बिलाप
ब्रेक्ब मुर: एको किताब येरमीयामी ब्रेक्शो बाक्ब।
गेना ब्रेक्शो: एको किताब ५८७-५८६ बि. सी. परमप्रभु यावे आ खिं नु यरूसलेम खतम दुम नोले ब्रेक्शो बाक्ब।
मारदे ब्रेक्शो: येरमीया आ सेल्शो बिलाप ५ ओटा कुम्सो बाक्नीम। मेको कुम्सोपुकीम मार लोव़ बाक्ब देंशा हना:
१. ङोंइती ङा लोव़ यरूसलेम सहर वोंइश बेक्शो मीश खोदेंशो दुम्शो बाक्ब।
२. आ नोले ङा लोव़ परमप्रभु यावे आ निसाफ पचा आ पर्बम बाक्ब।
३. नोले ङा लोव़ ब्रेक्बमी आंम आ पर्बम ब्रेक्ब।
४. नोले ङा लोव़ लेंशा ठेयब श्येत आ पर्बम बाक्ब।
५. मिनु नेल्ल क्येङा नोले ङा लोव़ “परमप्रभु, गे लेत्चा गेयीनी” दे पुंइतीक बाक्ब।
1
यरूसलेममी “वारच पने” दे पुंइशो
1 मेको सहरम गिश श्येत्थ दुम्मे। ङोंइती मेकेर शुश मुर बाक्तेक्म। मेको आ वोंइश बेक्शो मीश मुर खोदेंशो दुम्त। मेको ङोंइती रागी रागी आन दातेमी ठेयब बाक्त। मेको रागी पिप आ तमी खोदेंशो बाक्त। मुल मेको सहर वाइल खोदेंशो दुम्त। येरमीया ५१:५ 2 मेको नाक्दो हिशेक पा ङाक्ब। आ प्रेक्क यिना यिन बाक्नीम। मेको आ दाक्शो मुर आन दाते ङा सुइम मेको कली आ थुं बारपाइक्चा ङा लोव़ मपाइनीम। आ वारच नेल्लेम मेको कली प्रोंइतेक्म। मुल मेको आ जोरी सत्रु दुम्तेक्म। भजन संग्रह ६९:२१ 3 यहूदा श्येत जशा, ग्याइश्शा लाइक्चा पुंइसाक्व। मुल श्येत पा गेय पाइब दुम्त। मुल मेको रागी रागी ङा मुर आन दातेमी बाक्ब। नाइक्चा कली बाक्तीक मबा। आ कली खेदा पाइबपुकीमी मेको कली श्येतमी ग्याइश्शा लाइक्तेक्म। 4 सियोन लतीक लां रोंका पाइनीम। मारदे हना सुइमी चाड मानेचा कली मेकेर रे मगाक्नीम। सहर ङा ठेयब लाप्चो नेल्ल श्येत्थ बाक्नीम। आ चढ़ेबपुकी हुकयी पाइनीम। आ मीश आल सुर्ता पाइनीम। मिनु सहरम श्येत जशो बाक्ब। 5 मेको आ जोरी सत्रु आ होव़प दुम्तेक्म। मेको आन माल्शो शुश ताइनीम। मारदे हना परमप्रभु यावेमी मेको आ शुश हेंथे पशो तशा, यरूसलेम कली श्येत गेप्तु। मेको आ आल ग्याइश्शा लाइक्चा पुंइसीशा, आन जोरी सत्रु आन ङोंइती लाम्तेक्म। 6 सियोन आ तमी रे पा आ मान पचा पुंइसीतीके नेल्ल लने थुम्तु। आ पिप आ तौपुकी जोतीकेम थिश्शो रोकोश खोदेंशो दुम्तेक्म। मेको बोल मपाइश्शो दुम्शा, आन कली खेदा पाइब आन ङोंइती प्रोक्ना प्रोक्न बाक्नीम।
7 यरूसलेममी ठेयब श्येत जतीक नु सुर्ता पतीक नाक्ती जाक्चा क्येङा ङोंइती आंम के बाक्शो शोंप नेल्ल मिम्ब। मेको आ मुर आन जोरी सत्रु आन गुइमी गेचा पुंइसीची ना सुइमी मेको कली वारच मपाम। आ जोरी सत्रुम मेको आ श्येत तशा शुक्शी पाम्तेक्म। 8 यरूसलेममी ठेयब पाप पाप्तु। मोपतीके मेको शुक्शी पाइक्चा पुंइसाक्व। ङोंइती मेको कली मान पाइब नेल्ले मुल महिक्नीम। मारदे हना मेकोपुकीमी मेको कली शिश्रा ताम्तेक्म। मेको आंमान हुकयी पा आ कुल ख्रुइक्ब। 9 मेको आ ग्रांग्रा दितीके आ गुनेमी केम्साक्व। मेकोमी नोले ङा नाक्त ममिम्त। मेको आ तशो श्येत हिंचा ङा बाक्त। आ थुं बारपाइक्ब सुइ मबाक्म। मेकोमी “परमप्रभु यावे, आं श्येत कोव़ङीन। आं जोरी सत्रुमी आं कली ग्रातेक्म।
