42
Mugululi Asi Dunu ea Sia:ne Gadosu
1 Gode! ‘Dia’ gebo da hano anegagi manusa: hohogola ahoa
amo defele Na da Di hogosa.
2 Esalusudafa Gode! Na Dima hanai da hano hanai defele gala.
Na da habogala Dia midadi, Dima nodone sia:ne gadomusa: masa:bela:?
3 Eso haga amola gasia huluane na da disa,
amola na si hano da na ha:i manu agoane gala.
Eso huluane nama ha lai dunu da nama amane adole ba:sa,
“Dia Gode da habila:?”
4 Na da ni musa: hamoi amo dadawa:sea, na dogo da sesa.
Na da Hina Gode Ea diasu ganodini masunusa: gilisi amo ilima madelale
ili da na bisili oule ahoasu, amola amo gilisisu
ilia da Godema hahawane gesami hehea:la amola wele sia:sa ahoasu.
5 Abuliba:le na da bagadewane da:i dioi ganabela:?
Abuliba:le na da na dogo ganodini bagadewane se nabawane dawa:sala:?
Na da dafawane hamoma:beyale dawa:su amo Godema fawane dawa:mu,
amola na da bu enowane Ema nodone,
“Na Gaga:su amola na Gode,” agoane sia:mu.
6-7 Na da goeguda: mugululi misi.
Amola na da na dogo ganodini bogomuwane se naba.
Amaiba:le, na da na asigi dawa:su Godema bu sinidigili dawa:sa.
E da nama se bagadedafa iasi.
Bidi hamosu da hano heda:i defele nama gosa.
Bidi hamosu da Hemone Goumi amola Misa Goumi
amoga hano nawa:li mogosobe, Yodane Hano amoga gudu daha,
amo defele, gugelebe agoane nama gole wesa.
8 Hina Gode da Ea mae fisili asigidafa hou amo esoga olelemu da defea.
Amasea na da gasia Ema gesami hea:mu
amola na esalusu ouligisu Gode, Ema sia:ne gadomu.
9 Na da na gaga:su Gode, Ema sia:sa, “Dia da abuliba:le na gogoleila:?
Nama ha lai gasa fi dunu da nama gebewane se iaha.
Na da abuliba:le eso huluane se nabala:?
10 Ilia da nama gebewane odagia gadele sia:beba:le, na da gala:la sa:i dagoi ba:sa.
Ilia da gebewane nama amane adole ba:lala, “Dia Gode da habila:?”
11 Na da abuliba:le baligili da:i diobela:?
Na da abuliba:le dogo se nabawane esalabela:?
Na Godema dafawane hamoma:beyale dawa:mu.
Na da bu enowane Ema nodone sia:mu.
Bai E da na Gaga:sudafa amola na Godedafa.