NAHUM
gbouŋ
Ki jiin Nahum gbouŋ na po
Nahum din pak Asiria digbansaakar Ninefe biiru po, ki yet nan li tee Yennu tubdatue, kimaan baa ton ki bia tuun toonbiit na paak. Jona nba din pak Yennu maan ki tur Ninefe teeb yoo nba na, ki sɔkinii Nahum daa kaa. Jona yoo maŋe ki Ninefe teeb na din nyik biit tumu, ki ki la tubdatu. Ŋaan li poorpo ki bi tan ŋmat toonbiit binbeŋ ni, ki Yennu boontib.
1
1 Mɔmaan na jiin Ninefe poe, ki tee yirintu nba ki Nahum wunba nyii Elkos doo ni na la.
Ki jiin Yennu wutoor nba do Ninefe po
2 Ti Yomdaanɔ Yennu tee funfunn daanɔe,
binba yêen u mɔb, u daar bi tuba,
u wutoor nie ki u pa jiintib.
3 Yennu ki dont wutoor yian yiami, ŋaan u mɔk yiikoo,
u kan ban te wunba tun biit n nyi tubdatu ni.
Yennu-i somm siaminba, wouŋo fukitir;
sanpagbante tee tangbiruŋ ki u taapant gbit.
4 U yeen mɔkgbeŋir ki li fɔɔt, ki te mɔka fɔɔt,
ki te Basann tiŋ koot, ki te Kamel kunkonn mɔɔt koot,
ki bia te Lebanonn tiŋ ni tipuuk suur.
5 Ki jɔfɔkit jekir Yennu tɔɔnn,
ki kunkona tuu nann u numm ni.
Yennu-i lekit yoo nba, tiŋ tuu jekire;
ki durinya na nan li niib kur jekir nan jaŋmaanii.
6 U wutoor-i doo yoo nba, ŋmee saa tinni?
Ŋmee saa fit nyi u wutochiɔŋ na ni?
U tuu mɔɔn u wutoor nba di nan mupeenu nae,
ki tanpiit yakitir, ki kpantir tant u tɔɔnn.
7 Yennu ŋan, u guu u niib daamii-i baar yoo nba,
ki u baka be damm nba baar u boor ni po.
8 U tuu biir u dataie yiama
nan nyunmɔnn nba tuu pubir sik biaŋinba na;
ki binba yêen u mɔb, ki u te bi kpenn.
9 A lorin bee a lin biir Yennu?
U saa biirawa, sɔɔ ki yêen u mɔb ki pukii taar munlee.
10 Yimm dayibira na, n saa boonti
nan baa tuu ŋmat kunkonii nan kinkak-koona
ki lin di muu biaŋinba nae.
11 Ninefe, a nie ki jasɔɔ nyii ki gbee nan dudukbiit, ŋɔɔe lorin a lin biir Yennu. 12 Linba ki Yennu yeen u niib Israel teebe na, “Asiria teeb nba lek mɔk panii, ki bia yab biaŋinba na, ŋaan n saa biirib ki bin kpo. N niib, mine te ki i dii fara, ŋaan n kan te ki lin ji baarini. 13 N saa gɔɔr Asiria yiikoo nba dia-i na, ki bia cheer jarit nba baani na.”
14 Linba nae ki Yennu senn ki jiin Asiria teeb po: “Bi kii mɔk yaaboona nba ki bi sana sii gaa bi paaki. N saa biir pata nba be bi yenbis jiant diit ni na. N ŋamii kaate ki guunt Asiria teeb. Bi ki ŋan nan bii be bi manfoa ni.”
15 Gotirii, toomiie nyii kunkona paak ki baat nan labamann na. U paa sɔnue, a wun mɔɔnt nyannu na po. Juda teeb, ii di jaamm kii kpamm man, ki tur Yennu linba ki i senn nan i saa turɔ na. Ki nibiit na ji kan ban lek i tiŋi. N biirib ki gbenna.