2
Tɛna ↄ̃ndↄ̃i àree
1 Ma nɛ́, tó n ma yã sì,
tó ń ma yãditɛnanↄ kũna n swɛ̃̀n,
2 tó ntɛn sã kpá ↄ̃ndↄ̃yãi,
tó n swɛ̃̀ɛ kpà yã asãnsia,
3 tó n lɛ́ zù wɛ́zɛ̃i,
tó n wiki lɛ̀ yã dↄ̀rↄ dↄ̃naaa,
4 tó n kpatɛ kɛ̀i lán andurufuu bà,
tó n wɛ̀tɛ lán aruzɛkɛ kũ à utɛnaa bà,
5 ĩnigↄ̃ vĩnakɛna Dikirinɛ dↄ̃ sà,
ĩni bo Luda dↄ̃naaa.
6 Zaakũ Dikiri mɛ́ àdi ń gba ↄ̃ndↄ̃,
dↄ̃na kũ yã dↄ̀rↄ dↄ̃naao dì bo a kĩnaamɛ.
7 À zĩ̀blena kũna gbɛ̃ mananↄnɛ,
à de sɛ̃gbako ũ taarisaridenↄnɛ.
8 Àdi ↄ lika gbɛ̃ mananↄi ń zɛ́ gũn,
àdi a yãmarinↄ dãkpã ń táa'onaa gũn.
9 Ĩnigↄ̃ yãzɛde dↄ̃ sà kũ yã súsuo
kũ yã manao kũ zɛ́ manao pínki.
10 Zaakũ ↄ̃ndↄ̃ ni gɛ̃ n swɛ̃̀n,
dↄ̃na ni n pↄ kɛ nna.
11 N laakari ni n dãkpã,
asãnsi ni ↄ likanyĩ.
12 Ani n bo gbɛ̃ vãninↄ zɛ́n
ani n sí yãbɛ̃nɛ'orinↄ ↄĩ.
13 Gbɛ̃ pìnↄ pã̀ zɛ́ súsunɛ,
ò gusira zɛ́ sɛ̀.
14 Òdi pↄnna kɛ vãnikɛnaa gũn,
òdi yã vãni fayasari nna ma.
15 Ń yãkɛna súsuro,
òdigↄ̃ yã kɛ kũ manafikiomɛ.
16 Ɔ̃ndↄ̃ pì ni n sí zinakɛri ↄĩ,
ani n bo karua yãnnanna'onnɛnan.
17 Nↄgbɛ̃ pì pã kpà a nɛ́nↄkparekɛgↄrↄ gↄ̃i,
à Luda bàka kunna kãao yã gbòro.
18 A bɛ dì mì pɛ́ kũńwo gaamɛ,
a kpɛ́ zɛ́ dì tá kũńwo gyãwãn.
19 Gbɛ̃ kũ à gɛ̃̀ii dì nɛ̀sɛ litɛro,
àdi wɛ̃̀ndi zɛ́ le doro.
20 Ɔ̃ndↄ̃ pì ni n da gbɛ̃ mananↄ zɛ́a,
ĩnigↄ̃ dↄ̀rↄdenↄ zɛ́ kũna.
21 Zaakũ nɛ̀sɛpuradenↄ mɛ́ oni gↄ̃ bùsu vĩ,
taarisaridenↄ mɛ́ onigↄ̃ kú a gũn.
22 Yãvãnikɛrinↄ sↄ̃, oni pɛ́ḿma ò ń bↄtɛ bùsun,
oni náanisaridenↄ kpakɛ a gũn.