10 आ जोरी सत्रुमी आ शोंप नेल्ल रोइक्ताक्यीमी। गे मेको आन कली इन बाक्तीके खिंम ओव़चा मगेतीनी हना यो, यरूसलेममी रागी रागी ङा मुर इन खिं ओव़चा ताम्तेक्म। येरमीया ५२:१७-१९; ब्यवस्था २३:४ 11 मेको आ मुर नेल्ल हुकयी पा, अन्न माल्ना माल्न गाक्नीम। लेंशा बोल्यो दुम्चा कली आन शोंप लेयनीम। परमप्रभु यावे, मुल आं कली कोव़ङीन। गो महिक्सीशो दुम्ती” देंती।
12 गे एको लां रे पा लाइब तशा, आन पर्बम मारेइ ममिम्नीनी? एर ओंथ नेल्ल कोव़ङीन। आं श्येत क्येङा यो अरु हिंचा ङा श्येत बाक्बा? परमप्रभु यावेमी आ शुश गाइक्तीकेमी आं कली मेको श्येत गेती। 13 मेकोमी इर रे मी सोइक्ताक्व। मिनु आं रुश आगा ओव़पाइक्ती। आं खोइल कली ग्याइल दाइश्शा रेप्पाइक्ती। आं कली आ ङोंइती रे तिल्ती। मेकोमी नेल्ल नाक्त आं कली मुर मबाक्तीके नु बोल मपाइश्शो सेल्ती। 14 मेकोमी आं हेंथे पतीके जुवा खोदेंशो सेल्तु। मिनु मेको आ गुइमी फ्रेंसाक्व। मेको आं बला तारी शुश हेल्शो बाक्ब। मोपा आं बोल ग्युम्त। मिनु परमप्रभुमी आं कली आं ग्राने मचाप्चा ङा मुर आन गुइमी गेती। 15 परमप्रभुमी आं दाते ङा लडाइ पाइब नेल्ल आन कली प्रोंइतु। मुल मेकोमी आं कली वारच मपथु, आ ठिटा वोंइश मुर नेल्ल आन कली साइक्तु। परमप्रभुम अङगुर ख्राक्शो खोदेंशो पा यहूदा ङा कन्ने मीश आल, यरूसलेम कली ख्राक्शो बाक्ब। यसैया ६३:३ 16 गो मार कली ङाक्नुङा, मार कली आं प्रेक्क यीनीम देंशा हना, आं कली लेम्ब नु आं थुं बारपाइक्ब आ क्येङा ङोन बाक्नीम। आं आल लने थुम्तेक्म। मारदे हना आं जोरी सत्रु आं क्येङा बोल्यो बाक्तेक्म।
17 सियोनमी पुंइचा कली आ गुइ दिंताक्व। तन्न आ थुं बारपाइक्ब सुइ मबाक्म। परमप्रभु यावेमी “याकूब आ नेक्था ङा मुर आ जोरी सत्रु दुम्चा माल्नीम” दे अरेप्तु। मिनु मेको आन दातेम यरूसलेम ग्रांग्रा दिचा ङा दुम्त। येरमीया १:८
18 परमप्रभु यावे ठीक पाइब बाक्ब। मारदे हना गो आ लोव़ काइ मटीब दुम्ती। तन्न गे जात जात ङा मुर नेल्ल नेनीन। आं श्येत कोव़ङीन। आं मीश आल नु ठिटा वोंइश आल नेल्ल ग्याइश्शा लाइक्चा पुंइसाक्म। येरमीया ३:४२; येरमीया ५:१६ 19 गो आं दाक्शो मुर आन कली ब्रेत्ताक्ङ। तन्न मेकोपुकीमी आं कली प्रोंइतीमी। आं चढ़ेब नु खाल्पा आन बोल लेप्पाइक्चा कली जचा थोव़क माल्न माल्ना सहरम बेक्तेक्म। 20 “परमप्रभु यावे कोव़ङीन, गो शुश श्येत जाता। गो इन देंशो मटीब दुम्तीके आं थुं चोती। आं थुं साप्पा सेक्बेर पाइब। लाङगाम तरवारमी साइक्ब। मिनु खिं आगाम बेक्तीक बाक्ब। 21 मुरपुकीमी आं हुकयी पशो नेंतेक्म। आं कली थुं बारपाइक्ब सुइ मबाक्नीम। आं जोरी सत्रु नेल्लेमी आं श्येत जशो आ पर्बम नेंतेक्म। आं कली मोदेंशो दुम्शो तशा ग्येरसाक्म। गे इन देंशो नाक्त जाक्ल। मेकोपुकी यो आं खोदेंशो पा श्येत जामेक्ल। येरमीया ४:२१ 22 मेको आन मरिम्शो पशो नेल्ल इन ङोंइती बाक्ल। मिनु गे आं हेंथे पशो आ पर्बम आं कली पशो खोदेंशो पा मेको आन कली यो पतीन। गो शुश हुकयी पाइक्नुङ। आं थुं लुक्च लत” देंत।