1 Gbãnadenↄ, adì yã o a zɛ́a sↄ̃ yá?

Adì yãkpatɛ kɛ kũ gbɛ̃nↄo súsu yá?

2 Adì yã vãni laasun lɛ́ á swɛ̃̀ɛ gũn,

adì gbãna mↄ gbɛ̃nↄnɛ á bùsun.

3 Gbɛ̃ vãninↄn sãtɛna zaa ń ina gↄrↄmɛ,

ɛ́kɛdenↄn yakana zaa ń da nɛ̀sɛn.

4 Ń lɛ́gbɛ de lán mlɛ̃̀ sɛwɛ bà,

ò de lán káre kũ à a sã tàtaa bà,

5 de mlɛ̃̀ɛ pì sún a kↄ̃kↄ̃'ori úra ũ maro,

de àsun a dabukɛri gonikɛ ero.

6 Luda, ǹ ń saka ɛ́'ɛńnɛ ń lɛ́n,

Dikiri, ǹ músuu pìnↄ saka sↄ̃ntɛnↄ ɛ́'ɛńnɛ.

7 Ǹ tó ò gɛ̃tɛ lán í bàasinaa bà.

Tó ò sá gà, ǹ ń kànↄ ɛ́'ɛńnɛ.

8 Ǹ tó ò kori kɛ zɛ́n lán kↄntↄ lɛ́'i bà,

ògↄ̃ de lán nↄ̀bↄtɛnɛ kũ adi ifãntɛ̃ ero bà.

9 Ari yàka tɛ́ gↄ̃ oro wã,

gbɛ̃ vãninↄ ni gɛ̃tɛ kũ ĩao.

10 Gbɛ̃ mananↄ ni pↄnna kɛ

zĩ kũ Luda fĩna bòńnɛ gbɛ̃ vãninↄa,

kũ ò ń gbá pìpi ń aru gũn.

11 Gbɛ̃nↄ ni pi: Gbɛ̃ mananↄn láada vĩ fá!

Luda kun, àdi yãkpatɛ kɛ andunia gũn.