ABUDIASI
Bɑ ǹ yɛ̃ sɑ̃ɑ sɑ̃ɑ sɑnɑm mɛ Abudiɑsi wi, u win sɔmburu kuɑ. Adɑmɑ Yudɑbɑn temɔwɑ u Gusunɔn gɑri geruɑ Edɔmubɑn sɔ̃. Edɔmu be, bɑ sɑ̃ɑwɑ Esɑun bibun bweseru. Bɑ rɑ n Isirelibɑ tusɑwɑ bɑɑ mɛ sikɑdo turowɑ bɑ mɔ. Bɑ yinɑ Isirelibɑ bu kpe kɑ ben temɔ sɑnɑm mɛ bɑ wee Egibitin di. Yen biru, bɑ rɑ mɑm Isirelibɑ wɔrɑɑ dewɑ bu ben yɑ̃nu gurɑ. Yen sɔ̃nɑ Abudiɑsi u bu sɔ̃ɔwɑ mɑ bɑ koo ben torɑnun ɑre wɑ. Domi Gusunɔ u koo bu siri.
Tire ten kpunɑɑ
1. Sɛɛyɑsiɑ bi Gusunɔ u koo Edɔmugibu ko, nɑɑsu 1n di sere nɑɑsu 5.
2. Yinni Gusunɔn siribun tɔ̃ru, nɑɑsu 6n di sere nɑɑsu 21.
1
1 Gɑri wee yi Yinni Gusunɔ u nɛɛ, Abudiɑsi u gere Edɔmubɑn sɔ̃.
Yinni Gusunɔ u sɔmɔ gɔrɑ bwese tukunun suunu sɔɔ u nɛɛ,
nu seewo nu Edɔmubɑ tɑbu wɔri.
Edɔmubɑ bɑ koo kɑm ko
2 Yinni Gusunɔ u Edɔmubɑ sɔ̃ɔwɑ sɑɑ Abudiɑsin nɔɔn di u nɛɛ,
bɛɛ Edɔmubɑ, kon bɛɛ ko bwese dɑm sɑrirugiru bwesenu kpuro sɔɔ.
Tɔmbu kpuro bɑ koo bɛɛ gɛm.
3 Wee bɛɛn tii suɑbu bɛɛ nɔni wɔ̃kuɑ,
mɑ i sɔ̃ kpee bɑɑbɑ sɔɔ
mì goo kun kpɛ̃ u bɛɛ nɑɑ turi.
Mɑ i tii sɔ̃ɔmɔ i mɔ̀,
wɑrɑ u koo sun surɑ minin di.
4 Yen sɔ̃, i n yɛ̃ mɑ bɑɑ ì n dɑ sere mi gunɔ bɑkeru tɑ ten sokuru mɔ,
ǹ kun mɛ, i duɑ kperiɔ i bɛɛn wɑ̃ɑ yenu kuɑ mi,
kon bɛɛ sɑrɑsiɑmɑ.
Nɛ, Yinni Gusunɔwɑ nɑ yeni geruɑ.
5 Gbɛnɔbu bɑ̀ n nɑ bɑ bɛɛ wɔri subɑru sɔɔ wɔ̃kuru,
bɑ koo bɛɛn yɑ̃nu gurɑwɑ.
Bɑ̀ n bɛɛn resɛm gbeɑ wɔri,
bɑ koo ye sɔriwɑ,
kpɑ bu bɛɛ fiiko deriɑ.
6 Adɑmɑ bɛɛ Esɑun bibun bweseru,
yibɛrɛbɑ bɑ koo bɛɛn ɑrumɑni gurɑ,
bɑɑ kɑ bɛɛn dukiɑ ye yɑ beruɑ.
7 Be i rɑɑ kɑ nɔɔ tiɑ sɑ̃ɑ, bɑ koo bɛɛ tɔnu kɑndu kuɑ,
kpɑ bu bɛɛ girɑ sere bɛɛn tem nɔɔ burɑ yerɔ.
Be bɑ rɑɑ sɑ̃ɑ bɛɛn bɔrɔbɑ, bɑ koo bɛɛ dɑm dɔre.
Kɑ be i rɑ rɑɑ di sɑnnu, bɑ koo bɛɛ yinɑ bɛriɑ.
Adɑmɑ i ǹ ye tubumɔ.
8 Nɛ, Yinni Gusunɔ nɑ nɛɛ,
nɛn mɔrun tɔ̃ru sɔɔ, kon bwisigibu kpeerɑsiɑ Edɔmun tem sɔɔ,
kpɑ n lɑɑkɑrigibu go.
9 Bɛɛ Temɑgibu, bɛɛn tɑbu kowobu bɑ koo burisinɑ
kpɑ bu be kpuro go.
Yèn sɔ̃ bɑ koo Edɔmubɑ
sɛɛyɑsiɑ
10 Bɛɛ Edɔmubɑ, wee i bɛɛn mɛro bisibu Yɑkɔbun bweseru mwɛɛrɑ i go.
Yen sɔ̃, i ko i sekuru wɑ.
