Luda yã takada kũ Bisã yão ZABURA 25

25

Luda ó dãkpãrii

Dauda lɛ̀ɛ.

1 Dikiri, ma a swɛ̃̀ɛ kpàmma,

2 Ma Luda, matɛni n náani kɛ,

ǹsun tó wé'i ma kũro,

ǹsun tó ma ibɛrɛnↄ ma nɛro.

3 Wé'i ni gbɛ̃ kũ ò wɛ́ dↄnyĩnↄ kũ zikiro,

sé gbɛ̃ kũ ò bò n kpɛ sèeda ke sarinↄ.

4 Dikiri, ǹ n zɛ́ mↄmɛnɛ,

ǹ n yã dadamɛnɛ.

5 Ǹ ma da n yãpura zɛ́n,

ǹ a yã dadamɛnɛ,

zaakũ Luda ma surabariimɛ n ũ,

ma wɛ́ dìgↄ̃ dↄnyĩmɛ gↄrↄ sĩnda pínki.

6 N wɛ̃nda kũ n yenyĩo gↄ̃ dↄngu,

zaakũ abirekũnↄ kú kũnwo zaa zĩ, Dikiri.

7 Ǹsun taari kũ ma kɛ̀nↄ yã daro

ke durunna kũ ma kɛ̀ ma kɛfɛnnakɛgↄrↄanↄ.

Ǹ tó ma yã gↄ̃ dↄngu yenyĩ gũn,

kũ ń mana yãi, Dikiri.

8 Dikiri mana, àdi yã kɛ a zɛ́a,

abire yãi àdi a yã dada durunnakɛrinↄnɛ.

9 Àdi zĩdabusarinↄ da a zɛ́a,

àdi yã mana dadańnɛ.

10 Dikiri dìgↄ̃ yenyĩ kũ náanio vĩ

kũ gbɛ̃ kũ ò a bàka kunna kũńwo yã kũnanↄ.

11 Bee kũ ma durunna zↄ̃kↄ̃ Dikiri,

ǹ kɛ̃ma n tↄ́bona yãi.

12 Dí mɛ́ à Dikiri vĩna vĩi?

Dikiri dì ade da zɛ́ kũ à de à sɛ́a.

13 Ade nigↄ̃ kú nnamanaa gũn,

a burinↄ mɛ́ onigↄ̃ ń bùsu vĩ.

14 Dikiri nna kũ a vĩnakɛrinↄ,

àdi tó ògↄ̃ a bàka kunna kũńwo yã dↄ̃.

15 Ma wɛ́ dìgↄ̃ dↄ Dikiria baala'i,

àkũ mɛ́ àdi ma gbá bo bàn.

16 Ǹ arɛ dↄma, ń ma wɛ̃nda gwa,

zaakũ má kú mado wɛ́tãmma gũn.

17 Ma yã'ũmmananↄ kàra ma nɛ̀sɛɛ gũn,

ǹ ma bo ma wari pìn.

18 Ǹ ma wɛ́tãmma kũ ma pↄsirao gwa,

ǹ ma durunnanↄ kɛ̃ma pínki.

19 Ǹ gwa lákũ ma ibɛrɛnↄ dàgula nà,

ò zã̀magu pãsĩpãsĩ.

20 Ǹ ma wɛ̃̀ndi dãkpã, ń ma sura ba,

ǹsun tó wé'i ma kũro, zaakũ ma nanyĩ.

21 Ǹ tó yãpura kũ kunna manao gↄ̃ ma dãkpã,

zaakũ ma wɛ́ dìgↄ̃ dↄnyĩ.

22 Luda, ǹ Isarailanↄ bo ń warikɛnanↄn pínki.