1 Ma gbɛ̃ yenzideenↄ, àton nini píngi náanɛ kɛro. À niniinↄ tàasi kɛ à gwa, tó aↄ̃ bↄ̀ Luda kiiamɛ, zaakɛ annabi ɛgɛɛnↄ pari kũ̀ anduna guu. 2 Yã kɛ̀ eé tó à Luda Nini dↄ̃ↄn yɛ̀: Ninii kɛ̀ bè Yesu Kirisi mↄ̀ gbɛ̃ntee ũu bↄ̀ Luda kiiamɛ. 3 Ninii kɛ̀ Yesu dↄ̃ lɛroo e bↄ Luda kiiaro. Kirisi ibɛɛ kɛ̀ á mà èe mↄↄn gwe. À sↄ̃ↄ kú anduna guu kↄ̀.

4 Ma nɛ́ yenzideenↄ, Luda gbɛ̃nↄn a ũ, a zĩ̀ blè annabi ɛgɛɛ pìnↄa, zaakɛ gbɛ̃ kɛ̀ kú a guu bíta dɛ gbɛ̃ kɛ̀ kú anduna guula. 5 Anduna gbɛ̃nↄn ń ũ. Beee yãnzin aↄ̃è yã o anduna zɛ́kpaɛ guuzi, ben anduna gbɛ̃nↄ è ń yã ma. 6 Luda gbɛ̃nↄn wa ũ. Gbɛ̃ kɛ̀ Luda dↄ̃ↄ è wa yã ma, gbɛ̃ kɛ̀ kú Luda pↄ́ ũroo è wa yã maro. Àmbe à tò wá Nini Yãpurade dↄ̃kↄ̃zi kↄ̃n nini ɛgɛdeeo.

7 Ma gbɛ̃ yenzideenↄ, wàgↄ̃ yekↄ̃zi, zaakɛ yenzi è bↄ Luda kiiamɛ. Gbɛ̃ kɛ̀ yenzi vĩ nɛ́ Luda nɛ́mɛ, à Luda dↄ̃. 8 Gbɛ̃ kɛ̀ yenzi vĩroo Luda dↄ̃ro, zaakɛ Ludan yenzi ũ. 9 Dian Luda a yenzi ↄ̀dↄawe gupuraaa nàn yɛ̀: À a Nɛ́ mɛ̀n do léle zĩ̀ anduna guu, lɛ wà wɛ̃̀ndi e kↄ̃n à gbãaao. 10 Yenzi pìn yɛ̀: Èe kɛ wámbe wá ye Ludaziro, Luda bé à yewazi, ben à a Nɛ́ zĩ̀ wa durunnↄ agbaakpapↄ ũ. 11 Ma gbɛ̃ yenzideenↄ, lán Ludaa yewazi lɛ nà, séde wàgↄ̃ yekↄ̃zi. 12 Gbɛ̃kee e wɛ́ɛ si Ludalɛ zikiro, Mↄde tó wá yekↄ̃zi, Ludaa kú wa guu, ben à yenzi pì papana wa guu.

13 Wá dↄ̃ kɛ̀ wá kú à guu bensↄ̃ à kú wa guu, kɛ̀ à a Ninii kpàwa yãnzi. 14 Wá è, ben à sèedadeenↄn wa ũ, kɛ̀ De Luda a Nɛ́ zĩ̀ anduna Mìsiri ũ. 15 Gbɛ̃ kɛ̀ ò gupuraan kɛ̀ Yesu nɛ́ Luda Nɛ́mɛ, Ludaa kú à guu, bensↄ̃ à kú Luda guu. 16 Wá Luda yenawazii dↄ̃, ben wá à náanɛ vĩ.

Ludan yenzi ũ. Gbɛ̃ kɛ̀ ègↄ̃ yenzi vĩ kú Luda guu, ben Ludaa kú à guu. 17 Pↄ́ kɛ̀ tò yenzi pì papana wa guun yɛ̀: Wa swɛ̃̀ égↄ̃ diɛna yãkpaɛkɛgurↄↄ zĩ. Zaakɛ lán Kirisi dɛ nà, wapinↄ se, lɛn wá dɛ lɛ anduna kɛ̀ guu. 18 Yenzi pì ègↄ̃ vĩa vĩro. Yenzi wásawasa è pɛ́ vĩaa, zaakɛ vĩa nɛ́ wɛ́ɛtãmma yãmɛ. Vĩadee yenzi ègↄ̃ wásawasaro.

19 Wapinↄ, wá yenzi vĩ, kɛ̀ Luda gĩakɛ à yewazi yãnzimɛ. 20 Tó gbɛ̃ bè á ye Ludazi, ben à zà a Yesude daaan, ɛgɛdeemɛ. Zaakɛ gbɛ̃ kɛ̀ ye a Yesude daaa kɛ̀ èe eeziro, eé fↄ̃ àgↄ̃ ye Luda kɛ̀ èe à erooziↄ́? 21 Yã kɛ̀ à dìɛween yɛ̀: Gbɛ̃ kɛ̀ ye Ludazi, séde àgↄ̃ ye a Yesude daaazi.