I ko i kɑm kowɑ sere kɑ bɑɑdommɑɔ.
11 Domi i wɑ̃ɑ mi sɑnɑm mɛ yibɛrɛbɑ bɑ Isirelibɑ tɑbu kɑmiɑ
mɑ bɑ duɑ ben wusɔ.
Mɑ bɑ ben yɑ̃nu gurɑ Yerusɑlɛmuɔ bɑ tɛtɛ toosi.
Bɛɛn tii i sɑ̃ɑ nge yibɛrɛ be.
12 Bɛɛ Edɔmubɑ, n ǹ dɑɑ weenɛ i bɛɛn mɛro bisibu Yudɑbɑ mɛɛri kɑ nuku dobu
sɑnɑm mɛ bɑ nɔni sɔ̃ɔre.
N ǹ dɑɑ weenɛ i nuku dobu ko
ǹ kun mɛ i bu wɔmɛ sɑnɑm mɛ bɑ nuki sɑnkire.
13 Bɛɛ Edɔmubɑ, n ǹ dɑɑ weenɛ i du nɛn tɔmbun wuuɔ
sɑnɑm mɛ yibɛrɛbɑ bɑ gu kpeerɑsiɑ.
N ǹ dɑɑ weenɛ i gen bɑnsu mɛɛri kɑ nuku dobu.
N ǹ dɑɑ weenɛ i gen dukiɑ gurɑ i tii koosi.
14 N ǹ dɑɑ weenɛ i yɔ̃rɑ swɑɑ yinnɑ yerɔ
i ben be bɑ duki mɔ̀ mwɛɛri i go,
ǹ kun mɛ i bu mwɑ i yibɛrɛbɑ nɔmu sɔndiɑ nɔni swɑ̃ɑ te sɔɔ.
15 Domi sɑɑ yɑ turuku kuɑ
yè sɔɔ Yinni Gusunɔ u koo bwesenu kpuro siri.
Sɑɑ ye sɔɔ, bɑ koo bɛɛ kuɑ nge mɛ i gɑbu kuɑ.
Kɔ̃sɑ ye i kuɑ mi, yɑ koo wɔriwɑ bɛɛn wiru wɔllɔ.
Isirelibɑ
bɑ koo Edɔmubɑ mɔru kɔsie
16 Bɛɛ Isirelibɑ, i nɛn mɔru ye nɑ kɑ bɛɛ sɛɛyɑsiɑ nɔrɑ
nɛn guu dɛɛrɑrun wɔllɔ.
Mɛyɑ bwese ni nu tie, nu ǹ kpɛ̃ nu ye nɔ nu kpe.
Nu ko n ye nɔrumɔwɑ sere yu kɑ nu go
kpɑ nu kpeerɑ mɑm mɑm.
17 Sɑɑ ye sɔɔ, Siɔni koo mɑɑ ko nɛ Gusunɔn guu dɛɛrɑru.
Be bɑ yɑrɑ tɑbun di Yɑkɔbun bweseru sɔɔ bɑ koo fɑɑbɑ wɑ mi,
kpɑ bu ben tem mwɑ be bɑ rɑɑ mu mwɑn nɔmɑn di.
18 Yɑkɔbun bibun bweseru kɑ Yosɛfun bibun bweserɑ ko n sɑ̃ɑwɑ nge dɔ̃ɔ.
Bɑ koo Esɑun bweseru dɔ̃ɔ mɛniwɑ nge yɑkɑsu.
Bɑ koo bu dɔ̃ɔ mɛniwɑ mɑm mɑm, bɑ ǹ goo derimɔ mi.
Nɛ, Yinni Gusunɔwɑ nɑ yeni geruɑ.
Isirelibɑ bɑ koo wure
bu be bɑ bu sikerenɛn tem mwɑ
19 Yudɑ be bɑ wɑ̃ɑ sɔ̃ɔ yɛ̃sɑn nɔm dwɑru giɑ bɑ koo Edɔmubɑn tem mɛ mwɑ. Be bɑ wɑ̃ɑ wɔwɑɔ, bɑ koo Filisitibɑn tem kɑ Sɑmɑrigim kɑ Efɑrɑimugim mwɑ, kpɑ Bɛnyɑmɛɛbɑ bu mɑɑ Gɑlɑdin tem mwɑ.
20 Isirelibɑn tɑbu kowo be bɑ rɑɑ kpikiru suɑ sɑɑ sɔ̃ɔ yɛ̃sɑn nɔm geu giɑn di, bɑ koo Kɑnɑnibɑn tem mwɑ sere n kɑ dɑ Sɑrepɑtɑɔ. Yerusɑlɛmugii be bɑ mɑɑ kpikiru dɑ Sefɑrɑdiɔ, bɑ koo wuu si su wɑ̃ɑ sɔ̃ɔ yɛ̃sɑn nɔm dwɑru giɑ mwɑ. 21 Kɑ nɑsɑrɑwɑ bɑ koo Siɔnin guuru yɔ. Min diyɑ bɑ ko n Edɔmubɑ kpɑre.
Kpɑ Yinni Gusunɔ u n bɑndu dii!