Dónbeenì páaníi fĩnle vũahṹ Tesaloniikisa nín-yání 1

Ho nín-yání vũahṹ na ó o Poole túara nɔn ho

Tesaloniiki

kèrètĩ́ɛwa kuure yi

Vũahṹ túaró ɲúhṹ

Ho vũahṹ mu lé o Poole túara ho á nɔn ho Tesaloniiki kèrètĩ́ɛwa kuure yi. Ho Tesaloniiki mu lé ho Maseduana kɔ̃hṹ ló-beenì. Ɓa kèrètĩ́ɛwa kuure na ho lóhó mu yi lé orɛ́n Poole fárá le. Ɛ̀ɛ ká a màhã́ yí dàńna yí kará bĩ́n yí míana. Lé bìo á ho kàránló na ó o wee na á ɓa *zúifùwa ɓúi yí tà bìo, á ɓa ɲɔn wo (Bè-wénia vũahṹ 17.1-17). Bìo nɔn ó o túararáa ho vũahṹ mu lé ho tonló na ó o sá hũ̀inía yi bĩ́n ó o wi ò o bĩní sĩ̀ ɲii.

Bìo le kuure mu yí fárá yí míana, ká bìo le kèrètĩ́ɛwa wee wé ká mu se ɓúenɓúen ó o ɲá, ó o wee zã̀maka mu bìo yi, á wee hení ɓa sĩa le ɓa bánbá à ɓa kèrètĩ́ɛmu wé va lè ho yahó. O bía ɓa nì-hía vèeró bìo làa ba, làa bìo ó o *Krista à bĩní ì ɓuen á ɓueé fé bìa dó mí sĩa wo yi. O mún bía le ɓa wé sá à yí dí parí.

Ɓa bè-zũńlowà tò mu wán le ho vũahṹ mu lé hìa lé o Poole nín-yání vũahṹ na ó o túara. O túara ho hã lúlúio ɓúará-ɲun làa pírú (50), lè ho ɓúará-ɲun làa pírú làa dà-kéní (51) pã̀ahṹ o Yeesu teró mɔ́n.

1 Mu lé warɛ́n, o Poole, là a Silivɛ̃n là a Timɔtee á wee túa ho vũahṹ na kà á à na minɛ́n Tesaloniiki kèrètĩ́ɛwa kuure yi, minɛ́n na bìo sã̀ a Maá Dónbeenì là a Ɲúhṹso Yeesu *Krista yi. Le le Dónbeenì wé mí sãamu làa mia à na ho hɛ́ɛrà mia.

Bìo ho Tesaloniiki kèrètĩ́ɛwa ɓuan lè míten

2 Wa wee dé le Dónbeenì bárákà fɛ́ɛɛ mi ɓúenɓúen bìo yi. Wa yí máa khí le Dónbeenì fìoró yi mi bìo yi. 3 Wa wee leéka mi bìo fúuu wàn Maá Dónbeenì yahó. Lé bìo á mi yí dú parí mi sĩadéró le Dónbeenì yi. Le waminì na wi mia lé dén nɔn á mi wee wéráa mu bè-tentewà. Á mi sĩadéró wa Ɲúhṹso Yeesu *Krista yi á mún fárá dĩ̀n. 4 Wàn zàwa lè wàn hĩ́nni, wa zũ mu le le Dónbeenì wa mia á hueekaa à mi bìo sĩ̀ le yi. 5 Wa yí buera le bín-tente yí nɔn mia lè wa ɲiní mí dòn, wa mún wó mu lè le Dónbeenì Hácírí pànká, á mún láa mu yi kɛ̃́nkɛ̃́n le le bín-tente mu bìo lé ho tũ̀iá. Bìo wa ɓuan lè waten mi tĩ́ahṹ à mi bìo wé seráa á mi zũ. 6 Bìo warɛ́n wó á mi bò yi, á mún bò bìo ó o Ɲúhṹso wó yi. Hàrí bìo mi lò wee be làa sòobɛ́ɛ mí cúee, à mi pá tà bò le Dónbeenì bíonì yi lè le sĩ-wɛɛ, dìo le Dónbeenì Hácírí wee na.

7 Bìo mi wó kà lé bṹn á bìa tà a Krista bìo ho Maseduana lè ho Akayii kãna yi ɓúenɓúen lá ko ɓa wé loń yi à wé. 8 Lé lè minɛ́n cɔ̃́n ó o Ɲúhṹso bíonì dĩ̀n yi á sã ɲánáa ho Maseduana lè ho Akayii yi. Mu yínɔń bṹn mí dòn. Mi Dónbeenì bìo tàró á bɛ̀nbɛ́ra hã lùa ɓúenɓúen, á mu ɓàn bíoró yàá wã́a ɲúhṹ mía wa cɔ̃́n. 9 Ɓa nùpua ɓúenɓúen wee bío bìo mi ɓuan làa wɛn bìo, pã̀ahṹ na wa van mi cɔ̃́n yi. Ɓa mún wee bío bìo mi pã́ hã wɔ̃̀nna à mi tà le Dónbeenì binbirì na wi fɛ́ɛɛ bìo, á nɔn miten le yi 10 á pannáa le Za Yeesu na à lé ho wáayi ì ɓuen, wón na le vèenía. Orɛ́n Yeesu mu lé yìa á à kã̀ní wɛn le Dónbeenì sĩ-cĩ̀ílè cítíi pã̀ahṹ.