqui rehtecatsihquin. Min jeenhahnon res ta manacaniqui —hahquin beronanen.

22 —Hea min jascajahi tsoabi yohiyamatahin min. Caresscatanhue —hahquin hapon.

23 Rabe capitan sca quenaxon jato yohiquin:

—Doscientos sontaro tsinquinahue. Cabachonen nichibo rihbi setenta sontaro. Jashiyahpabo rihbi doscientos sontaro. Yame sca jaiya Cesarea jema janin caman Pablo botannon jato raannahue. 24 Hahan Pablo rihbi cati cabacho bexonnahue, gobernador Félix janin caman sirijaquin hionoxon. 25 Jato jascajaxon quirica sca nescajaquin huishaquin:

26 Hea Claudio Lisias hihxon tah hen mia noquen gobernador Félix mihqui joi raanai. ¿Min jascabi jayamahin? 27 Hen mihqui raanai joni judiobaan rehtepanan tah hen sontaroya nocoxon romano joni honanxon jato bichinipiqui. 28 Jahua tiroma jaiquin hihxon hen jaton hapobo jano tsinquitaiton hiohipiqui. 29 Jaton xenibaan joi jan nincayamarai copi res jaabaan sinajahi bi ta jahua copi rehteti yama qui. Jahua copi sipojati yamarihbihi tah hen honanscaipiqui. 30 Jaa rehtenoxon caman piyamaxihquibo jai chanihah tah hen histon res mihqui raanti shinanscaipiqui. Hahqui yohuanaibo rihbi tah hen yohihipiqui, hahqui yohuanti joi jaxon mia hihbaan yohuantannon, hahquin huishaquin.

31 Hapon yohiha quescabijaquin cahen Pablo bihxon nihshinaxon Antípatris jema janin caman sontarobaan hioquin. 32 Bariyahpan sca cabachonen nichibo hahbetan catannon texe sontarobo jaton xobon caribihi. 33 Hiotanxon Cesarea jema janin nocoxon cabachonen nichibaan janoha gobernador qui jaa quirica hinanquin. Hinanxon Pablo rihbi hahqui hihuecanquin. 34 Jaa quirica jisxon jahuerahnoha mai meha mia quin hihxon Pablo yocascaquin. Cilicia mai meha rahan jan hihnon:

35 —Min yohihi tah hen nincatihi mihqui yohuanaibo nocotaiya —hahxon Herodesnin quiquin hapo xobohoxon coiranahbo hihxon jahuen sontarobo yohiquin.