1 Dikiri, n ma yã gwàgwa n dↄ̃̀,

2 ń ma vutɛna kũ ma futɛnaao dↄ̃,

zaa zã̀zã ń ma laasunnↄ dↄ̃.

3 Ndì ma táa'ona kũ ma wutɛnaao tàasi ká,

n kↄ̃ dↄ̃̀ kũ ma yãnↄ pínki.

4 Ari yã gↄ̃ bo ma lɛ́n,

Dikiri, ń dↄ̃ sãnsãn.

5 Ń likamai kpɛ kũ arɛo,

n ↄ kúmala.

6 Dↄ̃na bire demɛnɛ daboyã ũmɛ,

à demala, ma ↄ̃ndↄ̃ dí káaro.

7 Mán mani gɛ́n mà kɛ̃ n Niniaa?

Mán mani bàa sí mà gɛ́n mà kuranyĩi?

8 Tó ma futɛ ma gɛ musu, ń kú gwe!

Tó ma wutɛki kɛ̀ gyãwãn, mↄkↄ̃mmɛ gwe!

9 Tó ma futɛ ma gɛ ifãboki kpa,

tó ma gɛ vutɛ ísira bara ifãlɛtɛ kpa,

10 bee gwemɛ má na n ↄĩ,

ĩnigↄ̃ ma kũna kũ n ↄplao.

11 Tó ma pì gusira damala,

ke gupura kũ à likamai li gwãani ũ,

12 gu dìgↄ̃ sirannɛro,

gwãani dìgↄ̃ dennɛ lán fãnantɛ̃ bàmɛ,

gupura kũ gusirao dìgↄ̃ lɛɛlɛnnɛmɛ.

13 Mↄkↄ̃n mɛ́ n ma gũn kɛ̀,

n ma í kàsa ma da nɛ̀sɛn.

14 Ma n sáabu kɛ̀ kũ ma kɛna naasi vĩ

akũsↄ̃ à yãbonsarɛ vĩ.

N yãkɛnanↄ dì bo ń sarɛ,

má dↄ̃ sãnsãn ma nɛ̀sɛn.

15 Gↄrↄ kũ n ma í kàsa nɛ́'isↄↄ gũn,

ma wá ke utɛnannɛro.

Kũ ma mɛ̀ tɛn li asiri gũn gwe,

16 n wɛ́ sì ma nɛ́gbĩnilɛ.

Lákũ n ma gↄrↄ dìtɛ nà pínki,

a lɛ́ kú n takadan

zaade a ke dí naaro.

17 Luda, n laasunn bɛ̀ɛrɛ vĩmɛnɛ manamana,

a lɛ́ vĩro fá!

18 Tó má ye mà naro,

ń dasi de bùsu'atɛ̃la,

tó ma vu,

madìgↄ̃ kú kũnwo ari tera.

19 Luda, tó ĩni gbɛ̃ vãninↄ dɛdɛ dé?

À gomala, ákↄ̃nↄ gbɛ̃dɛrinↄ!

20 N ibɛrɛnↄ dì n yã o kũ nɛ̀sɛ vãnio,

n tↄ́ bɛ̀ɛrɛ vĩ n lɛ́nlo.

21 Dikiri, madì zã gbɛ̃ kũ ò zã̀ngunↄguroo?

Madì gí gbɛ̃ kũ ò fùtɛnyĩnↄ kãi.

22 Má yãke vĩńnɛro, se zãngu,

madì ń ditɛ ma ibɛrɛnↄ ũmɛ.

23 Luda, ǹ ma gwagwa ǹ ma nɛ̀sɛ dↄ̃,

ǹ ma yↄ̃ ǹ ma gwa ǹ ma laasun dↄ̃.

24 Ǹ gwa tó má laasun vãni ke vĩ,

ǹ ma da zɛ́ kũ àdigↄ̃ kun gↄrↄ sĩnda pínkiaa gũn.